Македонија
Признанија за првите луѓе на МСМЈЛК при УКИМ
Денот на македонскиот јазик, Универзитетот „Св. Кирил и Методиј“ во Скопје (УКИМ) го посвети на Меѓународниот семинар за македонски јазик, литература и култура (МСМЈЛК при УКИМ) и остварувањата во афирмацијата на македонистиката.
„Од школа за македонски јазик за странски слависти, на чие прво издание имало 21 учесник од 12 земји, Семинарот прерасна во главен придвижник и стожерник на развојот на македонистиката на странските универзитетски центри и академско јадро на меѓународната афирмација на македонскиот јазик, литература и култура. Факт е – токму МСМЈЛК при УКИМ е оној што е заслужен не само за тоа што денес, македонистиката се изучува на универзитетите ширум светот, туку и што македонистиката има бројни посветеници и афирматори на сите континенти – истражувачи, универзитетски професори, книжевни преведувачи, публицисти… Тие се дел од оние над 4000 учесници на школите на Семинарот, но и од некогашните и сегашни студенти на лекторатите по македонски јазик на странските универзитети. Ама заслужен е и за тоа што како резултат од неговата соработка со странските универзитетски центри, денес има и македонистички подмладок во странските академски и културни средини, кој е една од гаранциите за перспективите на странската македонистика во времето што е пред нас.
Но, исто толку, неспорен факт е и дека Меѓународниот семинар за македонски јазик, литература и култура е оној што веќе пет децении го поттикнува развојот на странската македонистичка научна мисла.” – истакна ректорот на УКИМ, проф. д-р Никола Јанкуловски.
УКИМ, во знак за признание за посебен придонес за афирмацијата на македонистиката, додели благодарници на универзитетските професори – директори на МСМЈЛК при УКИМ од неговото основање наваму: акад. Александар Спасов (постхумно), акад. Божидар Видоески (постхумно), проф. д-р Томе Саздов (постхумно), проф. д-р Кирил Конески (постхумно), проф. д-р Томислав Тодоровски, проф. д-р Коста Пеев, проф. д-р Максим Каранфиловски, проф. д-р Емилија Црвенковска, проф. д-р Славица Велева и проф. д-р Весна Мојсова-Чепишевска, која со МСМЈЛК при УКИМ раководи од 2019 година.
Признание e доделено и на лекторот кој досега најдолго се посвети на развивањето на дејноста на МСМЈЛК при УКИМ, Роза Тасевска.
„Во оваа година, кога чествуваме и 120 години од објавувањето на клучната книга за македонистиката – ‘За македонцките работи’ од Крсте Петков Мисирков, чинам, нема посоодветен ден за да се случи ова, од овој – Денот на македонскиот јазик. Затоа што објавувањето на македонската азбука на 5 мај 1945 година е клучен миг во кодификацијата на македонскиот литературен јазик со која се остварија заложбите на Мисирков од 1903 година. А коментирајќи ги нападите врз македонскиот јазик од некои политички и научни центри, Конески, во една прилика истакна: ‘најдостојниот одговор ние го даваме тогаш, кога знаеме да ги цениме како што треба и да ги штитиме придобивките на јазичното поле од 1945 година, како суштествена компонента на нашиот национално-културен развиток. Секакво поинакво постапување би значело пројава на лекомисленост во една сериозна ситуација.’ Меѓународниот семинар за македонски јазик, литература и култура, веќе речиси 56 години е заштитник и афирматор на тие придобивки. И онака како што нè учеше Конески го дава најдостојниот одговор – и дома, и ширум светот. Притоа, треба да имаме предвид и дека Семинарот не само што го вреднува она што е веќе суштетвена компонента, туку постигнува резултати кои се и клучни за нови поглавја на нашиот национално-културен развиток, вклучително и преку Меѓународната научна конференција која е централна точка на меѓународниот научен интерес за македонистиката.” – посочи ректорот на УКИМ, Јанкуловски.
Во завршницата на настанот беше посочено: „Со заложбите и остварувањата на МСМЈЛК при УКИМ, развојот на странската македонистика веќе се одвива по цврсто утврдена патека на која има јасни патокази за развојот во времето што следи. Аманетот на Конески се остварува и ќе се остварува. Македонскиот збор и мисла одекнуваат низ светот! “
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: ВМРО-ДПМНЕ изгласа нов закон заедно со дестабилизаторите од ДУИ
Од опозициската партија оценуваат дека коалицијата на ВМРО-ДПМНЕ со ДУИ си функционира.
