Министерот за надворешни работи, Тимчо Муцунски, денеска во Брисел, на маргините на состанокот на министрите за надворешни работи на НАТО, оствари кратка, но продуктивна средба со американскиот државен секретар, Марко Рубио. Станува збор за нивна прва средба по неодамнешното именување на Рубио на оваа функција.

На средбата беа разменети мислења за актуелни прашања од заеднички интерес, како и за соработката на билатерално ниво и во рамките на НАТО Алијансата.

„Се согласивме за важноста од натамошно интензивирање на политичкиот дијалог на високо ниво. Следуваат многу заеднички иницијативи“, напиша министерот Муцунски во своите објави на социјалните мрежи.

Денеска, по иницијатива на претседателот на СДСМ, Венко Филипче се одржа прва средба со премиерот Христијан Мицкоски во Владата, на која беше разгледан предлогот за нов модел на политичка соработка насочена кон решавање на клучните прашања од интерес на граѓаните, што претседателот на СДСМ го презентираше вчера, информираат од партијата.

„Имавме добар и конструктивен состанок со премиерот. Јасно е дека до него стигна пораката, барањето на граѓаните за некаква форма на заедничка работа во сфери коишто се битни за подобрување на квалитетот на нашето живеење“, изјави Филипче по средбата.

На средбата начелно било договорено формирање заеднички тела или работни групи кои ќе работат на спроведувањето на реформската агенда, потенцираше Филипче. Првичниот фокус ќе биде на законите поврзани со правосудството, енергетиката и стратешките проекти во здравството, кои треба да стигнат во Собранието.

„Во следниот период ќе номинирам неколку експерти од областа на правосудството и енергетиката, кои ќе се вклучат во изработката на овие законски решенија“, нагласи Филипче, додавајќи дека ова е почеток на еден процес во кој ќе треба да се разработи методологијата на соработка.

Претседателот на СДСМ истакна дека во иднина очекува и другите политички партии да се приклучат на овој модел на соработка, потенцирајќи дека „мора да испратиме порака на обединување за доброто на државата“.

На средбата, Филипче и Мицкоски разговарале и за уставните измени поврзани со евроинтеграциите, каде што, според Филипче, постојат различни позиции.

„За ова останува да зборуваме понатаму“, рече тој.

Следен чекор по средбата треба да биде номинирање експерти во клучните области, а потоа создавање на прелиминарен модел на соработка кој би бил понуден и на останатите политички партии.

„Граѓаните треба да бидат свесни дека некој ги слуша нивните барања и дека тоа мора да биде насоката по која ќе одиме и во иднина“, порача Филипче.

Претседателот на Собранието Африм Гаши оствари средба со Ентони Белангер, генерален секретар на Меѓународната федерација на новинари (ИФЈ), на која беа разменети мислења за условите за работа на новинарите во земјава и беа разгледани можностите за нивно подобрување, во насока на унапредување на вкупните состојби во медиумската сфера во земјава.

На средбата присуствуваше и генералната секретарка на Собранието Марина Димовска, како и претседателот на Самостојниот синдикат на новинари и медиумски работници (ССНМ), Павле Беловски, и други претставници на оваа синдикална организација и на ИФЈ.

Гаши истакна на средбата дека ги смета медиумите за „четврта власт“, која може да влијае за поголема транспарентност, отчетност и одговорност на другите три власти. Односно, како што рече, секое подобрување на состојбите и на условите за работа во медиумската сфера е влог и во подобра власт.

Соговорниците посебно се осврнаа на предлог-измените на Законот за медиуми, кој веќе е во собраниска процедура и е ставен на дневен ред, во прво читање, на првата наредна нова седница на Собранието, следната недела. Притоа, беа изнесени сугестии за евентуални интервенции во текстот на предлог-законот, пред се во насока на подигнување на нивото на работничките права на новинарите и другите медиумски работници.

Гаши, исто така, ги истакна своите заложби за целосна слобода и независност на медимите, како и за целосна транспарентност и отвореност на Собранието кон јавноста. За таа цел, како што рече, меѓу другото е потребна и редовна комуникација со претставниците медиумите. Притоа, Гаши посочи и на чекорите што тековно се преземаат за што поголема транспарентност на законодавната власт.