Македонија
Приведен, па ослободен поранешниот пратеник од НСДП, Љубомир Јосифовски

Поранешниот пратеник од Нова содицијалдемократска партија (НСДП), Љубомир Јосифовски, влегол во компјутерскиот систем на Централниот регистар, со што ја оштетил институцијата за 35 милиони денари.
Поранешниот пратеник синоќа бил приведен во Полициската станица Центар, а екипи на МВР направиле претрес во станот во Скопје, каде што под кирија престојувал Јосифовски и од каде што ги правел нарачките.
По обезбедувањето на материјалните докази, пратеникот бил пуштен на слобода. Против него ќе биде поднесена кривична пријава за делото оштетување и неовластено навлегување во компјутерски систем.
Јосифовски 30 пати неовластено влегол во компјутерскиот систем на Централниот регистар во периодот од јануари до крајот на август.
Од Централниот регистар потврдија дека е извршен упад во компјутерскиот систем.
„Упадот е извршен со злоупотреба на безбедноста и со надминување безбедносни пречки од страна на Друштвото за обработка на податоци, хостирање и слични дејности „Инфогруп“ ДОО Скопје. На тој начин ова правно лице неовластено обезбедувало податоци од регистри што ги води Централниот регистар“, велат од таму.
Од Централниот регистар потенцираат дека при упадот воопшто не се нарушени состојбата и интегритетот на податоците во сите регистри што ги води Централниот регистар.
„Сите системи и услуги на Централниот регистар непречено функционираат и се достапни за сите корисници, а податоците во регистрите се соодветно заштитени“, велат од таму.
Јосифовски беше пратеник од редовите на НСДП во Собранието во периодот од 2014 до 2016 година. Минатата година Јосифовски се кандидира за претседател на НСДП, но на седница на Централниот одбор на партијата беше одлучено Тито Петковски да биде единствен кандидат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.
Македонија
Променливо облачно со повремени врнежи од дожд и со ретка појава на грмежи

Времето денеска ќе биде променливо облачно со повремени локални врнежи од дожд и со ретка појава на грмежи. Ќе дува слаб до умерен северен ветер Минималната температура ќе биде во интервал од 4 до 10, а максималната ќе достигне од 11 до 18 степени.
Во Скопје, променливо облачно со повремен дожд и со услови за ретки грмежи. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
Времето во наредните денови
Продолжува периодот на променливо облачно време со повремени врнежи од дожд. Денеска и во четврток ќе има изолирана појава, а од петок на повеќе места ќе биде нестабилно со пороен дожд и грмежи. Од недела температурите ќе бидат во опаѓање.