Македонија
Публикуван научниот труд за екслузивното датирање неолитски локалитети во Пелагонија, коавтори се Гоце Наумов и Агате Рајнгрубер

Пунликуван е научниот труд за датирањето на неолитските локалитети во Пелагонија.
Овој труд е во коавторство на Гоце Наумов и Агате Рајнгрубер и е објавен во реномираното светско археолошко списание Documenta Praehistorica. Тој се базира на долгогодишните теренски истражувања на ЦИП во Пелагонија, а кои финализираа со хронолошко моделирање на добиените дати во Ајнштајновиот центар во Берлин.
Во овој труд, именуван како Dating the Early Neolithic in Pelagonia, сублимирани се сознанијата за датирањето на неолитските тумби во Пелагонија, добиени при радиокарбон-анализите на семиња од жито и животински коски. Во него првпат се посочува дека најраното појавување неолитски населби во Европа се случува во географска Македонија, при што опфатени се повеќе локалитети од Република Македонија и Република Грција, чии датирања се ревидирани со помош на хронолошки секвенции и примена на Бејзовото моделирање.
Притоа се истакнува и мошне важната улога на неолитскиот локалитет Влахо, кој, за жал, се соочи со уништување на неговата источна периферија и му е неопходна натамошна заштита. Овој локалитет се издвојува со една од најстарите неолитски дати во Европа (околу 6400 година пред новата ера), што го прави особено уникатен во светски рамки како поради датирањето така и поради единственото присуство на десетина ровови во населбата. Во прилог на овие аргументи изработени се повеќе хронолошки графикони, кои го потврдуваат временскиот опсег на Влахо во втората половина на 7 милениум пр. н.е., како и она на другите значајни неолитски населби во географска Македонија.
Трудот може бесплатно да се преземе на следните линкови, што е воедно и една од главните заложби на Центарот за истражување на предисторијата за достапност на научните сознанија до сите љубители на минатото:
https://journals.uni-lj.si/DocumentaPraehistorica/article/view/18831
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.