Македонија
Првпат воспоставен електронски регистар за ретки болести

Во рамките на електронскиот здравствен систем на Министерството за здравство е активиран регистарот на лица со ретки болести. Овој електронски модул со податоци ги содржи сите основни информации за пациентите заболени од ретки болести, нивната дијагноза, потребната терапија, соодветната клиниката на која се лекуваат, како и лекарот што ги лекува, информира Министерството за здравство.
Секој лекар од јавните здравствени установи, кој лекува пациент со ретка болест, има увид само за пациентите што ги лекува, како и увид и целосна евиденција за пропишаната терапија.
Регистарот, кој досега беше во форма на листа на лица со ретки болести во хартиена форма, се трансформира во современ регистерски код по кој се препознава секој регистриран пациент со ретка болест во и надвор од границите на Република Македонија во согласност со Законот за евиденции во областа на здравството. На ваков современ начин, по донесениот предлог за потребата од внесување нов пациент, се поедноставува процедурата за запишување преку електронско пријавување извршено од стручниот колегиум на соодветната универзитетска клиника.
Евиденцијата е веднаш видлива за сите членови на Националната стручна комисија за ретки болести, која треба да постапува во согласност со деловникот за работа на Комисијата, односно Националната стручна комисија за ретки болести добива директна можност за следење и одобрување на терапијата, можност за зголемување или намалување на терапијата по вид на лек и доза, сè во зависност од спроведената евалуација и здравствената состојба на пациентот, како и од покажаните ефекти од терапијата.
Истовремено, се воспоставува и целосна евиденција на издавањето на лековите за пациентите со ретки болести преку вклучување на болничките аптеки при универзитетските клиники каде што се лекуваат пациентите, како и целосна евиденција на количината подигнати лекови од пациентите и на расположливите количини лекови набавени во согласност со Програмата за лекување пациенти со ретки болести во болничките аптеки, како и во веледрогериите со кои се склучени договори за набавка. Модулот овозможува контрола на примањето на лекот за ретка болест по вид на лек, серија на лек и производител и рок на траење, по датум на издавање, препорачана доза на примање.
Модулот има систем за заштита на пристап до податоци во согласност со важечките прописи, подлежи на највисоки мерки на софтверска и физичка безбедност во согласност со Законот за заштита на личните податоци, како и правилниците за технички и организациски мерки за заштита на личните податоци.
На овој начин Министерството за здравство ќе има увид во секој момент со расположливата количина на лековите со кои јавните здравствени установи располагаат, со што би се намалил ризикот за дефицит на потребниот лек за ретки болести. Платформата е активна од денеска, 30 август 2018 година, и содржи податоци за сите досега регистрирани пациенти заболени од ретки болести.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Чаир ќе добие Младински центар, дом на младински идеи и иновации

Кандидатот на коалицијата ВРЕДИ за градоначалник на Општина Чаир, Изет Меџити и кандидатот за општински советник, Аритон Рама, денес го претставија еден од клучните приоритети на изборната програма, изградбата на Младинскиот центар, проект кој има за цел да им го овозможи на младите просторот кој им недостига за развој, креативност и иновации.
„Со задоволство го претставувам еден од најзначајните и најдрагите проекти за мене лично, Младинскиот центар на Чаир, проект кој ја претставува мојата визија за еден модерен, напреден и кон иднината ориентиран Чаир. Чаир располага со големо младинско богатство, талентирани млади девојки и момчиња со исклучителен потенцијал, кои заслужуваат повеќе од зборови – заслужуваат можности, поддршка и простор за развој. Затоа изградбата на Младинскиот центар ќе биде апсолутен приоритет на мојот мандат како градоначалник. Ова не е само физички објект, туку платформа каде нашата младина ќе може да учи, да создава, да се изразува и активно да ја гради својата иднина“, изјави Меџити.
Кандидатот за советник, Аритон Рама, во својата изјава ги опиша деталите за просториите кои ќе ги поседува овој објект:
Младинскиот центар ќе биде изграден на четири функционални нивоа:
-Библиотека и сала за предавања – за учење, истражување и културни настани.
-Дигитален центар – со лабораторија за вештачка интелигенција, бесплатни
обуки по програмирање и дигитална писменост, како и простор за стартапи и младинско менторство.
-STEM академија – која ќе нуди обуки во областа на технологијата, науката, уметноста и математиката.
-Простории за театар, советување и креативни активности, каде што младите ќе можат слободно и без бариери да се изразуваат.
Меџити и Рама потенцираа дека со овој проект гарантираат дека Чаир ќе стане центар на иновации, образование и младинска креативност. Младите ќе имаат место каде ќе учат, ќе се развиваат и ќе ја градат својата иднина.
Македонија
(Видео) ЗНАМ ги претстави целите за спортот во Куманово од програмата за идниот мандат

