Претседателот, Ѓорге Иванов денеска заедно со сопругата, Маја Иванова го посети Кавадарци по повод одржувањето на манифестацијата „Тиквешки гроздобер 2018“, а во рамки на посетата, претседателот Иванов оствари средба со градоначалникот на Кавадарци, Митко Јанчев, информираат од кабинетот на Шефот на државата.

Иванов, на средбата со Јанчев ја истакнал важноста што производството на квалитетно трпезно и винско грозје ја има за целиот тиквешки регион. Јанчев, пак заблагодарувајќи за присуството на Иванов го информирал дека во Кавадарци се регистрирани над 6.500 индивидувални земјоделци што поседуваат различни површини на лозов насад.

На „Тиквешкиот гроздобер 2018“ учествуваат домашни претставници како и гости од регионот, а на манифестацијата присуствуваат и граѓани од цела држава, како и претставници од Владата и дипломатскиот кор во Република Македонија. Целта на манифестацијата е традиционално одбележување на почетокот на бербата на грозје, преку симболично откинување на првиот грозд. По повод почетокот и славењето на гроздоберот по улиците на Кавадарци беше одржано и големо карневалско дефиле.

Тиквешкиот гроздобер традиционално се организира од 1964 година.