Македонија
Пренџов: Членот на Судски совет, Чачарова-Илиевска освен што била правна советничка на Заев, била и партиски донатор

На денешната собраниска седница на која се дискутира за интерпелациите на членовите на Судски совет, пратеникот од ВМРО-ДПМНЕ, Љупчо Пренџов кажа дека членката на Судскиот совет, Тања Чачарова-Илиевска јавно кажала дека нема да присуствува на собраниската седница, за јавноста да не се сомнева дека била во Дубаи на отворање на 82-катницата од страна на поранешниот премиер Зоран Заев.
Пренџов нагласи дека за разлика од другите членови на Судскиот совет, таа била истакната како личен адвокат на Зоран Заев.
„Таа е посочена како личниот адвокат на Заев. Се започна во 2017 кога на чело на судските реформи се стави нејзиниот другар и поранешен премиер Зоран Заев, година и пол, две, беше на чело на тие судски реформи, за тој период, двете мерки си ги избриша видео снимките од обвинителството, сите обвиненија му се тргнаа и кога си обезбеди правна сигурност и заштита, се повлече и ги остави тие судски реформи да ги прават Бујар Османи и компанија, па имавме план 3-6-9, но Чачарова-Илиевска била вклучена во сите планови’’, истакна Пренџов.
Тој потенцираше дека судството и Судскиот совет, не било независно бидејќи таа била донесена за член на Судски совет откако претходно била советничка на екс премиерот Зоран Заев.
„Случајно поранешниот премиер Зоран Заев, случајно ја поканил да му биде советничка, бидејќи таа била некој правен авторитет, за којшто само тој и кланот Заеви претходно имале слушнато и така таа дошла во неговиот кабинет правно да го советува, некое време додека не направи простор во Судскиот совет за да стане член’’, рече Пренџов.
Пратеникот додаде дека таа не била само адвокат личен на Заев, туку била и донатор на СДС.
„Случајно, неколку пати донирала пари во СДС. Во 2018, донирала 5540, па 7500, 5600, па потоа дала 16000, па 7500, па потоа донирала нови 17200 денари и така натаму. Луѓе кои донирале пари во СДС, од ова собрание биле гласани како независни експерти, како правни величини и како луѓе коишто требаше да донесат право и правда во Македонија“, заклучи Пренџов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и топло време со температури до 34 степени, попладне краткотраен дожд

Синоптичарите за денеска најавуваат сончево и топло време со слаб до умерен ветер од северен правец. Попладне во планинските региони ќе има услови за краткотраен дожд и ретки грмежи.
Минималната температура ќе биде во интервал од 5 до 16, а максималната ќе достигне од 27 до 34 степени.
Во Скопје, слично време со мала до умерена облачност попладне. Ќе дува слаб до умерен северен ветер. Минималната температура ќе се спушти до 13, а максималната ќе достигне до 34 степени.
Топлото време ќе се задржи и следните денови. Во понеделник во попладневните часови во планинските региони ќе има услови за краткотраен дожд и ретки грмежи и ќе дува слаб до умерен северен ветер, којшто веќе од вторник ќе го промени правецот во јужен. Од четврток веќе се очекува извесно зголемување на облачноста.
Македонија
Чизмите им останале заглавени во стопен шеќер, повредени неколку пожарникари, пожарот во „Винчини“ под контрола

Неколку пожарникари се здобиле со изгореници на стапалата додека го гаснеле големиот пожар во фабриката „Винчини“. Тие се заглавиле во смола од стопен шеќер во еден од погоните, а во обид да се одглават, нивните чизми останале заглавени и згазнале во стопената смеса. Пожарот е ставен под целосна контрола.
Директорот на Дирекцијата за заштита и спасување (ДЗС), Стојанче Ангелов, соопшти дека огнените јазици зафатиле три производни линии означени како 6, 7 и 8, од кои два магацини.
„Сите три погони имаа сончеви панели на покривот и се целосно опожарени. Благодарение на навремената интервенција на пожарникарите, спасени се линиите од 1 до 5. Во гаснењето учествуваа екипи од Виница, Македонска Каменица, Делчево, Кочани, Пробиштип, Штип, Струмица, Кавадарци и Велес. Пожарот е ставен под целосна контрола и нема опасност од негово ширење“, изјави Ангелов.
Според информациите, спасени се и дел од магацините со готови производи и суровини, со што спречена е поголема материјална штета.
Од Центарот за управување со кризи (ЦУК) првично информираа дека пожарот во фабриката позната под брендот „Винчини“, бил пријавен во 18:40 часот преку единствениот број за итни случаи – 112.
Пожарот, како што информират оттаму, избувнал во магацините и во производствените погони 6, 7 и 8 на фабриката, по што на терен веднаш излегле екипите на ТППЕ Виница со неколку противпожарни возила и пожарникари.
На нив на помош веднаш им дојдоа колеги од кочанската противпожарна единица и од Доброволното протипожарно друштво (ДПД) Кочани, а беа издадени насоки до градоначалникот на Виница да побара дополнителна поддршка и помош од соседните општини.
Македонија
Уште колку ќе молчите за трагедијата во „Пулс“, прашаа блиските на жртвите

Родителите на младите кои трагично загинаа во пожарот во дискотеката „Пулс“ денеска по 21 пат излегоа на улиците на Кочани, барајќи правда и побрза реакција од институциите.
Протестниот „Марш за ангелите“ повторно ја помина добро познатата траса – од „Паркот на револуцијата“, покрај Трговскиот центар, Општината, Управата за јавни приходи и полициската станица, сè до Основниот суд и Обвинителството.
Од таму, роднините се обратија директно до судиите и обвинителите, потсетувајќи дека веќе три месеци се чека на оценка на обвинителниот акт.
„Одолговлекување без оправдана причина е спротивно на законот и претставува основ за реакција од страна на оштетените и јавноста. Ние ве прашуваме – постои ли рок во кој Советот мора да донесе одлука? Ако не постои, барем кажете кога може да се очекува завршување на оваа постапка“, изјави Розета Џамова, сестра на една од жртвите.
Протестот се одржа само еден ден откако Обвинителството ја прошири истрагата за трагедијата во „Пулс“. Поднесено е ново обвинение против реалниот сопственик на агенцијата за обезбедување „Рубикон Секјурити Солушн“, кој се товари за тешки дела против општата сигурност поради сериозни пропусти во организацијата и мерките за заштита во дискотеката.
Обвинителството до Основниот кривичен суд Скопје достави и предлог за продолжување на сите претходно определени мерки за обезбедување присуство на обвинетиот.
Со ова, случајот „Пулс“ добива нова димензија, додека семејствата на жртвите продолжуваат да бараат одговорност и правда – јавно, гласно и упорно.