Македонија
Потпишан меморандум за партнерство помеѓу универзитетските клиники на Македонија и Украина

Заменик-министерката д-р Маја Манолева, имаше чест да биде дел од третиот „Summit of First Ladies and Gentlemen“ што се одржа на 6 септември во Киев, Украина.
Под мотото „Спасување животи низ целиот свет“, на овој самит беа потпишани 25 меморандуми за партнерство помеѓу медицинските институции на Украина и различни земји од светот, вклучувајќи ја и Северна Македонија.
Д-р Манолева имаше свое онлајн учество на министерскиот состанок посветен на зајакнување на меѓународните партнерства во областа на здравството. Во името на Министерството за здравство на Република Северна Македонија, таа ја прифати изјавата за потпишување на меморандум за градење отпорни меѓународни здравствени партнерства, кои ги поддржуваат здравствените работници.
„Здравствени установи кои се приклучуваат кон меѓународно медицинско партнерство од нашата држава се Универзитетската клиника за психијатрија и Универзитетската клиника за ТОАРИЛУЦ. Верувам дека универзитетските клиники кои се приклучуваат на партнерството од нашата држава ќе дадат суштински придонес, имајќи ја предвид спецификата на нивната дејност, Клиниката за ТОАРИЛУЦ, со посебен фокус на трауматологија, ортопедија, анестезиологија и интензивно лекување со Ургентен центар, додека Клиниката за психијатрија во насока на унапредување на областа на менталното здравје“, истакна д-р Маја Манолева преку своето онлајн обраќање на самитот.
Колку за потсетување, Министерството за здравство на Република Северна Македонија уште од 2005 година има потпишано Спогодба за соработка со Министерството за здравство на Република Украина, што опфаќа соработка во областа на здравството и медицинските науки, со посебен фокус на размена на информации, искуства, како и размена на специјалисти од повеќе различни области.
„За време на нападите од Русија, во Украина беа оштетени 1427 здравствени установи, па затоа многу е важно Република Северна Македонија како солидарна држава да биде дел од пријателите што ќе помогнат и ќе дадат поддршка со здравствена опрема и помош за Украина. Покрај нашата држава, осум медицински установи во Франција станаа партнери на украинските болници, две медицински установи во Литванија, Латвија и Молдавија, како и водечки болници во Полска, Австрија, Данска, Естонија, Ирска, Шведска, Шпанија, Канада, Израел и Холандија. Украинските детски болници склучија партнерства со Данска, Холандија, Израел, Шпанија, Латвија, Полска и Франција. Установите за ментално здравје во Украина ќе соработуваат со Франција, Северна Македонија и Канада, а универзитетски и мултидисциплинарни болници – со Австрија, Ирска, Естонија, Северна Македонија и Молдавија“, објави Министерството.
„Ние како министерство за здравство ќе продолжиме да бидеме посветени на развивањето и унапредувањето на нашите меѓународни здравствени партнерства. Ова не е само потпис на меморандум, туку потпис на нашата непоколеблива решеност за одржување на животите и за обновување на здравствениот систем во Украина. Ние ќе продолжиме да соработуваме и да вложуваме во меѓународните здравствени односи како начин за поддршка на сите оние што им се потребни“, заклучи д-р Манолева на министерскиот состанок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Центар го објави повикот за субвенции за велосипеди и тротинети

Општина Центар информира дека во тек е јавниот повик за доделување субвенции за велоспеди, е-велосипеди, е-тротинети, како и за дополнителна опрема. На повикот можат да се пријават сите граѓани кои имаат живеалиште во Центар, а проектот се одвива по принципот „прв дојден, прв услужен“.
Градоначалникот Горан Герасимовски ги повикува сите центарци да аплицираат и да поддржат одржлив транспорт.
„Пред две години, нашата општина беше прогласена за највело општина во Скопје која се залага за алтернативен транспорт, намалувајќи го сообраќајниот метеж. Преку овие субвенции ќе ги поттикнеме центарци на здрав начин на живот, на поздрава средина за сите нас. Граѓаните можат да добијат субвенција од 30% од цената на превозното средство, но најмногу до 3.000 денари, како и субвенција за дополнителна опрема (детски седишта и кациги) до 1.000 денари. Повикот ќе се реализира сѐ до исцрпување на финансиските средства, а правото на субвенција е еднократно“, вели Герасимовски.
Жителите на Центар треба да поднесат барање со потребна документација: копија од лична карта, копија од трансакциска сметка и фискална сметка во оригинал и истата да ја достават во архивата на Општина Центар, барака бр.6, од 09.00 до 15.00 часот.
За повеќе информации, граѓаните можат да се обратат на телефонските броеви 02/3203-600 и 02/3203-693 или да ја посетат веб-страницата centar.gov.mk: https://www.centar.gov.mk/?p=24738.
Македонија
Судот го одобри обвинението за возачот што ја прегази Фросина

