Македонија
Превезени над 3 милиони патници на двата македонски аеродрома

Министерот за транспорт и врски, Благој Бочварски, денеска го посети генералниот директор на „ТАВ Македонија“, Неџат Курт, и му додели благодарница за особен придонес за развојот на авиосообраќајот и за успешна организација на министерскиот самит на ОБСЕ, кој месецов се одржа во Скопје.
Над 3 милиони патници патувале преку двата македонски аеродрома – Меѓународниот аеродром „Скопје“ и аеродромот „Св. апостол Павле“ во Охрид – од 1 јануари заклучно со 16 декември 2023 година, објави „ТАВ Македонија“, подружница на „ТАВ аеродроми“.
Ова е важно достигнување за двата македонски аеродрома бидејќи го означува закрепнувањето на авиосообраќајот и на патничкиот сообраќај по пандемијата надминувајќи ги нивоата од 2019 година, која се смета за референтна година во авијацијата, и ова е првпат 3 милиони патници да бидат опслужени заедно на двата аеродрома во една година.
„Како ТАВ среќни сме што одбележуваме ваков успех не само за двата аеродрома туку и за македонската авијација. Достигнувањето 3 милиони патници пред крајот на 2023 е огромен успех, особено по пандемијата, која имаше огромно влијание општо врз авијацијата. Овој успех ја покажува и докажува нашата посветеност на обезбедување услуги со врвен квалитет за нашите патници и исто така е показател дека луѓето се подготвени да патуваат и дека сега тие повеќе од кога било имаат доверба за патувања со авион со оглед на ефикасноста и удобноста. Покрај тоа, ние како ‘ТАВ аеродроми’ сме повеќе од горди со статистиката на бројот на патници. Имено, статистиката покажува врв во 2019 година со речиси 2,7 милиона патници, потоа несреќен остар пад поради здравствената криза и ограничувањата за патување, а сега во 2023 година повторно се враќаме назад и успеавме дури и да ја надминеме 2019 година со 20 %. Ова достигнување дополнително ќе нѐ води и ќе нè инспирира да продолжиме да се стремиме кон нови рекорди. Ова е причината зошто ќе продолжиме да ги приспособуваме и подобруваме нашите услуги и да ги зголемуваме капацитетите на аеродромите за да бидеме подготвени да ги пречекаме нашите патници“, изјави Неџат Курт, генерален директор на „ТАВ Македонија“.
„Како и во сите земји во светот, ковид-пандемијата негативно влијаеше врз авиосообраќајот и во нашата земја. Но тие состојби ги надминавме и денеска можеме да бидеме горди заедно со ‘ТАВ Македонија’ бидејќи имаме нови рекорди на превезени патници. Три милиони патници е бројка што ветува континуиран развој на авиосообраќајот. Владата гледа на ТАВ како партнер во креирање нови политики и развој на авиосообраќајот во Северна Македонија. Верувам дека вака поставените политики ги оправдаа плановите на Министерството, а тоа се воспоставување нови дестинации за граѓаните, како и зголемување на бројот на туристи. Крајната цел е да имаме квалитетен и безбеден авиосообраќај“, изјави Благој Бочварски, министер за транспорт и врски.
Најуспешната година за аеродромскиот оператор досега беше 2019, со 2,7 милиона патници, а 2022 беше завршена со 2,4 милиона патници. Сепак, 2023 ќе биде забележана како година со постојан над 30 % годишен пораст во споредба со 2022, особено со оглед на тоа што вкупната бројка на патници од 2022 година беше постигната со крајот на септември 2023.
За да се подобри квалитетот на аеродромските услуги и патничкото искуство да биде на највисоко ниво, ТАВ континуирано инвестира во аеродромската инфраструктура, како што беше и последната инвестиција од 2,4 милиона евра во надградба на системот за ракување со багажот со најновата технологија „Стандард 3“.
Поради успешната година во авиосообраќајот, министерот за транспорт и врски, Благој Бочварски, денеска го посети генералниот директор на „ТАВ Македонија“, Неџат Курт, и му додели благодарница за особен придонес на ТАВ кон развојот на македонскиот авиосообраќај и за успешното управување со специјалните летови за време на одржувањето на министерскиот самит на ОБСЕ овој месец.
„ТАВ Македонија“, подружница на „ТАВ аеродроми“, членка на Групацијата АДП, за периодот од 1 јануари до 16 декември 2023 година опслужи над 3 милиони патници (вкупно 3.007.993 патници), кои патувале преку двата аеродрома, Меѓународниот аеродром „Скопје“ и аеродромот „Св. апостол Павле“ во Охрид, што е зголемување од 32 % воспоредба со 2022 година и 17 % зголемување во однос на референтната 2019 година. Бројот на летови на двата аеродрома во истиот временски период е 22.932 лета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Чизмите им останале заглавени во стопен шеќер, повредени неколку пожарникари, пожарот во „Винчини“ под контрола