„Во Собранието денеска токму со гласовите на ДУИ власта обезбеди двотретинско мнозинство и беа усвоени измените на Законот за локална самоуправа.
Додека во јавност Мицкоски демек ги напаѓа во Собрание си ги реализираат диловите.
ВМРО-ДПМНЕ реализираше уште еден од договорите на коалицијата ДПМНЕ-ДУИ.
Пред околу 1 месеци ДПМНЕ и ДУИ исто така со заеднички гласови формираа тело за следење на правична застапеност на заедниците.
ВМРО-ДПМНЕ заедно со ДУИ и ЗНАМ на седница го заштитија Гаши од одговорност за сите скандали.
Значи наутро Мицкоски вели дека ДУИ ќе ја дестабилизира државата и дека се криминалци а попладне во Собрание неговите пратеници гласаат заеднички дилови со ДУИ“, реагираат од СДСМ.
Договарања под маса, манипулации и лажните јавни конфликти меѓу двете партии, според нив, се методи кои се видени во минатото и веќе не поминуваат.
Македонија
Се укинуваат лиценците за интернет игри на среќа, соопшти Владата
Денеска Владата ја одржа 22 седница.
„Поради неправилности во работењето, пропусти и основани сомнежи за незаконско работење и постапување Владата на Република Северна Македонија ја разгледа и усвои информацијата во врска со потребата за престанување на Друштвото за приредување на електронски игри на среќа, Нова Државна видео лотарија НОВО ВЛТ ДОО – Скопје и друштвата за приредување интернет игри на среќа, Друштвото за приредување интернет игри на среќа Државна лотарија – МОЗЗАРТ ДОО Скопје, Друштвото за приредување интернет игри на среќа Државна лотарија – 77 БИТС ДОО Скопје и Друштвото за приредување интернет игри на среќа Државна лотарија – ВЕЗУВ ДОО Скопје, во кои содружник е Акционерското друштво за приредување игри на среќа, Државна лотарија на Република Северна Македонија и преземање активности за отстранување на платформата 2Win.mk за приредување интернет (онлајн) игри на среќа на Друштвото за приредување на игри на среќа, Државна видео лотарија на Република Македонија – КАСИНОС АУСТРИА ДОО – Скопје“, се истакнува во владиното соопштение.
Се задолжува, како што е појаснето во напишаното, Друштвото за приредување на игри на среќа, Државна видео лотарија на Република Македонија – КАСИНОС АУСТРИА ДОО – Скопје да ги преземе потребните активности за отстранување на платформата 2Win.mk за приредување интернет (онлајн) игри на среќа од глобалната интернет мрежа, согласно Автентичното толкување на членот 7 ставови (2), (3) и (4) од Законот за игрите на среќа и забавните игри.
Македонија
„Вреди“: Коцката надвор од домовите, исполнето ветувањето
Планот на „Вреди“ за справување со штетните последици од коцкањето, веднаш даде конкретни резултати, велат од оваа партија.
„Ветувањето за отстранување на коцката надвор од домовите на граѓаните е исполнето! Коалицијата ВЛЕН со конкретни дела се справува со девијантните појави кои режимот на ДУИ ни ги остави во наследство.
Во првите 80 дена од формирањето на владино мнозинство, предложивме и усвоивме автентично толкување на законот за игри на среќа со што се создадоа правни предуслови за одлуката на Владата за затворање на пет компании и отстранување на коцката од домовите на граѓаните.
Оваа одлука на Владата е победа на моралот над погрешните и коруптивни одлуки на Артан Груби и Прпарим Бајрами за воведување интернет коцкарници, кои како општествено зло директно ги таргетираа младите“, појаснуваат од коалицијата.
Претходно, како што додаваат, Владата донесе одлука за раскинување на коруптивниот договор за закуп на Државна Лотарија со фирмата „ХЕЈ ДООЕЛ“, чиј објект во Визбегово е сопственост на лица кои се поврзуваат со Али Ахмети.
Сега, според „Вреди“ има доволно исполнети правни околности да се премине кон институционална одговорност за сите коруптивни коцкарски зделки на ова раководство на ДУИ.
„Вреди“, нагласуваат од коалицијата, продолжува да го спроведува Планот за справување со штетните последици од коцкањето.
„Во фаза на изработка е нов Закон за игри на среќа кои ќе содржи далеку построги одредби, кои во прва фаза ќе го намалат постоечкиот број на коцкарници, минимум за половина“, известуваат од „Вреди“.