Преку Министерството за енергетика, минерални суровини и рударство е распишан јавен повик кои што можат да аплицираат оние семејства кои што ги исполнуваат условите за субвенционирање на сметките за електрична енергија.

Премиерот Христијан Мицкоски рече дека за таа цел се превидени повеќе од 40 милиони денари, одговарајќи на новинарско прашање дали владата ќе ги субвенционира ранливите граѓани во покривање на трошоците за електрична енергија.

Мицкоски нагласи дека Македонија има најниска цена на електричната енергија, што не е случај со државите од соседството кои што имаат зголемување на цената на струја од 15, 20 па и 30 проценти.

„Но, она кое што исто така можам да го кажам во многу период на регулирање на електричната енергија откако е оваа Влада 14 месеци, ние немаме покачување на електричната енергија за домаќинствата што не е случај во околината.

Ако ги гледате другите држави ќе видите дека таму електричната енергија е покачена, 15,20 па во некои држави од соседството и 30 проценти. Така што и според Евростат и според сите параметри ние сме држава во Европа која што има најниска цена на струја за или една од двете, трите најниски цени за електрична енергија за домаќинствата.“, посочи премиерот Мицкоски.

Царинските инспектори при Секторот за контрола и истраги при контрола на 21 увоз на месо од увозник открија царинска измама во висина од седум милиони денари.

Дополнителната контрола на приложените царински документи, како и лабораториските анализи, покажаа дека месото било пријавувано во погрешна тарифна ознака со пониска царинска стапка наместо во соодветната тарифна ознака со повисока стапка.

Против сторителите е поднесена кривична пријава за царинска измама, а донесени се решенија за дополнителна наплата на избегнатите давачки во висина од седум милиони денари.

Царинската управа ќе продолжи со мерки за заштита на финансиските интереси на државата и обезбедување фер конкурентност на пазарот.

По распишувањето на локалните избори, што ќе се одржат на 19 октомври 2025 година, одново се активира координативното тело за постапување по претставки врз основа на Кодексот за однесување во онлајн-просторот за време на изборни процеси и референдуми како механизам за заштита и почитување на правото на слобода на изразување и информирање, загарантирано со членот 10 од Европската конвенција за заштита на човековите права и основни слободи и македонските закони.

Поединци, институции, невладини организации, политички партии или независни кандидати може да поднесат жалба до координативното тело доколку сметаат дека во врска со изборниот процес се шират дезинформации, говор на омраза, дискриминација, злоупотреба на личните податоци или, пак, прекршување на Кодексот на новинарите на Македонија и насоките за етичко известување на онлајн-медиумите. Електронската адреса за поднесување претставки е: [email protected].

Координативното тело е составено од претставници на Агенцијата за аудио и аудиовизуелните медиумски услуги (АВМУ), Здружението на новинарите на Македонија (ЗНМ), Советот за етика во медиумите на Македонија (СЕММ), Македонскиот институт за медиуми (МИМ), Институтот за комуникациски студии (ИКС) и Фондацијата „Метаморфозис“. За координаторка е избрана Билјана Георгиевска, директорка на Советот за етика во медиумите на Македонија, а заменичка-координаторка е Оливера Војновска од Фондацијата „Метаморфозис“.

Кодексот за однесување во онлајн-просторот за време на изборни процеси и референдуми, усвоен во септември 2023 година, се однесува на политичките партии, нивните кандидати и независните кандидати во онлајн-просторот (вклучувајќи и на социјалните мрежи), интернет-изданијата на радиодифузерите, онлајн-медиумите, проверувачите на факти, инфлуенсерите и други субјекти што може да извршат влијание врз граѓаните и нивното гласачко право.

Почитувањето на Кодексот се очекува да обезбеди интегритет на информациите во текот на изборниот процес, транспарентност на политичкото рекламирање, безбедност на личните податоци и спречување ширење дезинформации, говор на омраза, ксенофобија, нетрпеливост, страв или тензии што ја поткопуваат демократијата.

Во изминатите две години кон Кодексот пристапија три политички партии: Левицата, Европската демократска партија и Партија на пензионерите, како и 21 медиумска организација (ТВ „Алфа“, ТВ „Коха“, ТВ „Тера“, ТВ „Дуе“, ТВ „Кочани ЛД“, ТВ „Спектра“, Радио Блета, Радио Кочани, Радио Вати, Радио Комета, весникот „Коха“, „Спорт 1“, „4 њуз“, „Екипа“, „Радовиш њуз“, „Гостиварисот“, „Флака“, „Макпрес“, „Одлучисе.мк“, „Порталб“ и „360 степени“.

Координативното тело ги охрабрува сите субјекти на кои се однесува Кодексот да се приклучат заложувајќи се за почитување на неговите одредби, со што ќе помогнат локалните избори да се одржат во фер и демократска атмосфера. Пристапицата кон Кодексот се наоѓа онлајн на: пристапување кон Кодексот – изборен кодекс. Повеќе детали прочитајте на: Кодекс за однесување во онлајн-просторот за време на изборни процеси и референдуми.