Движењето ЗНАМ – За Наша Македонија денеска пред медиумите ги претстави зацртаните цели за спортот во Куманово од програмата за идниот четиригодишен мандат.
Куманово е град кој отсекогаш пулсирал со спортски дух. Од салите и игралишта произлегле генерации талентирани спортисти, шампиони и идоли на младите. Градот кој ги изнедри освојувачите на олимписки медали и светски европски шампионати, Аце Русевски, Реџеп Реџеповски, Бранимир Јовановски и многу други, повторно ќе раѓа нови спортски јунаци.
„Тоа се наши херои кои со гордост го носеле името на градот и на државата на Олимпијадите и на светските натпревари. Овде спортот не е само рекреација или натпревар, туку начин на живот – симбол на заедништво, борбен дух и гордост за целиот град. Во изминатите осум години докажавме дека знаеме да вложуваме во спортот и младите. Го реконструиравме најголемиот спортски објект во градот – Спортската сала, која денес е целосно обновена со професионален под по ФИБА стандарди, со модерно озвучување, осветлување, семафори и нови реквизити. Сала која е вистински дом за нашите спортисти и инспирација за новите генерации“, изјави кандидатот за советник од листата на Движењето ЗНАМ, Синиша Филиповски.
Во претходниот период изградени се и обновени спортски игралишта во повеќе населби, создадени се услови за стотици деца и млади за секојдневно да тренираат, да се развиваат и да растат во здраво опкружување. Поддржани се повеќе од педесет спортски клубови, организирани се стотици спортски настани.
Во следниот период, рече Филиповски, ќе се вложи уште повеќе во:
• Нови спортско-рекреативни комплекси и модерни игралишта во сите делови на градот.
• Велосипедски и трим-патеки, street workout зони и адреналински парк за младите.
• Проширување на програмите за стипендии и награди за талентирани спортисти и ученици.
• Услови за спорт и рекреација во секое училиште, со функционални сали, уредени дворови и училници на отворено.
Понатаму, потенцираше тој – целосно ќе се реконструира храмот на спортот Соколана – проект кој веќе е во тек. Ќе се постави и нов систем за греење и ладење за Спортската сала А, ќе се направи и реконструкција на спортскиот комплекс во поранешниот Дом на АРМ со мултифункционално игралиште, опрема и трибини. Дополнително, планирана е обнова и доопремување на спортските сали во повеќе училишта во градот и околните места што и припаѓаат на општината. Нашата заложба, нагласи Филиповски, е спортот да биде достапен за сите – за децата, за младите, за професионалците и за постарите генерации. Спортот обединува, гради тимски дух и нè учи на фер игра.
Куманово заслужува спортска инфраструктура која ќе одговара на неговиот потенцијал, спортски клубови кои ќе растат и ќе се натпреваруваат со најдобрите, генерации што ќе израснат здрави, дисциплинирани и горди на својот град. Куманово е и ќе остане град на спортот. Тоа е визијата, но и цел и обврска во истовреме.
Македонија
(Видео) Шукова од Кисела Вода: Имаме решенија загадувањето да не биде зимска судбина за Скопје

Кандидатката за Градоначалничка на Град Скопје од СДСМ, Каја Шукова, денеска при посетата на општина Кисела Вода ја претстави програмата за справување со загадувањето на воздухот, со посебен фокус на решавање на проблемот со затоплувањето во домаќинствата.
Таа истакна дека над 50% од загадувањето и понатаму потекнува од индивидуалните домаќинства кои се греат на дрва, јаглен или други цврсти горива.
„Ако сакаме да го намалиме загадувањето на воздухот, мораме конкретно да им помогнеме на домаќинствата. Затоа, Градот ќе обезбеди субвенции за сите граѓани кои повторно ќе се приклучат на централното греење, како и за новите семејства што ќе се вклучат во системот,“ додаде таа.
Шукова нагласи дека програмата на СДСМ предвидува серија мерки, кои се поделени на краткорочни, среднорочни и долгорочни решенија, а две од нив се особено важни за зимскиот период што следува:
• Директна финансиска поддршка за приклучување на постојната мрежа за централно греење;
• Помош и поддршка за најранливите категории граѓани, за тие да добијат еколошко и безбедно решение за затоплување.
Сакаме процесот да биде едноставен, транспарентен и брз — без бирократски пречки. Секое домаќинство треба да има јасна постапка и поддршка од градот,“ нагласи Шукова.
Во рамките на програмата, Градот ќе обезбеди и чистење и одржување на оџаците, како и 5000 бесплатни филтри секоја година за домаќинствата кои се загреваат на цврсти горива, со цел намалување на ПМ честичките во воздухот.
„Загадувањето во Скопје не смее да биде зимска судбина. Таму каде што има централно греење, ќе воведеме забрана за користење дрва и јаглен, затоа што тоа е директна инвестиција во здравјето на сите скопјани,“ изјави таа.
Шукова додаде дека оваа политика е пред сè здравствена и еколошка, а не само енергетска мерка:
„Чистиот воздух не е луксуз, тоа е основно право на секој граѓанин. Со модернизација на топлификацискиот систем и заедничка акција на сите општини, ќе обезбедиме Скопје конечно да дише чист воздух.“
Посетата на општина Кисела Вода е дел од низата теренски активности на кандидатката Шукова, каде таа непосредно се среќава со граѓаните и ги претставува конкретните решенија од својата програма за почисто, зелено и здраво Скопје.