Македонија
Прилеп го одбележа 9 Мај, Денот на победата над фашизмот и Денот на Европа

Со положување свежо цвеќе на Могилата на непобедените во Паркот на револуцијата, Општина Прилеп ги одбележа 74-годишнината од победата над фашизмот и 69-годишнината од Денот на Европа.
Градоначалникот на општина Прилеп, Илија Јованоски, истакна дека, сеќавајќи се на 9 мај 1945 година, не смееме да дозволиме да се повтори ново крвопролевање како она од Втората светска војна кога животите ги загубија повеќе од 50 милиони луѓе.
„Се сеќаваме на сите оние борци што ги изгубиле животите и кои придонесоа да ја имаме денешната слобода. Како ние, така и младите генерации за кои во иднина треба да обезбедиме подобар живот. Во оваа пригода сакам да потенцирам дека како и досега, Општина Прилеп и годинава овој ден го чествува заедно со Руската Федерација затоа што овој датум е длабоко врежан во срцата на сите наши граѓани. Исто така, денеска го славиме и Денот на Европа бидејќи на денешен ден 1950 година е донесена Шумановата декларација, што претставува основа за основањето на Европската заедница, денешната Европска Унија. Денеска се навршуваат и 75 години од херојската смрт на народните херои Кире Гаврилоски-Јане и Круме Волнароски, кои загинаа на денешен ден 1944 година“, изјави градоначалникот Јованоски.
Заблагодарувајќи ѝ се на Општина Прилеп за денешното одбележување на овој значаен датум, Алексеј Кривошев, втор секретар на Амбасадата на Руската Федерација, рече дека начинот на кој во Прилеп и Македонија се прославува 9 Мај ја покажува неговата големина и важност.
„Можам да кажам дека ако 9 Мај на овој начин се прославува секоја година, тоа значи дека никогаш нема да се заборави тој подвиг на борците што ги дале своите животи на олтарот на победата над фашизмот. Секое име што го гледаме на овој споменик е како зрак светлина за слободната иднина. Животот оди напред, но никогаш не се заборава подвигот на тие борци. Слава им за сите времиња“, потенцира Кривошев.
Покрај градоначалникот Јованоски и претставниците на Руската Федерација, во чест на Денот на победата над фашизмот и Денот на Европа цвеќе на Могилата на непобедените положија и претставници на Армијата, на Советот на Општина Прилеп, Сојузот на борците и здруженија на граѓани, а ученици од ООУ „Кире Гаврилоски-Јане“ изведоа пригодна програма.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денеска се одбележуваат 115 години од раѓањето на Мајка Тереза

Денеска се одбележуваат 115 години од раѓањето на Мајка Тереза (вистинското име и е Агнеса Гонџа Бојаџиу). Таа е родена на 26 август 1910 година на тогашната улица “Поп Кочина” број 14, која што се наоѓала на сегашниот плоштад „Македонија“ во Скопје.
Гонџа е најмалото дете во семејството, имала постара сестра Ага и постар брат Лазар. Гонџа потекнува од добростоечко семејство и во него владеело правилото да се помогне на секој на кој му е потребна помош.
Конечната одлука да го напушти Скопје ја донела затоа што на 12 годишна возраст добила повик од Бога. По 6 години, таа конечно, го напушта родниот град. Заминува за Даблин, Ирска од железничката станица во Скопје. Заедно со мајката Драна и сестрата Ага заминуваат за Загреб, од каде, после две недели, Гонџа заминува за Ирска. Ова е последната нејзина средба со своите мајка и сестра.
Во 1979 година ја добила Нобеловата награда за мир за извонредно широката дејност во помагањето на бедните, болните и унесреќените во целиот свет. Почина во Калкута, Индија, на 5 септември 1997 година по неколку годишна борба со болест на срцето и белите дробови
Две години по нејзината смрт, Папата Јован Павле II, ја започнува диоцезиската фаза од процесот за беатификација и канонизација.
По беатификацијата на Мајка Тереза, која на 19 октомври 2003 ја извршил папата Јован Павле Втори, таа ја добила титулата Блажена Мајка Тереза. Оваа титула ја носела сè до нејзиното прогласување за светица откако црквата официјално утврдила дела има изведено и второ чудо.
На 17 декември 2015 година Ватикан потврдил дела папата Франциск го признал второто нејзино чудо со лекување на човек од Бразил со повеќе тумори на мозокот.
Папата ја канонизирал Мајка Тереза на 4 септември 2016 на плоштадот „Свети Петар“ во Ватикан пред десетици илјади луѓе.
Македонија
ВЛЕН: Обвинителството да постапи по извештајот од ревизијата за Бујар Османи

Еден месец помина од јавно објавениот негативен извештај на Државниот завод за ревизија за трошењата во Министерството за надворешни работи во време кога министер беше Бујар Османи, а Обвинителството и судството сѐ уште не презеле никакви мерки, велат од ВЛЕН.
Од таму додаваат дека ревизорите утврдиле дека над 120 милиони денари (околу 2 милиони евра) се потрошени за организација на ОБСЕ самитот во Скопје без соодветна документација, без евиденција за испорачаните стоки и услуги и без трајна опрема која требаше да остане во државна сопственост.
Според ВЛЕН, тоа отвора сериозни сомнежи за нетранспарентност и злоупотреби на јавни средства.
„Сѐ ова потсетува на времето кога Бујар Османи беше Министер за здравство и кога исто така доби негативен извештај од Државниот завод за ревизија – со забелешки за незаконски постапки и сомнителни исплати. И тогаш, наместо одговорност, судството го амнестираше. Некоја структура во државата очигледно го штити и негува Бујар Османи како свој миленик. Денес гледаме повторување на истиот шаблон, судството и обвинителството повторно молчат. Ако беше било кој друг граѓанин, ќе одговараше и за сообраќајна казна. Но за Бујар Османи, изгледа важат други правила. Очигледно е дека е под нечија заштита, а тоа значи само едно, дека е должен некаде, а тоа не се Албанците или граѓаните на Чаир“, се наведува во соопштението.
ВЛЕН јавно потсетува дека Јавното обвинителството има законска обврска да отвори случај по негативен извештај на Државниот завод за ревизија. Ако тоа не се направи, велат од ВЛЕН, ќе биде втор пат како институциите свесно го амнестираат Бујар Османи за исти сомнежи и злоупотреби.
Македонија
Борче Стамов и д-р Ирфан Ахмети ќе ја примат државната награда „Мајка Тереза“

Борче Стамов од „Донирај компјутери“ и доц. д-р Ирфан Ахмети од Универзитетската клиника за ендокринологија, денеска во Собранието ќе ја примат државната награда „Мајка Тереза“.
„На 26 август 2025 година (вторник), во Кристалната сала на Собранието на Република Северна Македонија, во 11:00 часот, Одборот за доделување на државната награда „Мајка Тереза“ ќе ја додели државната награда „Мајка Тереза“ за 2025 година за особено значајни остварувања од интерес на државата во областа на хуманоста и човечката солидарност и за потикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери“, соопштија од Собранието.