Македонија
Промовиран идеолошкиот и аналитички центар Conservative.mk

Во јавноста денеска беше промовиран идеолошкиот и аналитички центар Conservative.mk. Станува збор за платформа која претставува идеолошки и аналитички центар и која во себе спојува политички и граѓански активисти, чија примарна идеологија е конзерватизмот како десно или центар-десно политичка ориентација.
Дел од Conservative.mk се патриотскиот институт „Христо Узунов“, ВМРОпедија – онлајн енциклопедија за македонската револуционерна борба, УДАР – здружение на македонски патриоти и социјалниот медиум „Приказни од Булеварот“. Медиумски партнер на аналитичкиот центар е порталот „Трибуна“.
Промотивниот настан проследен од над 200 присутни, беше поделен на 2 дела, обраќања на дел од иницијаторите за создавање на платформата и дебата на тема: „Разбирајќи го конзерватизмот“.
Во првиот дел свои пригодни обраќања имаа: Александар Богоевски – главен уредник на интернет списанието „Conservative.mk“, Стјепан Покупец – уредник во „Conservative.mk“, Кристијан Мицкоски – управител на патриотскиот институт „Христо Узунов“ и Стефан Василевски – управител на платформата „Conservative.mk“.
Вториот дел од настанот беше дебатен и во него земаа учество: Петар Колев, претседател на Граѓанско демократска унија, проф. д-р Самоил Малчески, поранешен студентски лидер и политички аналитичар, Кристијан Шкварек – претседател на контролниот совет на Младински конзервативен клуб во Софија (Бугарија), политички аналитичар и автор во сајтот „Conservative.bg“ и Бобан Тотовски, претседател на Е-спорт федерација на Европа.
Специјални гости на настанот беа претставници на бугарската интернет платформа „„Conservative.bg“, на чело со главниот уредник на проектот, Николај Облаков. Настанот беше воден од Јована Спасевска, член на УК на Граѓанско демократска унија – ГДУ и дел од уредничкиот тим на „Conservative.mk“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.