Град Скопје ја почна есенската акција за зазеленување на градот, во чии рамки ќе бидат засадени 3.500 висококвалитетни листопадни садници на повеќе локации во сите скопски општини.

„Оваа есен приоритет е обновување на сите постојни дрвореди во градот и подигање нови во Ѓорче Петров и на Бит-пазар. Во Скопје по должината на градските сообраќајници и во средишните жардиниери на булеварите има речиси 500 пенушки (остаток од пресечено или паднато дрво), тие ќе бидат отстранети и на нивно место ќе се засадат нови здрави садници. Најголем број од пенушките што ќе бидат заменети се на булеварот Митрополит Теодосиј Гологанов, каде што ќе бидат заменети 49“, стои во соопшението на Град Скопје.

Како дел од заложбите на Градот за зазеленување на Скопје и зголемување на бројот на нови дрвја на јавните површини, оваа акција ќе влијае на подобрување на животната средина и ќе придонесе за зачувување на здравјето на граѓаните, велат оттаму. Во соопштението се додава дека градот исто така посветено работи на намалување на загадувањето и подобрување на животната средина со цел да се надомест изгубеното зеленило, да се зголемат парковите и дрворедите и да ги заштити сите јавни зелени површини во сите општини во градот.

Оваа есенска акција Град Скопје ќе ја реализира заедно со сите скопски општини, кои во неа ќе учествуваат со свои работници, механизација и садници, стои во соопштението.