Македонија
Промовирана новата поштенска марка „Скопје се сеќава 1963 – 2023“

Програмата за развој на Обединетите нации во партнерство со АД „Пошта на Северна Македонија“ ја промовира новата поштенска марка „Скопје се сеќава 1963 – 2023“, издадена по повод одбележувањето шест децении од разорниот скопски земјотрес.
По иницијатива на УНДП, поштенската марка е испечатена во 6.000 примероци по дизајн изработен од Лоран Куфало, со препознатливиот стилизиран мотив на часовникот на Старата железничка станица и специјалното изработено лого по повод јубилејот. Марката е достапна во продавницата на филателијата при „Пошта“ во Скопје со номиналната вредност од 36 денари.
„Новата поштенска марка изработена во партнерство со АД ‘Пошта; е во состав на активностите на УНДП за одбележување на 60-годишнината од земјотресот во Скопје. Марката ќе остане како сведок на отпорноста на градот Скопје и сигурен сум дека сите љубители и колекционери – филателисти ќе ја препознаат нејзината важност во одбележувањето важни историски моменти за идните генерации“, истакна Армен Григорјан, постојан претставник на УНДП.
Пригодната марка, промовирана денеска, ќе остане своевиден доказ за храброста и надежта на скопјани и за солидарноста што го обедини светот по најголемата катастрофа во поновата историја на градот.
„АД ‘Пошта’ досега има издадено повеќе едиции поштенски марки со скопски мотиви. Така е и денеска кога се сеќаваме на огромната катастрофа. Шеесет години подоцна, ни беше особено задоволство што имавме можност да работиме и за овој значаен јубилеј на нашиот главен град“, изјави Бујаре Абази, генерална директорка на АД „Пошта на Северна Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мемов: Со кој морал и со кое право Герасимовски се фали со успешни проекти, наивноста и скромноста се само маска

Четири години општина Центар беше заложник на неспособноста, дволичноста и хипокризијата на Горан Герасимовски, кои се главни карактеристики на СДСМ во практикување на власта.
Наместо ред – безредие. Наместо законитост – дивоградби. Наместо грижа за граѓаните, грижа за лични и партиски интереси. Дури и училиштата на нашите деца ги претвори во жртви на неговата
неспособност“, истакна на прес-конференција портпаролот на Движењето ЗНАМ Никола Мемов.
Во изминатите четири години, градоначалникот на СДСМ Горан Герасимовски, додава Мемов, ја претвори Општина Центар во полигон за дивоградби – дури и во училиштата.
„Наместо да обезбеди здрави и сигурни услови за нашите најмлади, дозволи импровизации и незаконски градби што го загрозуваат нивното секојдневие.
Го прашуваме градоначалникот на СДСМ, Герасимовски: Зошто децата во основното училиште „Коле Неделковски“ од 1 септември годинава учат во дограден и надграден објект, за кој не е извршен технички прием и за кој нема правосилно решение за измени во тек на градба? Дали децата во ОУ „Коле Неделковски“ учат во дива доградбa? Дали катноста на училиштето не одговара на урбанистичкиот план во тој дел од Центар? Дали со цел да се заобиколи законот, извршена е промена на намената на простории од училници во т.н. „технички простории“? Дали во тие „технички простории“ денес се изведува настава за нашите деца? Дали договорите за градба склучени меѓу Општина Центар и изведувачот „Вардарградба ДОО Скопје“ во 2023 и 2024 година, во вредност од над 45 милиони денари или 735.000 евра, а според засегнатите и над 850.000 евра, содржат повреди на тендерската постапка?“
Како што оценува, додека секој граѓанин мора строго да ги почитува процедурите за градба, изгледа, вели тој, дека за Општина Центар тоа не важи, дури и кога станува збор за објекти во кои учат нашите деца.
„Ова е врв на безобразие и лицемерие, наместо да обезбеди безбедни услови за учениците, Герасимовски дозволил доградби и надградби без технички прием и без правосилни решенија.
Со кој морал Герасимовски и со кое право се фали со „успешни проекти“, кога во реалноста ги става децата во ризик и ја гази законитоста?!
Ова ли е визијата за Центар, импровизирани училници, дивоградба и злоупотребени пари на граѓаните?!“
Според него, наивноста и скромноста што сака да ја демонстрира Герасимовски се само маска. Зад таа маска, вели, се крие човек кој во 4 години мандат дозволи дивоградби, незаконитости, нетранспарентни тендери и непочитување на елементарни процедури.
Македонија
Поефикасна, попродуктивна и поуслужна администрација за граѓаните: Минчев на Дигиталниот самит на Западен Балкан 2025

