Македонија
Првиот приватен универзитет АУЕ – ФОН со повеќе од 12.000 алумни
На свечена церемонија која се одржа вчера попладне, а на која присуствуваа бројни гости, беа доделени повеќе од 400 дипломи на студенти кои го заокружиле своето образование на АУЕ – ФОН.
Американскиот Универзитет на Европа – ФОН вчера попладне организираше свечено доделување на дипломи за студентите од прв и втор циклус на студии. На свечената церемонија, на која присуствуваа бројни гости, меѓу кои и претставници од дипломатскиот кор, повеќе од 400 студенти ги „фрлија“ капите, заокружувајќи дел од своето професионално образование стекнато на првиот приватен универзитет во државава, основан во 2003 година.

„Американскиот Универзитет на Европа – ФОН во изминативе две децении континуирано инвестираше во современи студиски програми со цел преку образовниот процес да одговори на динамичните потреби на пазарот на трудот и зголемување на степенот на вработливост на нашите дипломирани студенти. Универзитетот стави фокус на иновации во моделите за изведување на наставата и наставните методи, интерактивно учење, нови лаборатории, модерни и технички опремени простории за да обезбедиме соодветен одговор на развојните потреби на општеството и економијата. Нашите студенти ги имаат сите можности за квалитетно високо образование, стекнувајќи сè со знаење и вештини, при што со својот интелектуален капацитет придонесуваат за унапредување и развој на државата“, изјави основачот и генералниот директор на Американскиот универзитет на Европа – ФОН, м-р Сефер Цаноски на свечената церемонија на којa им порача на дипломците дека треба да веруваат во себе и да целат да ги остварат своите соништа. При тоа, тој упати уверување дека вратите на Универзитетот ќе бидат секогаш отворени за нивно професионално доусовршување, особено со новите акредитации на студиски програми во САД, како и со двојните дипломи од реномирани универзитети од Европа.
Заменик – директорката на АУЕ – ФОН проф. д-р Александра Србиновска – Дончевски пред присутните дипломци, честитајќи им на нивниот успех рече дека е исклучително горда на институцијата која како прв приватен Универзитет во државата одбележува 20 години постоење и 17 генерации по ред на дипломци, специјалисти и магистри и повеќе од 12 000 алумни.

“Денес го славиме успехот кој нема граници, како што велеше и нашиот Тоше Проески. Запаметете, Вашата вредност како личност никогаш нема да се мери според парите кои што ќе ги заработувате, ниту пак според бројот на признанијата кои ќе ги добиете. Вашиот успех ќе се мери само според делата кои ги правите и начинот на кој што ги спроведувате во Вашиот личен и професионален развој“, додаде Србиновска – Дончевски која им ги врачи сертификатите на првата генерација на експерти за сајбер безбедност во Македонија, кои што завршија обука како дел од неформалното образование кое што го овозможува Универзитетот, заедно во соработка со ThriveDx од Израел.
Ректорката на Американскиот универзитет на Европа – ФОН, проф. д-р Билјана Пулеска Јанушевска во своето обраќање пред дипломците рече дека сите тие се стекнале со проширени, продлабочени знаења и професионална компететивност за научното поле за кое се определиле.

