Македонија
Продолжува истрагата за недозволено тргување со алкохол

Основното јавно обвинителство Кавадарци по допрен глас поради постоење основи на сомнение дека е сторено кривично дело недозволено тргување со меѓупроизводи, етил алкохол и тутунски добра, отвори две предистражни постапки. Надлежен јавен обвинител од Основното јавно обвинителство Кавадарци издаде насоки и наредби за прибирање податоци и потребна документација во предметите.
Основното јавно обвинителство Кавадарци ја извести јавноста за пронајдените над 9.000 литри ракија. Имено, во текот на изминатите денови извршен е претрес на повеќе локации, при што во правното лице „Анго – вест“ од Кавадарци пронајдени се и одземени 2.688 шишиња од еден литар со натпис „стара жолта лозова ракија“, 2.244 шишиња од 0,7 литри со етикета „стара жолта лозова ракија“ и 4.636 шишиња од 0,7 литри со етикета „стара жолта ракија“.
Во правното лице Винарска визба „Повардарие“ – Неготино пронајдена е помала количина ракија со етикета „вино жупа“ од Србија. Во исто време од страна на јавен обвинител сослушани се лица вработени во Винарската визба „Повардарие“ од Неготино, кои учествувале во производство и дистрибуција на пронајдениот алкохол. Издадена е наредба за одземање на компјутерската опрема и документација каде што се води евидентирањето на производството и продажбата на алкохолот.
За осомниченото лице до судијата на претходна постапка е доставен предлог за определување мерки на претпазливост, и тоа одземање патна исправа, возачка дозвола, забрана за преземање работни активности во двете правни лица и јавување еднаш седмично во Основниот суд Кавадарци. Предлогот на јавниот обвинител е прифатен од страна на Основниот суд Кавадарци и со решение на осомниченото лице му се изречени предложените мерки.
Во тек се други активности што се преземаат во координација со Министерството за внатрешни работи и Царинската управа, а во насока на прибирање докази и расветлување на случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Семејствата на починатите во кочанската дискотека денеска излегуваат на протест

Семејствата на починатите во кочанската дискотека организираат „Марш за ангелите“.
Протестот ќе се одржи денеска во 12:05 часот.
Маршот ќе започне од Градскиот парк во Кочани, ќе продолжи кон Трговскиот центар, Општина Кочани, Полициската станица и ќе завршат пред Судот.
„Маршот на семејствата на покојните не е за поддршка на обезбедувањето, единствено и исклучиво за почит спрема покојните и барање на правда“, стои во известувањето.
Македонија
Денеска облаци и сонце, утре дожд и снег

Утре голема промена на времето.
Времето денеска ќе биде променливо облачно со сончеви периоди. Локално ќе има услови за развој на нестабилност со краткотраен пороен дожд и грмежи. Минималните температури ќе се движат од 0 до 9, а максималните од 12 до 20 степени.
Во Скопје, променливо облачно со подолги сончеви периоди. Ќе дува слаб до умерен ветер од северен правец. Минималната температура ќе биде 8, а максималната 20 степени.
Утре ќе има брз продор на студена воздушна маса од север, кој ќе предизвика значителна промена на времето. Ќе преовладува претежно облачно време со врнежи од дожд, а на повисоките места од дожд и снег. На планините врнежите ќе бидат од снег и ќе се формира снежна покривка (10 до 15см). Ќе дува засилен северен ветер (над 70км/ч.) и температурите значително ќе опаднат.
Во понеделник со засилен северен ветер наместа повремено ќе провејува слаб снег. Потоа времето ќе биде стабилно и ветровито со утринските температури кои насекаде ќе бидат негативни.
Македонија
Променливо облачно со сончеви периоди

Времето денеска, променливо облачно со сончеви периоди. Локално ќе има услови за развој на нестабилна облачност со краткотраен пороен дожд и грмежи. Минималната температура ќе биде во интервал од 4 до 9, а максималната ќе достигне од 14 до 20 степени.
Во Скопје, променливо облачно со подолги сончеви периоди. Ќе дува слаб до умерен ветер од северен правец. Минималната температура ќе се спушти до 8, а максималната ќе достигне до 20 степени.
Во недела ќе има продор на студена воздушна маса од север, кој ќе предизвика значителна промена на времето.
Ќе преовладува претежно облачно време со врнежи од дожд, а на повисоките места од дожд и снег. На планините врнежите ќе бидат од снег и ќе се формира снежна покривка (10-15см).
Ќе дува засилен северен ветер (над 70км/ч) и температурите значително ќе опаднат. Во понеделник со засилен северен ветер наместа ќе провејува слаб снег. Потоа времето ќе биде стабилно и ветровито со утрински температури кои насекаде ќе бидат негативни.