Македонија
Премиерот Заев се сретна со кувајтскиот амбасадор Ал-Атики

Претседателот на Владата, Зоран Заев, придружуван од министерот за здравство, Венко Филипче, се сретна со Јакуб ал-Атики, амбасадор на Државата Кувајт за Република Северна Македонија, придружуван од делегација од Амбасадата, со седиште во Софија.
На средбата се изразени честитки за решенијата на билатералните прашања на Република Северна Македонија со соседите, на што се гледа како на отворени можности за напредок и перспективна иднина на нашата држава.
Во таа насока разговарано е за интензивирање на економската соработка помеѓу Република Северна Македонија и Државата Кувајт и се разгледани можностите за олеснување на комуникацијата и движењата на претставниците на стопанските комори и бизнис-заедниците на двете држави, како и на граѓаните.
Амбасадорот Ал-Атики соопшти дека има заинтересираност од страна на приватниот сектор во Кувајт за соработка со приватниот бизнис-сектор во нашата држава, со оглед дека ваква соработка веќе се реализира со земјите од регионот.
Најавена е и донација од Кувајт за медицинска опрема во здравството кај нас.
Премиерот Заев се заблагодари за интересот за соработка со нашата држава и изрази политичка волја за поддршка на развојот на билатералните односи.
„Ова е време на сериозни исчекори во интеграциите на Република Северна Македонија, што веќе дава резултати во растот на економијата и подобрување на животниот стандард на граѓаните. За нас се од голема важност инвестициите, кои значат нови работни места и повисоки плати, а веќе се бележат растечки трендови на зголемувања на платите и намалување на невработеноста. Сето тоа е резултат на посветеноста на Владата да обезбеди економски развој преку интеграциските процеси, обезбедување владеење на правото и посветеноста кон развој на капацитетите на институциите“, рече, меѓу другото, премиерот Зоран Заев на средбата со кувајтскиот амбасадор Јакуб ал-Атики.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почина Панчо Минов, поранешен пратеник и градоначалник на Кавадарци

На 67-годишна возраст денеска почина Панчо Минов, поранешен градоначалник на Кавадарци и поранешен пратеник во Собранието.
Панчо Минов беше дипломиран правник и политичка фигура со повеќедецениско искуство. Тој два пати беше избран за градоначалник на Општина Кавадарци – прво како кандидат на Либералната партија (2000–2005), а потоа како независен кандидат (2005–2009).
Минов имаше и пратеничка кариера, учествувајќи во повеќе состави на Собранието.
Првпат беше избран во првиот повеќепартиски состав (1990–1998), а подоцна повторно стана пратеник преку ГРОМ (2016–2020) и СДСМ (2020–2024).
Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.