Министерот за јавна администрација, Горан Минчев, присуствуваше на свеченото отворање на Дигиталниот самит на Западен Балкан 2025, кој оваа година се одржува во Скопје во Музејот на современа уметност во организација на Министерството за дигитална трансформација.
Министерството за јавна администрација активно придонесува во процесот на дигитална трансформација на јавниот сектор, преку воведување и унапредување на системски решенија кои имаат за цел да ја направат администрацијата поефикасна, попродуктивна и поуслужна кон граѓаните и бизнисите.
Еден од клучните проекти на Министерството е модернизација на Информациониот систем за управување со човечки ресурси (ИСУЧР), кој овозможува централизирано и транспарентно управување со кадарот во јавниот сектор.
Покрај тоа, во тек е и надградбата на ЛМС платформата за е-учење, со што се создаваат услови за систематски и континуиран професионален развој на административните службеници.
Во фокусот на Министерството е и интероперабилноста, односно автоматизирана и безбедна размена на податоци меѓу институциите, која е истакната во двете платформи и претставува основа за модерна, дигитализирана и координирана јавна администрација. Ова значително ќе го подобри квалитетот на јавните услуги и ќе го олесни пристапот на граѓаните до тие услуги, без непотребни административни процедури.
Министерството за јавна администрација останува посветено на процесот на дигитална трансформација, со цел создавање на транспарентен, ефикасен и граѓански ориентиран јавен сектор.
Македонија
(Видео) Механизација на „Дрисла“, оградување на „Вардариште“, нов центар за рециклажа и 15 нови паркови, најави Шукова

Скопје мора конечно да го расчисти најголемиот срам – загадениот воздух, дивите депонии и недостатокот на зеленило. Ова не е партиска тема, туку здравствено и човечко прашање за секој граѓанин“, изјави Каја Шукова, кандидат за градоначалник на Скопје од редовите на СДСМ, претставувајќи го делот од својата програма посветен на екологија и животна средина.
Шукова најави решенија што, како што рече, „ќе почнат веднаш“ – вклучувајќи ги Дрисла, Вардариште, отпадот, парковите, загадувањето и екологизацијата на јавниот простор.
„Ќе го оградиме Вардариште, ќе поставиме 24/7 обезбедување и ќе ставиме крај на дивото фрлање и палење ѓубре. Паралелно, Дрисла ќе добие нова механизација, а процесот на управување со отпадот ќе биде под стручна и јавна контрола. Тоа го должиме на секој скопјанец“, истакна таа.
Како суштинска промена, Шукова го најави отворањето на Центар за селекција и рециклажа, кој ќе овозможи 50% од отпадот да се рециклира наместо да завршува на депонија.
„Ќе поставиме паметни контејнери, ќе промовираме селекција од домаќинствата и ќе ја отвориме економијата на рециклирање. Отпадот е ресурс – само треба некој конечно да се фати со работа, а не само со изговори“, рече таа.
Во планот за здрава и зелена животна средина, Шукова вклучува и проект за урбано зеленило.
„Во првите 15 месеци – 15 нови паркови и 10.000 нови дрвја. Ќе засадиме, ќе одржуваме и ќе го раззелениме секое маало. Зеленото Скопје не е луксуз, тоа е основа за здравје и живот“, порача Шукова.
Најави и субвенции за приклучување на централно греење за домаќинствата кои сè уште се греат на дрва.
„Ние ќе го поддржиме секој граѓанин кој сака да премине на почист начин на греење. Загадувањето нема да го решиме само со апели, туку со конкретна помош и одговорна политика“, додаде таа.
Посебно внимание како што најави, посветено и на уредувањето на реката Вардар и кејот, како нов простор за рекреација и екологија.
„Ќе воведеме еко-патрола 24/7 долж Вардар, ќе уредиме пешачки и велосипедски патеки, нови зелени површини и ќе го направиме кејот гордост на Скопје. Тоа треба да биде место за дружење, не за отпад“, рече Шукова.
Таа го најави и проектот за зелени покриви на јавни згради.
„Во првата година – 10 зелени кровови кои ќе ја намалат урбаната топлина, ќе ја подобрат климата и ќе понудат нов јавен простор. Овие мали, но важни потези го прават градот попријатен и похуман“, порача кандидатката.