Македонија
Претставници од Делегацијата на ЕУ извршија увид во функционирањето на граничните премини

Претставници од Делегацијата на ЕУ заедно со делегација на Царинската управа на Република Македонија ги посети и извршија увид на состојбата и функционирањето на ГП „Табановце“, „Деве Баир“ и месноста Маркова нога. Делегациите беа предводени од директорот на Царинската управа, Ѓоко Танасоски, и Никола Бертолини, раководителот на секторот за соработка од ЕУ-делегацијата.
Посетите, реализирани месецов, а за кои Царинската управа информираше денеска, се во рамки на повеќегодишната соработка и постојаната поддршка на царинското работење во Република Македонија, од страна на Европската Унија и Делегацијата на ЕУ во Скопје, за негово приближување кон стандардите на Европската Унија.
На ГП „Табановце“, кој е обновен преку проект финансиран од ЕУ, оценето е дека придобивките од проектот, и покрај краткиот период од неговото завршување, веќе ги даваат првите резултати во олеснување на прекуграничната трговија по должина на Коридорот 10 и спроведувањето на царинските постапки во модерни капацитети и услови.
На граничниот премин „Ќафасан“ е заклучено дека напредокот на проектот за надградба на објектот, во рамки на ИПА-програмата, е задоволителен и дека се очекува да биде реализиран до крајот на 2018 година.
Со градбата на нов царински терминал за товарен сообраќај од 9,5 илјади метри квадратни, новата зграда за царински постапки, објекти за преглед на товарни возила и магацин, зграда со придружни содржини да се создадат поповолни инфраструктурни услови на овој најфреквентен граничен премин кон Република Албанија.
Со тоа, наведуваат од Царината, се овозможува дополнително забрзување на царинските и прекуграничните формалности на сè поголемиот интензитет на размена на стока и патници преку истиот.
При посетата на Охридско-преспанскиот Регион посетена е областа Маркова нога, за запознавање со локаната инфраструктура.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ја поддржуваме одлуката директорот на Клиниката за неврологија да биде разрешен“, велат од ВМРО-ДПМНЕ

„Во врска со објавите на социјалните мрежи, за директорот на Клиниката за неврологија, д-р Игор Кузмановски, ВМРО-ДПМНЕ ја поддржува одлуката да биде разрешен од функцијата. Немаме сомневање дека јасно и недвосмислено институциите треба да постапат во согласност со законот и утврдените процедури“, велат од ВМРО-ДПМНЕ.
„Извршувањето на јавна функција носи конкретни обврски и одговорности.
Нашата заложба е правилата и законите да важат за сите подеднакво и управувањето на институциите мора да биде во согласност со вредносниот систем на одговорност за кој се залагаме и ќе продолжиме да се бориме“, соопшти ВМРО-ДПМНЕ.
Македонија
Разрешен директорот на Клиниката за неврологија, проф. д-р Игор Кузмановски

Министерството за здравство информира дека министерот Азир Алиу денес донесе решение за разрешување на директорот на ЈЗУ Универзитетска клиника за неврологија, проф. д-р Игор Кузмановски.
„Во најкраток рок ќе биде именуван нов директор согласно законските процедури. Работата на Клиниката продолжува непречено“, известува Министерството за здравство.
Македонија
Завршена регионалната програма за сертификација на службени кучиња за мириси на производи

Во рамки на проектот „Поддршка на националните власти на државата во намалувањето на ризикот од пролиферација и злоупотреба на мало и лесно оружје“, успешно беше завршен процесот на Регионалната програма за сертификација на службени кучиња за мириси на производи – значаен чекор во зајакнување на регионалната безбедност и борбата против транснационалниот криминал.
На свеченоста по повод завршувањето на обуката, директорот на Бирото за јавна безбедност при Министерството за внатрешни работи, Александар Јанев, им додели дипломи на учесниците, нагласувајќи дека оваа програма претставува симболично, но и суштинско градење на мостови помеѓу институциите од целиот регион.
„Со шест модуларни обуки и создавање тимови подготвени да бидат на првата линија во борбата против криминалот, Регионалниот К9 центар се етаблира како водечка точка за обука и сертификација. Заедно вложуваме во безбедноста, стабилноста и иднината на регионот,“ истакна директорот Јанев.
Проектот е реализиран со поддршка на ОБСЕ, ФРОНТЕКС и донаторите, чија соработка и ангажман беа клучни за успешната имплементација на програмата.
Со ваквите активности, Министерството за внатрешни работи и Бирото за јавна безбедност ја потврдуваат својата посветеност на континуираното унапредување на капацитетите за справување со организиран и транснационален криминал, како и зајакнување на регионалната безбедносна соработка.