Македонија
Порака на Гаши од Рим: Без интеграција во ЕУ на Балканот, ризикуваме создавање на географски вакуум

Претседателот на Собранието, Африм Гаши и делегацијата во посета на Италиjа имаше средба со сенаторката Ема Паванели, која е и претседателка на Билатералната група за соработка со државите од Балканот на Италијанскиот Парламент и членовите на Групата, по која следеше средба со Џулио Тремонти, претседател на Комисијата за надворешна и европска политика, Дом на пратеници на Парламентот на Италијанската Република. На средбата присуствуваа и членовите на Комисијата и Џиљо Виња, претседателот на Комисијата за политики за ЕУ.
„На средбите претседателот Гаши подвлече дека билатералните односи меѓу РС Македонија и Италијанската Република во континуитет повеќе од три децении се одвиваат на отворен, искрен и пријателски начин и без отворени прашања, базирани на традиционално пријателство, силно стратешко партнерство и долгогодишна конструктивна соработка и поддршка како на билатерален, така и на мултилатерален план. Континуираната поддршка сведочи за визијата на Италија за интегриран и стабилен Западен Балкан во НАТО и во Европската унија, чиј заеднички именител е просперитетен регион без конфликти и отворени прашања“, соопштија од Собранието.
На средбите, Гаши се задржал на скрининг процесот, кој заврши пред 2 години, со високи оценки од Европската комисија и изрази очекување дека за време на полското претседавање со Советот на ЕУ ќе се испрати конкретен и јасен сигнал до сите земји-членки, дека започнувањето на преговори со Република Северна Македонија е повеќе од императив, како и проценка дека секое натамошно одолговлекување на процесот на проширување на Унијата ќе значи натамошно влошување на ситуацијата, кое ќе се рефлектира како на економски, енергетски, безбедносен, така и на политички план.
Пратеничката Ласовска се осврна на придонесот на Македонија во политиките на Унијата иако не е членка на Унијата, од поддршка за време на мигрантската криза, преку усогласување со заедничката безбедносна политика до приклучување на санкциите од Унијата.
„Наместо членството да се заснова на придонес и исполнување на Копенхашки критериуми, истото е условено од билатерален спор. Тоа придонесува за негативна перцепција на граѓаните и намалување на нивната поддршка за членство во Унијата“, рече таа.
Пратеникот Ковачевски истакна дека поддршката и разбирањето од Италија за придонесот на нашата држава во европските процеси треба да се пренесе и меѓу земјите членки на Унијата. Особено затоа што, како што рече, членството на нашата држава во Унијата, нема да е придобивка само за државата, туку и за Унијата.
На средбите беше истакната и подготвеноста за натамошна взаемна поддршка и соработка меѓу постојаните делегации во парламентарните собранија на НАТО, Советот на Европа, OБСЕ, Медитеранот, ИПУ, како и конструктивната соработка во рамките на Јадранско-Јонската Иницијатива, и во Централно-европската Иницијатива, каде Италија е земја-основач.
Присутните се заложија за унапредување и на повеќе сегменти на меѓудржавна соработка, во економијата, но и во културата, образованието, туризмот и здравството, а Протоколот за соработка овозможува отпочнување на повеќе иницијативи за размена на искуства и парламентарни практики од взаемна потреба и интерес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Тренчевска за изборот на Славески: Партиски послушник кој барањето за повисоки плати го нарекуваше „фолклор“

Пратеничката од СДСМ, Јована Тренчевска, на седница во Собранието реагираше на предлогот за избор на Трајко Славески за гувернер на Народната банка, оценувајќи дека станува збор за партиски послушник на ВМРО-ДПМНЕ и несоодветен избор за ваква значајна функција.
„Наместо независна и непартиска личност, за гувернер на Народната банка се предлага партиски војник, долгогодишен истакнат член и функционер на ВМРО-ДПМНЕ, во моментов член на Извршниот комитет на партијата. Овој предлог сериозно го доведува во прашање принципот на независност на институциите и создава сомнежи за политичко влијание врз клучните економски процеси во земјата“, рече Тренчевска.
Таа потсети дека Народната банка досега беше водена од гувернерка, непартиска личност со неспорен углед, Анита Ангеловска-Бежоска, првата жена на таа функција, која, како што рече, седум години ја извршуваше должноста без ниту една дамка во својата работа. Според Тренчевска, со предлогот Славески да биде гувернер, власта ја партизира и последната институција што ја водеше независен експерт.
„Што знаеме за Славески како политичар и функционер? За неговото име се врзани скапото задолжување на државата во 2009 година, за време на неговиот мандат како министер за финансии, кога беше издадена еврообврзница во вредност од 175 милиони евра со највисока досега каматна стапка — 9,87%. Во време на светската економска криза во 2008 година, наместо силни антикризни мерки — владата продолжи со скапи проекти, не понуди доволна поддршка на граѓаните, бизнисот и работниците. Даночната политика на Славески беше во корист на побогатите, воведувајќи го рамниот данок од 10.
Трајко Славески, член на Извршниот комитет на ВМРО-ДПМНЕ и претседател на Советот на Град Скопје од редовите на ВМРО-ДПМНЕ, беше најгласниот противник на зголемување на минималната плата. Славески го нарекуваше барањето за повисоки плати „фолклор“, а зголемувањето на минималецот го сметаше за економски крах“, посочи Тренчевска.
Таа се осврна и на неговите, како што рече, дискриминаторски ставови и објави на социјалните мрежи, кон Ромите и кон странските работници. А како претседател на Советот на Град Скопје, според неа, ќе остане запаметен како „лицето што го уништи градот, човекот што прави театар од седниците, свесно го блокираше функционирањето на градот, како човекот што ги водеше битките на ВМРО-ДПМНЕ со Арсовска откако им пропаднаа бизнис-зделките, и по изјавите со кои ги оправдува едностраните трошоци за скапи авионски билети во бизнис класа, додворувајќи се очигледно на премиерот, за да може да биде поставен на функцијата гувернер“, рече Тренчевска.
Македонија
Водовод – Скопје најави стратешка и технички сложена интервенција за унапредување на водоснабдителниот систем

