Македонија
Потребни се меѓусекторски услуги за рана интервенција кај децата – нова студија на УНИЦЕФ

Министерството за здравство, Министерството за труд и социјална политика, Фондот за деца при Обединетите нации (УНИЦЕФ) и партнерите се состанаа да дискутираат за наодите и препораките на нова студија, со која се разгледуваат услугите за интервенција во раното детство за деца со задоцнување во развојот и деца со попреченост.
Анализата на состојбата со рана интервенција кај децата во Северна Македонија прави увид во програмите и услугите што се на располагање во земјата. Меѓу другото, со студијата се истакнува дека поради фактот што на државно ниво скрининзите за развој во раното детство и услугите за интервенции во раното детство се ретки или воопшто не постојат, има голем број деца во ризични ситуации, со доцнење во развојот или попречености, кои воопшто не се евидентирани и кои не добиваат услуги.
„Првите години од животот се единствена можност да се обликува способноста на детето да учи, расте и целосно да придонесува во општеството, а притоа да се спречат можни доцнења во развојот и попреченост“, изјави Патриција ди Џовани, претставничка на УНИЦЕФ. „Доцнењето во развојот може да биде резултат на проблеми при пораѓањето, неадекватна стимулација, несоодветна исхрана, хронична болест, психолошка состојба и семејна состојба или некој друг фактор од средината. Затоа, меѓусекторски (т.е. во здравството, предучилишната возраст и во социјалната благосостојба) интегриран скрининг и поддршка за семејствата и децата е од клучна важност да им се помогне на децата да го остварат својот потенцијал“.
Со анализата на состојбата се потенцира дека во случаите кога на децата им се извршени скрининзи на развојот, родителите обично ја барале услугата и во поголем број случаи доцнела идентификацијата на доцнењето во развојот/попреченостите. Само 44 отсто од децата почнуваат да добиваат развоен скрининг пред да наполнат три години. Од наодите е јасно дека има потреба од систем за универзален развоен скрининг, процени и упатувања за децата и семејствата да добијат навремена поддршка.
„Идентификацијата на доцнење или попреченост во развојот на децата, како и последователните услуги, во голема мера зависат од здравствените работници (акушери, неонатолози, педијатри, семејни лекари, матични лекари, психијатри, патронажни сестри и др.) Затоа, Министерството дава континуирана поддршка во развој на сите сектори, со приоритет на примарната здравствена заштита“, рече министерот за здравство, Беким Сали.
Додека интервенциите во раното детство (познато и како рана интервенција кај децата) се обезбедуваат претежно преку здравствениот сектор, врз основа на потребата од услуги што се фокусирани на семејството и на децата, од состојбата се гледа дека има потреба од блиска меѓусекторска соработка на здравствениот сектор, социјалните служби, образованието во предучилишна возраст, детската заштита, како и неколку дисциплини кои се релевантни за овие сектори, како што се социјалната работа, психологијата и специјалната едукација.
„Реформите во социјалната заштита претставуваат влезна точка за сите стручни лица што работат во полето на попреченост за да може да придонесат за развојот на потенцијалите на детето и на капацитетите и вештините на семејството. Преку инвестиции во социјални услуги Министерството за труд и социјална политика ја гради мрежата на услуги и гарантира соодветен опфат“, изјави Јованка Тренчевска, министерка за труд и социјална политика.
Анализата на состојбата со раната интервенција кај децата во Северна Македонија, поддржана од УНИЦЕФ, беше спроведена со финансиската поддршка на Европската Унија во рамките на двогодишна иницијатива на регионалната канцеларија на УНИЦЕФ и на Генералниот директорат за соседство и преговори за проширување (DG NEAR). Целта на иницијативата е зајакнување на националните системи за здравство, образование, ран детски развој и детска заштита, со цел да се обезбеди континуитет на обезбедувањето на основните услуги за ранливите деца и нивните семејства во рамките на итниот и подолгорочен одговор за закрепнување од Ковид-19 во земјите на Западен Балкан и во Турција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Променливо облачно време повремено со пороен дожд и грмежи

Времето денес ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен западен, а долж Повардарието северен ветер, кој попладне наместа ќе засилува. Максималната температура ќе биде во интервал од 27 до 35 степени.
Во Скопје, променливо облачно, во претпладневните часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер.
Максималната температура ќе достигне до 33 степени.
Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.
Македонија
Ангелов на состанок во Берово: Планирање на акција за справување со пожарот над Русиново

Раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов, синоќа присуствуваше на координативниот состанок на Општинскиот штаб за заштита и спасување во Берово, предводен од градоначалникот Звонко Пекевски.
На работниот состанок се анализираа извештаите за движењето и интензитетот на пожарот во планината над селото Русиново. Како главни предизвици беа посочени променливиот ветер, остатоците од стари пожари – шупливи дрвја кои при горење паѓаат по стрмнините – како и непристапниот терен, што значително го отежнува гаснењето.
Според соопштението од ДЗС, состанокот траел подолго поради разгледување на повеќе стратегии за утринска интервенција. Се планира комбинирана акција со теренски сили, механизација и ангажман на воздухоплови, чија активност ќе се координира од земја во согласност со конкретните дневни услови.
Ова е дел од континуираните напори за справување со активните пожари во источниот дел на земјата.