Македонија
Поповски-Тимоние: Македонија ја има поддршката на Франција во интеграциските процеси

Министерот за комуникации, отчетност и транспарентност, Роберт Поповски, денеска оствари средба со францускиот амбасадор во Република Македонија, неговата екселенција Кристијан Тимоние, на која се разговараше за повеќе актуелни прашања.
Министерот Поповски го запозна францускиот амбасадор со деталите на најновата одлука на Владата, со која Министерството за финансии има обврска да подготви предлог-одлука за обезбедување 80 милиони денари од тековната буџетска резерва. Средствата ќе бидат ставени на располагање за спроведување кампања за референдум врз основа на одобрен план од Собранието на Република Македонија како овластен предлагач, а донесена е и одлуката дека доколку на крајот на кампањата има непотрошени средства, тие ќе бидат вратени во буџетот на Република Македонија.
Двајцата соговорници се согласија дека процесот на планираната комуникација од јавен интерес, информирањето за референдумот, треба да биде базирано на принципите на објективност, транспарентност и рационалност.
„Граѓаните на Република Македонија треба да знаат дека Европската Унија е наш демократски партнер и нашата иднина“, истакна министерот Поповски. Тој истакна дека договорите со Бугарија и Грција се пример за унапредување на односите на соработка и пријателство меѓу соседите во регионот и дека со тоа се испраќа порака до Европската Унија и до НАТО дека земјите во регионот имаат раководства што се однесуваат европски, а нивните земји заслужуваат европска перспектива.
Амбасадорот Тимоние ги поздрави транспарентноста и отчетноста на Владата оценувајќи дека работата на министерот Поповски дава значајни резултати во демократските промени во Република Македонија, особено во областа на слободата на медиумите. Со министерот Поповски разговараше и за измените на Изборниот законик, при што двајцата соговорници заеднички заклучија дека треба да се земат предвид укажувањата на новинарските здруженија и медиумите поврзани со дел од одредбите од Законикот кои се однесуваат на онлајн-медиумите, порталите.
Министерот Поповски упати повик до опозицијата за деблокирање на процесот на донесување на Законот за аудио и аудиовизуелните медиумски услуги повторувајќи дека измените се во насока на создавање услови за независно и професионално работење на МРТ, Агенцијата за аудио и аудиовизуелните медиумски услуги и на сите медиуми во Македонија, што е во насока на заложбата на Владата на Република Македонија да работи транспарентно и отчетно.
„Македонија оди во правилна насока и земјата ја има поддршката на Франција во интеграциските процеси, кои отвораат перспектива за економски и севкупен развој“, му порача францускиот амбасадор Кристијан Тимоние на министерот Поповски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ со повик до партиите да го поддржат законот за ветинг

ДУИ упати повик до сите политички партии да го поддржат предлог-законот на ДУИ за ветинг.
Според партијата, процесот на ветинг е неопходен и клучен за да се изгради довербата на граѓаните во правдата, институциите и државата.
„Нашиот став е јасен и непроменлив: им упатуваме повик на сите парламентарни политички партии да го поддржат предлог-законот на ДУИ за ветинг со меѓународен надзор, еден сеопфатен и бескомпромисен процес што ќе ја врати довербата на граѓаните во правосудството и институциите, го повторуваме нашиот одамнешен став за истрага против сите политички партии, без исклучок, за периодот од изминатите 33 години, бараме проверка и контрола на потеклото на имотот на сите носители на јавни функции во последните 33 години: министри, пратеници, градоначалници, директори, судии, обвинители – сите, без исклучок; ја потенцираме потребата од длабoка истрага на процесот на приватизација, кој во многу случаи служеше како основа за создавање на недопирливи олигарси. Ова темно поглавје не смее да остане нерасчистено. Правдата не се мери со изјави, туку со конкретни одлуки, бараме исто така истрага за дејствувањето на безбедносните служби на државата, како и за функционерите кои биле дел од тие служби од 1945 година наваму: ОЗНА, УДБ-а, СДБ, ДБК, УБК, АНБ“, изјави потпретседателот на ДУИ, Арбер Адеми.
Според него, ова не е само политички проект, ниту пак стара заложба на ДУИ, туку услов за правда и за поправедна иднина за сите граѓани.
Македонија
Отворена нова градинка „Верверичка“ во Кисела Вода

Во населбата 11 Октомври Згради во општина Кисела Вода денеска беше отворена новата градинка „Верверичка“, како дел од ЈДГ „Весели Цветови“.
Градинката е изградена во финансиско партнерство помеѓу Општина Кисела Вода и Комерцијална банка, која со донација од 6 милиони придонесе за реализација на овој проект, вреден над 14 милиони денари.
Новата градинка се простира на површина од 525 м², располага со 6 занимални, 4 воспитни групи и јасли, и овозможува згрижување на 125 деца. Оваа инвестиција директно ја решава проблематиката со недостиг на места во градинките.
Со отворањето на денешниот објект, изградбата на уште две градинки кои се во тек, претходно отворените две градинки и петте градинки кои беа доградени, во моментот во Кисела Вода, за прием чекаат само 20-тина дечиња, велат од Општина Кисела Вода.
Македонија
Кривична пријава за градоначалникот на Кичево – дозволил дива депонија во населена зона во градот

Полицијата поднесе кривична пријава против градоначалникот на Кичево, Фатмир Дехари, поради постоење основи на сомнение за сторени кривични дела „несовесно работење во службата “ и „загрозување на животната средина и природата со отпад “.
Според информациите од СВР-Охрид, тој, постапувајќи несовесно при извршување на своите законски обврски и не вршење должен надзор, од 2020 година, дозволил да биде формирана дива депонија на повеќе илјади квадратни метри во населена зона во Кичево.
Дехари давал задолженија на вработени секојдневно да складираат, оставаат или расфрлаат отпадни материи, односно со нив да постапуваат на начин со кој се менува квалитетот на воздухот, почвата, водата или водотекот, во мера што може да ги влоши условите за живот на луѓето или животните и растенијата со што го загрозил нивниот опстанок.