„Првиот претседател на државата Киро Глигоров е еден од најголемите великани на современата македонска историја. Тој беше државник, визионер којшто ја водеше Македонија со многу ум, трезвено, најзаслужен за тоа што бевме единствени од сите поранешни републики на Југославија кои без војна и крвопролевање се изборивме за независност и меѓународно признавање”, истакнува градоначалникот на Општина Центар, Горан Герасимовски по повод одбележување на 13-годишнината од смртта на првиот претседател на Републиката, Киро Глигоров.

Герасимовски, потенцира дека поранешниот претседател Киро Глигоров е личноста што ги поврза двата столба на македонската државност – АСНОМ 1944 и 8-ми Септември 1991.

„По неговиот пат на соработка, на соживот, на градење мостови продолжуваме и ние, следните генерации. Како градоначалник правам сѐ за да го продолжиме неговиот аманет – да се грижиме за граѓаните, демократски да ја развиваме земјата и да вложуваме во подобра иднина. Со отворањето на основното училиште „Киро Глигоров” во Општина Центар, со едукација на младите за историјата и одење на патот којшто тој го зацрта продолжуваме да се грижиме за ликот и делото на првиот македонски претседател”, вели Герасимовски.

Глигоров бил добитник на бројни меѓународни награди и признанија – ценет и вреднуван за својата работа од целиот свет.

Една од негови најголеми мисли кои до ден денеска имаат силно значење: „Најголемото достоинство на нашиот народ е што го сочува мирот, што не влезе во никаква војна, што не носи никаква вина за се она што се случи и што го загрозува целиот свет”, пишуваат од Општина Центар.

„На прагот сме на новата година, време кога традиционално се осврнуваме на достигнувањата и предизвиците од изминатата година. Ова беше година на пресвртница за државата – година на промени кои донесоа значително подобрување на животот на граѓаните и успешно позиционирање на државата на меѓународната сцена“, истакнува министерот за надворешни работи и надворешна трговија, Тимчо Муцунски во новогодишната честитка додавајќи дека довербата од граѓаните била најголемиот поттик да се работи неуморно и да се претставуваат домашните предизвици пред светот.

„Во еден динамичен и предизвикувачки период, благодарение на вашата поддршка, работевме на градењето на посилна и стабилна позиција на меѓународен план. Вашата доверба беше најголем поттик да се работи неуморно во преставувањето на домашните позиции пред светот“, вели Муцунски.

Подвлекувајќи ја важноста на минатогодишните предизвици, тој ги споменува и најважните достигнувања од 2024 година и нагласува дека евроинтеграцијата, активниот придонес во НАТО Алијансата и партнерството со САД остануваат во фокусот и оваа година.

„Остваривме голем број билатерални средби, го зајакнавме меѓународниот углед на нашата држава, активно придонесувавме во меѓународните организации, развивме силни партнерства и достоинствено придонесувавме за глобалната политика, мир и безбедност. Чекорејќи по патот што успешно го трасиравме минатата година, во 2025 година ќе продолжиме да градиме партнерства, преку дијалог да бараме решенија на отворените прашања и со меѓусебна почит и разбирање да останеме кредибилен меѓународен партнер. Евроинтеграцијата и понатаму останува во фокусот, како и нашиот придонес во НАТО и цврстото партнерство со Соединетите Американски Држави“, истакнува тој.

По повод претстојните новогодишни празници, паркирањето во Општина Центар ќе биде без наплата за сите граѓани, соопшти ЈП Паркинзи Општина Центар.

„Согласно Одлуката на претпријатието, на 01.01.2025 година (среда) сите паркиралишта со кои стопанисува ЈП ПОЦ ќе бидат без наплата. Редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 02.01.2025 година (четврток) со вообичаено работно време“, се нагласува во информацијата.

Депото на „Пајак“ службата на ЈП ПОЦ ќе работи 24/7 за време на празниците како и паркиралиштето „Дилајла“ кое е со автоматска наплата.