„Научивте како да го примените знаењето, научивте систематски и креативно да решавате комплексни проблеми од областа; сега веќе умеете и критички да пристапувате кон решавањето нови и мултидисциплинарни проблеми. Сега е ред да преземете одговорност за сопственото професионално усовршување, критички препознавајќи ги личните потреби за понатамошно учење. Со ова знаење, квалитети, компетенции и вештини, вие сте овластени да барате нови можности со уверување дека можете да придонесете за подобрување на целокупната заедница. Сега имате алатки со кои поинаку ќе пристапите на вашата работа за поголема ефикасност и продуктивност. Тоа е моќта на високото образование“, потенцираше ректорката Пулеска Јанушевска.
По свечената церемонија на доделување на дипломи како дел од програмата за одбележување на успехот на дипломците, но и успехот на АУЕ – ФОН кој годинава со низа настани и активности одбележува 20 години од своето основање, свој настап имаше бендот на нашиот Тоше Проески со цел да ги мотивира сите млади дека само со посветеност, мотивираност и работа можат да се остварат своите соништа и цели во животот.
ПР ТЕКСТ
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ реагира: Ако СДСМ не ја краделе државата, минималната плата денес ќе беше и повисока
Предлог-законот на СДСМ за минимална плата од 600 евра е доказ дека доколку не ја краделе државата додека биле на власт, работниците денес ќе имале и повисока минимална плата, соопштуваат од ВМРО-ДПМНЕ.
Од партијата наведуваат дека СДСМ денес поднеле предлог-закон со кој се предвидува минимална плата од 600 евра и дека во истиот навеле дека за таа мерка се потребни околу 7,5 милијарди денари, односно околу 110 милиони евра, но не објасниле од каде би се обезбедиле тие средства.
Според ВМРО-ДПМНЕ, добрата страна на предлог-законот е што, како што велат, покажува дека СДС имале можност во минатото да ја зголемат минималната плата и до 600 евра, но тоа не го направиле.
Во реакцијата се наведува и дека доколку не била дозволена злоупотреба на околу 170 милиони евра државни пари за набавка на, како што велат, канцероген мазут со кој бил загадуван воздухот, работниците денес можеле да имаат и повисока минимална плата, можеби и од 700 евра.
Од ВМРО-ДПМНЕ дополнуваат дека СДСМ и ДУИ, според нив, наместо да работат во интерес на граѓаните, гледале како да ја ограбат државата и да си ги наполнат сопствените џебови.
Македонија
Променливо облачно со повремен дожд: снег на планините и заладување во недела
Утре времето ќе биде променливо облачно, со слаб повремен локален дожд, а на планините и на повисоките места со слаб снег. Ќе дува слаб до умерен ветер од променлив правец. Минималните температури ќе се движат од 0 до 6 степени, а максималните од 7 до 11 степени.
Во Скопје ќе преовладува променливо облачно време со повремен слаб дожд. Минималната температура ќе се спушти до 5 степени, а максималната ќе достигне до 10 степени.
Во наредните денови продолжува периодот на променливо облачно време со повремени врнежи од дожд, а на планините од снег. Пообилни врнежи се очекуваат во недела, кога дождот ќе преминува во снег и во дел од пониските места.
Македонија
Јаневска: Македонија доби 8,2 милиони евра од ЕУ за спроведување на ЕРАЗМУС програмата во 2026 година
За спроведување на ЕРАЗМУС + програмата на Европската комисија наменета за образование, обука, млади и спорт, Македонија годинава доби најголем буџет откако во истата учествува како програмска земја. Со речиси 8,2 милиони евра ќе се финансираат заеднички проекти на македонските образовни установи, институции и граѓански организации со партнери од земјите во ЕУ, како и кратки истражувачки и студиски посети.
Можностите за вмрежување, приоритетните области, постапката за изработка и роковите за аплицирање со проекти денес беа претставени на конференција на Економскиот факултет при Универзитетот „Св. Кирил и Методиј“ во Скопје. Во присуство на ректори на јавните и приватните високообразовни установи во државава, претставници на училишта, граѓански здруженија и други потенцијални корисници на средства во рамки на ЕРАЗМУС програмата, се обратија претседателот на Владата, Христијан Мицкоски, министерката за образование и наука Весна Јаневска и директорката на Националната агенција за европски образовни програми и мобилност, Ана Михајлов.
На конференцијата беше посочено дека во фокусот на програмата се младите, односно јакнење на нивното знаење и вештини во границите на ЕУ, со кои потоа ќе придонесат за развој на сопствената држава.
Министерката Јаневска смета дека и оваа година ќе има ефикасна искористеност на можностите, затоа што државата има зајакната законска основа во која задолжителни компоненти се мобилноста, европската димензија и меѓународната соработка, зајакнати се и капацитетите на Националната агенција каде има ново раководство и добра внатрешна структура, а воедно и МОН како национален авторитет ги засилува механизмите за контрола на целиот процес за спроведување на програмата ЕРАЗМУС.
Таа ги повика заинтересираните кандидати да ги разгледаат можностите и со свои проекти да аплицираат на повиците за распределба на средства, што Националната агенција ќе ги објави на 19 февруари, односно на 5 март.
Македонија е дел од ЕРАЗМУС програмата уште од нејзиното воведување од страна на Европската комисија во 2014 година, кога буџетот изнесуваше 3,5 милиони евра.

