Коалицијата Вреди испрати силна порака до јавноста дека останува целосно обединета и политички стабилна, отфрлајќи ги обидите за раздор како неуспешни и контрапродуктивни. Во соопштение упатено до медиумите, од Вреди порачаа дека се посилни од кога било, синхронизирани во целите и визијата, со јасна определба да останат клучен фактор во новото парламентарно мнозинство.

„Обидите на ДУИ, преку Таравари, да предизвикаат земјотрес во нашата коалиција, завршија како политички бумеранг. Не само што не нè поколебаа, туку не’ направија уште посилни“, велат од Вреди.

Од коалицијата потенцираат дека се решени да ја спроведат агендата која ја ветиле на изборите – унапредување на правата на Албанците, борба против корупцијата и враќање на државата во функција на сите граѓани.

„Вреди е новото лице на политиката. Ние не се плашиме од старите шеми, напротив – токму Вреди е земјотресот што ќе го сруши трулиот систем на ДУИ“, велат од коалицијата.

Според најавите, во наредните денови се очекуваат нови политички потези и кадровски решенија кои, како што велат од Вреди, ќе ја зацврстат нивната улога како водечка политичка сила во албанскиот блок.

„Ние не сме случајна коалиција. Вреди е сериозен политички проект кој ќе остане столб на новата власт и гарант на стабилноста“, се вели во соопштението упатено до медиумите.

Голем број граѓани од различни региони на Македонија утрово пријавија неочекуван прекин на електричната енергија, кој започнал нешто по 5 часот. Поплаките најпрво се појавија на социјалните мрежи, каде корисници од различни градови наведоа дека останале без струја.

Според неофицијалните информации, прекин на снабдувањето бил регистриран во повеќе градови низ земјава, меѓу кои Кичево, Прилеп, Битола, Охрид, Штип, Струмица, Кочани, Крушево и други. Засега нема официјално соопштение од надлежните институции за причините за прекинот, ниту пак на веб-страницата на електродистрибутивната компанија беше објавена најава за непланирано исклучување.

Од утринските часови, околу 7:00 часот, граѓани од дел од засегнатите региони информираа дека напојувањето со електрична енергија постепено се нормализира.

Од ЕВН Македонија нѐ информираа дека повеќе детали за овој дефект треба да бидат соопштени од МЕПСО, па поради тоа се очекува во текот на денот оттаму да излезат со повеќе информации за причините за прекинот и дали станува збор за дефект или друг вид на прекин во системот.

Денеска во организација на Здружението за спорт и рекреација „Прв до врв – Скопје“, ќе се одржи тринаесеттото издание на традиционалниот спортско-рекреативен настан „Прв до врв“, кој секоја година обединува љубители на велосипедизмот, планинарењето и природата.

Според информациите од Министерството за внатрешни работи, стартот на велосипедската трка ќе биде во 09:45 часот пред Музејот на град Скопје, а маршрутата ќе се движи по ул. Св. Кирил и Методиј, бул. Св. Климент Охридски, бул. Мајка Тереза, ул. Тодор Александров и по локалниот пат кон Средно Водно до Милениумскиот крст.

Планинарите ќе стартуваат во 10:00 часот од пред ОУ „Кочо Рацин“, а ќе се движат по ул. Тодор Александров, преку ул. Салвадор Аљенде, по планинската патека кон Средно Водно и завршна точка на врвот на Водно.

Поради одржување на настанот, СВР Скопје ќе воведе посебен режим на сообраќај, при што дел од улиците ќе бидат затворени или со пренасочен сообраќај, а патролни полициски екипи ќе бидат распоредени долж трасата.

Од МВР апелираат до граѓаните да ги почитуваат наредбите и упатствата од полициските службеници, со цел настанот да помине безбедно и во спортски дух.

13 издание на „Прв до врв“

Тринаесеттото издание на спортско-рекреативниот настан „Шпаркасе лајф – прв до врв“ ќе се реализира денеска на планината Водно во Скопје. Настанот ги обединува љубителите на планината, спортот и рекреацијата во пет натпреварувачки категории до врвот на Водно: планинско трчање – 4,5 километри, планински велосипедизам – 9 километри, друмски велосипедизам – 11,4 километри, електрични велосипеди – 9 километри и тим-билдинг трка за компании – 4,5 километри.

Според најавата од организаторите, трките во велосипедизам ќе започнат во 9:45 часот од Музејот на град Скопје со летечки старт пред ОУ „Кочо Рацин“, додека планинското трчање и тим-билдинг трката ќе стартуваат директно пред училиштето во 10 часот. Патеките вклучуваат контролни точки кај полицијата, Средно Водно и пред целната линија на врвот.

– Секој кој ќе ја заврши трката добива финишер медал. Предвидени се и медали во сите старосни групи и во машка и женска конкуренција, под услов да има најмалку три учесници по категорија. Настанот привлекува сè повеќе учесници од странство – годинава веќе се пријавени учесници од Португалија, Италија, Бугарија и САД, што му дава дополнителна енергија и интернационален дух на предизвикот. Минатата година, беа урнати два рекорда – во друмски велосипедизам за жени (42:36) и во планинско трчање за мажи (31:50), што се нови најдобри времиња во искачувањето до врвот на Водно. За сите што ќе урнат рекорд и оваа година, „Шпаркасе банка“ повторно обезбедува награден фонд од 1.000 евра. Дополнително, како главен поддржувач, тие ќе постават „лаунџ корнер“ со изненадувања, награди за посетителите и активности што го збогатуваат искуството за сите учесници, се наведува во соопштението.

На целта, на врвот на Водно, предвиден е пикник, а присутните ќе ги забавуваат диџеј „Вито“ и бендот „Рингтоунс“. Предвидено е по забавната програма, да се одржи церемонија за прогласување на победниците.