„За жал, ги имаме и првите два потврдени случаја на заразени со коронавирус во нашата општина.Денеска, и како доктор и како градоначалник, се зaинтересирав за состојбата на двајцата наши сограѓани и добив информација дека се во добра здравствена состојба и дека им е укажана адекватна здравствена помош. Сакам да им дадам поддршка за побрзо оздравување, меѓутоа и да ги охрабрам сите оние што имале и најмал контакт со потенцијални преносители, да се пријават за да може надлежните здравствени работници побргу да реагираат.Тоа се наши сограѓани. Секому може да му се случи ова. Но, мораме да бидеме крајно внимателни и одговорни и кон себе и кон другите. Меѓутоа, да не ги стигматизираме и обвинуваме, туку да ги поддржиме и охрабриме“, изјави градоначалникот на Прилеп, Илија Јованоски.

„Апелирам граѓаните да ги почитуваат и да се придржуваат до мерките на Владата, како и до препораките на Министерството за здравство и локалните мерки од општинскиот кризен штаб.
Во оваа ситуација, кога веќе имаме два случаја на коронавирус во општина Прилеп и кога сме соочени со можноста бројот на заразени во наредниот период да се зголемува, ја потенцирам потребата од одговорно однесување на секој поединец, на секој граѓанин од нашата општина.
Секој од нас да ги разбере сериозноста на ситуацијата и личниот придонес, кој треба да го дадеме во справување со коронавирусот.

Во таа насока ги заостривме превентивните мерки во борбата со пандемијата. Од денеска ги засиливме контролите на автомобилите на сите четири влеза во градот, при што вршиме дезинфекција на секое возило. Бидејќи денеска во Прилеп беше пазарен ден, од раните утрински часови се вршеше контролиран влез и излез од Градскиот пазар. На влезовите беа поставени средства за лична дезинфекција, а на пазарџиите и на граѓаните им беа давани заштитни маски. Денеска, со поголем интензитет се вршеше дезинфекција на улиците во градот. Тоа ќе биде направено и во населените места во нашата општина. Продолжува забраната за јавниот градски превоз, а од утре Градскиот пазар ќе биде затворен. Почитувајте ги мерките за заштита и превенција. Бидете свесни за последиците од неодговорното однесување. Седете дома. Доколку имате симптоми типични за коронавирусот, најпрвин јавете се кај вашиот матичен лекар. Јавното здравје е заедничка одговорност. Од нас и од нашето однесување зависи како ќе се развива ситуацијата со коронавирусот во нашата општина“, апелира градоначалникот.