Македонија
Пуштена во употреба нова детска градинка во општина Илинден
Градоначалникот на Општина Илинден, Жика Стојановски и министерката за труд и социјална политика, Јагода Шахпаска ја пуштија во употреба новоизградената детска градинка во населено место Миладиновци, која е клон на ЈОУДГ „Гоце Делчев”.
Вкупната инвестиција за реализација на овој капитален проект којшто општина Илинден го реализира во соработка со Министерството за труд и социјална политика изнесува 33 милиони денари, од кои од буџетот на општина Илинден се обезбедени 27 милиони денари за фазите: архитектура, изградба на новиот објект и обезбедување на комплетна инфраструктура, хортикултурно и партерно уредување како и асфалтирање на паркинг просторот пред градинката.
За опремување на занималните, просториите и кујната во детската градинката, како и поставување на машинска опрема за греење и ладење на објектот, Министерството за труд и социјалана политика обезбеди средства во висина од 6 милиони денари.
Поздравувајќи ги присутните и посакувајќи им успешна работа на вработените, министерката Јагода Шахпаска истакна дека предучилишното образование претставува темел врз кој младата детска личноаст се гради во иден ученик во основно, средно училиште, во академски граѓанин. Затоа, ни е важно секое дете, истакна министерката.
Градоначалникот на општина Илинден, Жика Стојановски, за време на отворањето на градинката истакна дека локалната самоуправа е истрајна во намерата да им обезбеди на најмладите граѓани најдобри можни услови за раст и развој и да обезбеди среќно детство. Затоа, како што кажа тој, Општината одлучи сите свои расположливи средства да ги насочи кон решавање на проблемот со недостаток на капацитет на постојниот објект на детската градинка „Гоце Делчев“ во Илинден.
Градинката е високо енергетски ефикасен објект во кој е инсталиран систем за греење и ладење со топлински пумпи кој ги задоволува највисоките стандарди. Објектот на новата градинка се простира на површина од 540 м2, располага со 4 занимални и има капацитет да згрижи 90 деца. Во насока на почитување на протоколите во овој период градинката ќе згрижува 75 деца.
Во три занимални ќе бидат згрижени деца на возраст од 2 до 6 години додека во една занимална ќе бидат згрижени најмалите дечиња на возраст од 9 месеци до 2 години што значи воведување на јасли. Со новоизградената градинка ќе се овозможи ослободување на просторни капацитети во постоечката детска градинка „Гоце Делчев“ во Илинден, која е со капацитет за згрижување на 450 деца на возраст од 2 до 6 години, такашто се создадени услови за згрижување на деца од јаслена возраст и во оваа градинка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Енергетиката е поставена високо на државната агенда, не како техничко прашање, туку како национален приоритет
Енергетиката е поставена високо на државната агенда, не како техничко прашање, туку како национален приоритети државна стратегија, рече премиерот, Христијан Мицкоски, на отворање на 14-ти Меѓународен форум за енергетика и одржлив развој што од денеска до 30 октомври се одржува во Скопје.
„Фактот што денес овде во Скопје се води оваа глобална дискусија, покажува дека регионалната енергетска иднина може – и треба – да се гради токму тука во нашата земја. Ова е нашата прилика да покажеме дека земја со мала површина може да има големо влијание – кога има јасна визија, решителност и лидерство. Сакам да ја истакнам улогата и визионерството на министерката за енергетика која е решена да ги придвижи работите за кратко време, да ги забрза процесите и да не дозволи Македонија да заостанува во трката со времето. Како човек кој самиот доаѓа од енергетскиот сектор, добро знам колку е важно тоа чувство на постојано движење, на промена и на одговорност. Затоа енергетиката е поставена високо на државната агенда – не како техничко прашање, туку како национален приоритет и државна стратегија“, рече Мицкоски.
Според Мицкоски, енергетската стабилност не е веќе само економско, туку и безбедносно прашање. Тој вели дека глобалните турбуленции нè потсетуваат дека енергетската независност е услов за економска слобода.
„А без слобода — нема развој, нема стабилност, нема ниту достоинство. Нашата Влада стои цврсто зад реформите што ги спроведува Министерството за енергетика, но уште поважно – ја гради врската меѓу политиката и визијата. Нашата визија е јасна: да ја подготвиме за иднината државата – за климатските предизвици, за технолошките промени и за глобалните ризици“, рече Мицкоски.