Судот го одобри обвинението за возачот Васил Јованов, која ја прегази Фросина Кулакова на пешачки премин на булеварот Партизански одреди.
„Ја информираме јавноста дека Советот за оценка на обвинителниот акт го одобри обвинението на Основното јавно обвинителство со КО бр. 271/25 од 27.3.2025 година против осомничениот В. Ј. за кривичното дело тешки дела против безбедноста на луѓето и имотот во сообраќајот од чл. 300 ст. 2 в.в. со чл. 297 ст. 1 од КЗ, поврзан со сообраќајната нестеќа од јануари 2025 година на булеварот Партизански одреди во Скопје, во која животот го загуби 22-годишната Ф. К.“, соопшти Кривичниот суд.
Од таму додаваат дека со одобрениот обвинителен акт формиран е кривичен предмет, кој ќе биде ќе биде распределен на понатамошно судење во согласност со АКМИС-системот, а кога ќе биде насрочен термин за главна расправа, странките и јавноста ќе бидат дополнително известени.
Македонија
(Видео) Јанчев: Кадровата политика на оваа влада го доуништува здравството

Пратеникот од Левица, Сашко Јанчев во Собранието за време на седницата за пратенички прашања, упатувајќи прашања до министерот за здравство, реагираше на кадровските злоупотреби, мобинг и недоследности во здравствените установи.
„Нема подобра политика од кадрова политика. Државните институции не се зградите фасадите и ентериерот, туку луѓето, кадарот кој работи во нив. И ако има добар кадар, ќе има и функционални институции“, рече Јанчев.
Тој алармираше за постапките на Бурим Идризи, раководител на сектор во Институтот за трансфузиона медицина, кој според кажаното, изготвувал фалични анекси на договори за вработување со кои неовластено го менувал датумот на засновање на работниот однос. На вработени со повеќедецениски стаж им вметнувал одредба дека засновале работен однос лани, во 2024 или 2023 година. Раководителот таквите анекси им ги давал на вработените и непотпишувањето на истите го третирал како отказ, односно прекин на работниот однос.
„Овој лош кадар, Бурим Идризи, не само што е награден, туку е пренаграден – тој е одговорен на четири одделенија, правно-административно техничко одделение, општи работи, ИТ системи, е во комисија за „Мој термин“ и други комисии. Значи, тој зема поголема плата од што земаат специјалистите“, истакна Јанчев.
Посочи дека и директорот на Институтот за трансфузиона медицина, Елези, непотпишувањето на наштиманите анекси го третирал како раскинување на договорот за вработување и на огласна табла им се заканувал со такви известувања. Јанчев истакна дека директорот Амир Елези не ги исполнува законските услови да раководи со ваква установа, односно да биде директор. Истото поради фактот што Законот предвидува дека директорот мора да биде специјалист по трансфузиологија и да има работно искуство најмалку две години од областа на трансфузиологијата, додека пак актуелниот директор специјализирал рентген и го нема потребното искуство.
Беше изнесен и случај на искусна медицинска сестра со 38 години стаж во болницата во Неготино, која наместо да се награди за нејзината посветеност, била преместена на работно место со помала плата. На нејзиното место е поставена вработена со само неколкумесечен курс.
„Тоа е таа владина кадрова политика. Кога 38 години стаж и работно искуство е помалку од неколкумесечен курс и неискуство. Таа е таа владина кадрова политика која ја уништува Македонија“, потенцира Јанчев.