ЈП Водовод и Канализација – Скопје информира дека ќе реализира стратешка и технички сложена интервенција која претставува клучен чекор во насока на унапредување на водоснабдителниот систем на градот.
„АДКОМ-Здружение на даватели на комунални услуги на Република Северна Македонија со особена гордост ги следи активностите на своите членки кои, преку вакви комплексни и визионерски зафати, го подигнуваат квалитетот и сигурноста на јавните услуги за сите граѓани. Монтажата на игличест регулационен вентил и поврзувањето на магистралните цевководи се дел од оперативен план со јасна цел: суштински придобивки за целиот систем и сите граѓани – прецизна регулација на притисокот, подобрен проток, намалени загуби на вода и можност за пофлексибилно справување со идни предизвици во мрежата“, се наведува во соопштението.
Ваквите потфати, велат од АДКОМ, кои бараат прецизност, координација и техничка подготвеност, се резултат на долгогодишна посветеност и експертиза.
„ЈП Водовод уште еднаш потврдува дека е лидер во секторот, со капацитет да спроведе активности од највисок степен на одговорност и значење за граѓаните. Проектот подразбира вклучување на голем број стручни тимови и механизација, и се реализира со максимална подготвеност за да се заврши ефикасно и во најкраток можен рок. Оваа активност е дел од поширокиот процес на модернизација на водоснабдителната мрежа – инвестиција во сигурноста, одржливоста и квалитетот на услугите што секојдневно ги користиме“, велат од Водовод.
Македонија
Поранешниот амбасадор во Ватикан, Ѓоко Ѓорѓевски, се замонаши

Поранешниот македонски амбасадор во Ватикан, Ѓоко Ѓорѓевски, се замонаши. Чинот бил извршен во православниот храм на МПЦ-ОА „Свети великомаченик Георгиј“ во Криви Дол во Скопје, од страна на архиепископот охридски и македонски г.г. Стефан.
„На 28 мај 2025 година, кога Светата Црква го прославува Одданието на Воскресение и споменот на светите Гаврил Велички и Ахил Преспански, Неговото Блаженство Архиепископот Охридски и Македонски г. г. Стефан, отслужи Божествена Литургија во манастирот „Свети великомаченик Георгиј“ – Криви Дол, Скопје. На Литургијата Архиепископот го ракоположи во јероѓаконски чин монахот Георгиј (Ѓорѓевски).”, објави Скопската епархија на МПЦ-ОА на својата веб-страница.
Ѓорѓевски е македонски теолог и универзитетски професор. Тој е редовен професор на Православниот богословски факултет „Св. Климент Охридски“ при Универзитетот „Св. Кирил и Методиј“ во Скопје, каде што предава предмети од областа на Старозаветната теологија, вклучувајќи Библиска историја и археологија, Вовед во Стариот Завет и Егзегеза на Стариот Завет.
Своето високо образование го започнал на истиот факултет, каде што дипломирал теологија. Потоа продолжил со постдипломски студии на Понтификалниот универзитет „Грегоријана“ во Рим, Италија, каде што магистрирал и докторирал во областа на библиската теологија.
Во периодот од 2010 до 2014 година, Ѓорѓевски ја извршувал функцијата амбасадор на Македонија при Светата Столица (Ватикан).
Ѓорѓевски е автор на бројни научни трудови и книги. Во периодот од 2016 до 2023 година, тој бил декан на Православниот богословски факултет „Св. Климент Охридски“ во Скопје.