Премиерот рече дека од Скопје денес испраќаме порака дека одржливата енергија не е политички избор, туку морална обврска кон идните генерации.
Македонија
Богдановиќ објави видео од метежот во Центар: За 4 години издадени се 400 одобренија, има над 150 активни градилишта
За 4 години издадени се 400 одобренија за градба, има над 150 активни градилишта во Центар, вели поранешниот градоначалник на Општина Центар, Саша Богдановиќ. Тој објави видео на социјалните мрежи од метежот во Центар велејќи дека ова е денешната слика: луѓе доцнат на работа, ученици доцнат на училиште, а децата доцна се носат во градинки.
„7:52 наутро улица Васил Ѓоргов, населба Капиштец.
Кога се ревидираа плановите се дисциплнираа градбите и во најголем дел во соработка со граѓаните се усогласувавме каде има простор да се гради а каде не се со цел подобрување на условите за живот на секој центарец. За 4 години се кажува дека се издадени (податок од дебатите за локални избори) скоро до 400 одобренина (не се сите за згради има и за реконструкции, кровови итн) но, факт е дека има над 150 активни градилишта. Многу одобренија се издадени за кратко време а притоа се сменети само 3 плана и никаде не се сменила инфраструктурата. Ревидирањето на плановите (вкупно 9 се ревидираа) донесе да се намалат скоро 14.000 м2 за градба и да многу објекти кои беа на државно земјиште да се пренаменат во: градинка (како градинката во Пролет) паркови и игралишта (како паркот за велосипеди пред Олимписки базен) да се прошират зелени површини и површини за игралишта школи и градинки.
Денес го имаме ова. Луѓе доцнат на работа, ученици доцнат на училиште а децата доцна се носат во градинки“, напиша Богдановиќ.
Македонија
Шанса за Центар со критика за Герасимовски: Одлучен е во изборната кампања до последна трошка да ги исцеди општинските ресурси
Граѓанската иницијатива „Шанса за Центар“ го искритикува актуелниот градоначалник на Општина Центар и кандидат за втор мандат од СДСМ, Горан Герасимовски по повикот до центарци денес да присуствуваат на првиот буџетски форум за 2026 година.
„Овој градоначалник е одлучен во изборната кампања до последна трошка да ги исцеди и општинските ресурси и самата општина како јавна институција во своја лична корист.
Откако изнареди прескапи игралишта, ископа дупки од илјадници евра како да се за ископ на дијаманти, изнареди клупи и канти наместо да ги поправи претходните, сега на неколку дена од гласањето си организира и нешто што само тој си го нарекува општински буџетски форум. А тоа во суштина е светлосни години далеку од тоа што треба да биде буџетски форум.
За ‘Форумите во заедницата’ и со тоа и за ‘Буџетските форуми’ има јасни правила како се одржуваат утврдени од ЗЕЛС за што повеќе пати му е укажано, а не сака да го прифати. Процесот со форумите треба да почне месеци претходно, да има стручни независни модератори, одвоен општински буџет, работни групи…
Но ете падна толку ниско што сака и нив да ги злоупореби за кампања. Буџетски форум најавен од вчера за денес. Форум ли е, митинг ли е во просториите на училиште?“, стои во објавата на „Шанса за Центар“ на „Фејсбук“.
Герасимовски вечерва со почеток во 19.30 часот во основното училиште „Киро Глигоров“ ги повика центарци да присуствуваат на првиот буџетски форум за 2026 година и заедно да го креираат буџетот, да дадат предлози и иницијативи што ќе придонесат за подобар и поквалитетен живот во општината.
„Шанса за Центар“ во првиот круг ја поддржа независната кандидатка за градоначалничка на Општината, Билјана Ивановска, предложена од група избирачи. Таа освои 4.465 гласови и не влезе во вториот круг во кој центарци ќе избираат меѓу Горан Герасимовски од СДСМ кој во првиот круг освои 8.535 гласа и Мирослав Лабудовиќ од Движењето ЗНАМ – За наша Македонија кој имаше 5.707 гласа.