Неколку пожарникари се здобиле со изгореници на стапалата додека го гаснеле големиот пожар во фабриката „Винчини“. Тие се заглавиле во смола од стопен шеќер во еден од погоните, а во обид да се одглават, нивните чизми останале заглавени и згазнале во стопената смеса. Пожарот е ставен под целосна контрола.
Директорот на Дирекцијата за заштита и спасување (ДЗС), Стојанче Ангелов, соопшти дека огнените јазици зафатиле три производни линии означени како 6, 7 и 8, од кои два магацини.
„Сите три погони имаа сончеви панели на покривот и се целосно опожарени. Благодарение на навремената интервенција на пожарникарите, спасени се линиите од 1 до 5. Во гаснењето учествуваа екипи од Виница, Македонска Каменица, Делчево, Кочани, Пробиштип, Штип, Струмица, Кавадарци и Велес. Пожарот е ставен под целосна контрола и нема опасност од негово ширење“, изјави Ангелов.
Според информациите, спасени се и дел од магацините со готови производи и суровини, со што спречена е поголема материјална штета.
Од Центарот за управување со кризи (ЦУК) првично информираа дека пожарот во фабриката позната под брендот „Винчини“, бил пријавен во 18:40 часот преку единствениот број за итни случаи – 112.
Пожарот, како што информират оттаму, избувнал во магацините и во производствените погони 6, 7 и 8 на фабриката, по што на терен веднаш излегле екипите на ТППЕ Виница со неколку противпожарни возила и пожарникари.
На нив на помош веднаш им дојдоа колеги од кочанската противпожарна единица и од Доброволното протипожарно друштво (ДПД) Кочани, а беа издадени насоки до градоначалникот на Виница да побара дополнителна поддршка и помош од соседните општини.
Македонија
Уште колку ќе молчите за трагедијата во „Пулс“, прашаа блиските на жртвите

Родителите на младите кои трагично загинаа во пожарот во дискотеката „Пулс“ денеска по 21 пат излегоа на улиците на Кочани, барајќи правда и побрза реакција од институциите.
Протестниот „Марш за ангелите“ повторно ја помина добро познатата траса – од „Паркот на револуцијата“, покрај Трговскиот центар, Општината, Управата за јавни приходи и полициската станица, сè до Основниот суд и Обвинителството.
Од таму, роднините се обратија директно до судиите и обвинителите, потсетувајќи дека веќе три месеци се чека на оценка на обвинителниот акт.
„Одолговлекување без оправдана причина е спротивно на законот и претставува основ за реакција од страна на оштетените и јавноста. Ние ве прашуваме – постои ли рок во кој Советот мора да донесе одлука? Ако не постои, барем кажете кога може да се очекува завршување на оваа постапка“, изјави Розета Џамова, сестра на една од жртвите.
Протестот се одржа само еден ден откако Обвинителството ја прошири истрагата за трагедијата во „Пулс“. Поднесено е ново обвинение против реалниот сопственик на агенцијата за обезбедување „Рубикон Секјурити Солушн“, кој се товари за тешки дела против општата сигурност поради сериозни пропусти во организацијата и мерките за заштита во дискотеката.
Обвинителството до Основниот кривичен суд Скопје достави и предлог за продолжување на сите претходно определени мерки за обезбедување присуство на обвинетиот.
Со ова, случајот „Пулс“ добива нова димензија, додека семејствата на жртвите продолжуваат да бараат одговорност и правда – јавно, гласно и упорно.
Македонија
Петровска откри зошто декласификацијата предизвикува нервоза кај власта

Пратеничката од СДСМ, Славјанка Петровска, изјави дека барањето за целосна декласификација на документите предизвикало паника и нервоза кај власта, која наместо да одговори транспарентно – се обидела да се претстави како жртва.
„Приоритет е целосна декласификација на документите за да се обезбеди транспарентност и граѓаните да добијат одговори на стотиците прашања што се поставуваат. Најавата за целосна декласификација предизвика нервоза кај оние кои сакаа да се прикажат како жртви, затоа што ќе бидат објавени информации кои можеби нема да им се допаднат“, изјави Петровска во гостување во „Дневник“ на Сител телевизија.
Таа потсети дека претседателот на комисијата, Скендер Реџепи, го поднел барањето за безбедносен сертификат уште кон крајот на 2024 година, но шестмесечниот рок одамна е пробиен.
„Тоа отвора сериозни прашања за законитоста на надзорот“, додаде Петровска.
Пратеничката истакна и дека неколку пати биле закажувани и откажувани седници на кои требало да претседава Реџепи, а потоа тој самостојно закажал седница, што според неа создало негативен впечаток за работата на Собранието.
„Надзорот мора да биде јавен, пред медиумите и граѓаните, со јасна одговорност од сите. АНБ не е сопственост на ниту една партија, туку столб на државата. Реформите мора да продолжат, но со вклучување на експерти, академската заедница и невладини организации“, нагласи Петровска.
Таа посочи дека Собранието нема истражна функција и пратениците мора да внимаваат да не ја попречуваат предистрагата.