Агенцијата за иселеништво на Република Македонија презентираше три нови проекти од значење за иселениците од Македонија во дијаспората. Станува збор за прирачникот за иселениците, сликовницата за изучување на мајчиниот јазик за децата на иселеници во дијаспората и новата интернет-страница на Агенцијата за иселеништво.

На промоцијата министерот задолжен за дијаспората, Едмонд Адеми, посочи дека иселениците се лојални граѓани во земјите во коишто живеат, творат и работат, но истовремено се и мост на поврзување меѓу Република Македонија и земјата на престојот. Тој додаде дека нема поголема заштита и промоција на сопствениот национален, културен и јазичен идентитет од тоа кога една Влада се грижи за новите генерации родени надвор од Македонија, да овозможи на овие генерации да им го зближи знаењето и учењето на мајчиниот јазик.

Дректорот на Агенцијата за иселеништво, Никола Шалваринов, посочи дека Агенцијата изработила соодветна илустрирана азбука во печатена и дигитална форма, како помагало за изучување на мајчиниот јазик, наменета за децата на иселениците, којашто на илустративен начин допира до најмладите и создава здрава основа за изучување на мајчиниот јазик.

Исто така, нагласи дека и останатите два проекта, прирачникот за иселеници и интернет-страницата на Агенцијата, се во духот за информирање и приближување на работата на Агенцијата до иселениците. Според Шалваринов, прирачникот за потребите на иселениците на јасен и недвосмислен начин ги појаснува правата, обврските и потребите коишто можат да ги остварат иселениците од Македонија. Од друга страна, со ребрендирањето на интернет-страницата, се овозможува лесен пристап до минатите, идните и моменталните  активности на Агенцијата, со што се дава соодветна слика за работењето коешто е од клучен интерес и за иселениците и за државата.

При изработка на трите проекти, Агенцијата за иселеништво добила поддршка од повеќе институции и Владата на Република Македонија.