Македонија
Професорите од УКИМ: Пријавата против ректорката Ангелова да биде приоритет за антикорупциската комисија

Професори на Универзитетот „Св. Кирил и Методиј“ бараат од антикорупциската комисија пријавата против ректорката, Билјана Ангелова, да биде приоритет.
Професорите во писмо до медиумите велат дека поминаа повеќе од дваесет дена од поднесувањето на пријавата за прекршување на законот од страна на ректорката на Универзитетот „Св. Кирил и Методиј“, проф. д-р Билјана Ангелова, до Државната комисија за спречување на корупцијата.
„Сето она што го наведовме во пријавата за нас укажува дека лицето Ангелова не само што со години го прекршува законот туку и личниот интерес и интересот на бизнисот го има поставено над интересот на Универзитетот. Дури и натаму перманентно се случува урнисување на УКИМ поради личните бизнис-интереси на Ангелова, за нас надеж дава јавно објавената информација дека Комисијата постапува по пријавата. Затоа и јавно апелираме до Државната комисија за спречување на корупцијата овој предмет да има приоритет бидејќи станува збор за работењето и за интегритетот на најстариот универзитет во земјата. Истовремено, апелираме до Комисијата да не подлегнува на обидите за притисок од лицето Ангелова за што сведочи и злоупотребата на името на УКИМ за негирање на фактите и јавно достапните информации и за своите одлуки да ја извести јавноста преку јавно соопштение или прес-конференција. Апелираме и до сите други надлежни институции да соработуваат со Државната комисија за спречување на корупцијата во врска со овој предмет и за сите наводи да постапат во рамките на своите надлежности за да се заштити Универзитет ‘Св. Кирил и Методиј’ во Скопје“, се вели во писмото.
Се додава дека Ангелова од позиција на проректор и сега ректор на Универзитетот вршела и врши настава и на приватни т.н. академии, па уште еднаш јавно прашуваат: „Дали за Ангелова бизнисот со приватни академии е поважен од државниот УКИМ, кој затоа тоне? Дали Ангелова свесно го урнисува УКИМ со фаворизирање на приватниот бизнис?“
Професорите велат и дека само два дена по нејзиниот избор за ректор на УКИМ, јавно, со реклама и видеообраќање, Ангелова повикува на упис на приватната „Прогресив академија“. Притоа и лажно тврди дека таа е единствената академија на која се стекнуваат знаења, кои се дел од првиот, вториот и од третиот циклус студии на Економскиот факултет во Скопје, но и дел од наставата на Економскиот институт.
Само десет дена пред од функцијата проректор за финансии да премине на функцијата ректор, велат професорите, таа е и водечкото лице за повикување за упис на приватната т.н. академија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.