Македонија
Пуштен во употреба реконструираниот спортско-рекреативен полигон во дворот на ООУ „ Ѓорѓија Пулевски”

Градоначалникот Тимчо Муцунски заедно со директорот на ООУ ,,Ѓорѓија Пулевски” Марјан Јовановски официјално го пуштија во употреба на целосно реконструираниот спортско-рекреативен полигон во дворот на основното училиште.
Настанот го отвори директорот на училиштето кој додели благодарници на донаторот, партнерите и градоначалникот, а истовремено ги претстави и новите содржини во кои можат да уживаат учениците, но и сите жители на Аеродром.
На полигонот кој е еден од ретките во градот со едукативен карактер, беа поставени десетици нови сообраќајни знаци, хоризонтална сигнализација, како и хортикултурно уредување на целиот простор. На застареното фудбалско игралиште е поставен нов асфалт, додека пак игралиштето за кошарка доби нова подлога. Со ова, значајно се разубави нашиот училишен двор кој го користат стотици ученици и граѓани за спорт и рекреација, а се надеваме дека тоа ќе продолжи и во иднина, изјави директорот Јовановски.
Градоначалникот Тимчо Муцунски ги поздрави сите партнери кои се вклучија во активната реализација на овој проект и ја повтори заложбата на Општина Аеродром за инвестиции во најмладите. Тој ја потенцираше реализацијата на проектот „Велодром“, што значи целосно осовременување на велосипедските патеки низ општината, со што се поттикнува спортот и здравите навики, а истовремено се дава можност за едукација на најмладите.
Осовременување на условите во образванието, спортската и рекреативната инфраструктура се меѓу врвните приоритети на општината. Жителите на Аеродром добија едно современо катче каде ќе можат да спортуваат, а најмладите можат да ги учат сообраќајните правила, со што ќе се унапреди воспитно-образовниот процес на учениците и велосипедистите, запознавањето со сообраќајните правила и прописи, а сè со цел зголемување на нивната безбедност во сообраќајот. Истовремено, овој проект е од огромно значење во исполнување на нашето ветување за „Велодром“, со што се поттикнува користење на алтернативни средства за превоз, кое понатаму придонесува до зачувување на животната средина и здрав, активен начин на живот, изјави градоначалникот Муцунски.
Во рамките на проектот „Здрави навики за здрава околина“, спроведен од Центарот за истражување и креирање политики (ЦРПМ) и финансиран од Шведска преку Програмата за развој на Обединетите нации (УНДП), беа набавени и обезбедени 10 велосипеди кои беа донирани за потребите на учениците од „Ѓорѓија Пулевски“.
Поттикнати од долгогодишниот проблем со загадувањето на воздухот во Град Скопје, Центарот за истражување и креирање политики го реализираше овој проект. Проектот придонесува за идно мобилизирање на жителите на Аеродром за поголема физичка активност, а со тоа и менување на животните навики на граѓаните. Затоа, тука денеска ја заокружуваме оваа иницијатива со донација на 10 велосипеди за најголемиот велодром во Град Скопје, со што сме сигурни дека најмладите ќе изградат здрави животни навики, изјави Маја Варошлија од ЦРПМ.
Реконструкцијата се изврши со донација од општествено-одговорната компанија „ТОП БИЛД ДООЕЛ експорт – импорт Скопје“. За оваа намена се издвоија повеќе од 7 милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се евидентирани вкупно 22 пожари на отворен простор

На територијата на државава денеска до 18 часот се евидентирани вкупно 22 пожари на отворен простор, од кои 14 се активни, а по четири се под контлола и изгаснати.
Како што информираат од Центарот за управување со кризи (ЦУК), активни пожари има: во Општина Василево, Радовиш и Берово – с. Нивичино, планината Голем Готен и Малешевските планини (нискостеблеста шума, смрека, грмушки, ниска вегетација); Општина Прилеп 1 – с. Бешиште, Бешишки Рид, крак према с. Градешница и границата со Р. Грција (мешана шума); Општина Прилеп 2 – активен кракот кон с. Дрен, проширен кон с. Галиште (Кавадарци), додека делот помеѓу Царевиќ и Смолани е под контрола (мешана шума и ниска вегетација); Општина Македонски Брод – помеѓу с. Црешево, Локвица и Крапа (деградирана дабова шума, грмушки, ниска вегетација); Општина Желино – меѓу с. Церово и Групчин (нискостеблеста и деградирана шума); Општина Струмица – с. Баница и нас. Софилар (висока трева); Општина Петровец – с. Средно Коњаре, кај реката Пчиња (ниска вегетација и ниска шума); Општина Крива Паланка – с. Нерав (висока борова шума); Општина Старо Нагоричане и Куманово – с. Облавце кон с. Бењаковце (ниска вегетација); Општина Старо Нагоричане 2 – с. Руѓинце (ниска вегетација); Општина Куманово – нас. Бедиње (ниска вегетација); Општина Гази Баба – с. Трубарево (ниска вегетација); Општина Зелениково – с. Гумалево (ниска и мешана вегетација); и Општина Василево 2 – с. Сушево (ниска вегетација).
Под контрола се ставени пожарите во Македонски Брод 1 – с. Грешница (мешана шума и сува трева); Македонски Брод 2 – с. Латово (ниска вегетација и деградирана шума); Карбинци – с. Јунузлија (шума); и Штип – помеѓу с. Драгоево и Селце (нискостеблеста шума, прнар и сува трева);.
Изгаснати се пожарите во Струмица – м.в. Три Води (ниска вегетација и мешана шума); Василево – с. Василево (ниска вегетација); Струга – с. Калишта (ниска вегетација и ѓубриште); и Шуто Оризари – ул. Брсјачка Буна (дива депонија).
Македонија
Родителите на загинатите деца во „Пулс“ прашуваат до каде е постапката за полициските службеници за пожарот

Родителите на загинатите деца во пожарот во кочанската дискотека „Пулс“ на денешниот 16. Марш на ангелите пред зградата на Полициската станица во Кочани побараа одговор од ОЈО ГОК, кое ја води постапка за над 20 те полициски службеници од ОВР Кочани и СВР-Штип, до каде е истрагата за нив и формирање на обвинителен предлог.
-Сакаме да ги прашаме до каде е постапката на ОЈО ГОК или чекат одмори, да си одведат нивните деца на одмор, на вода, а ние на нашите деца врз гробовите да им фрламе вода за да ги освежеме. Блазе си им, нека им служи на чест, оти развлекуваат само, вели мајка на загинато момче.
На денешниот Марш на ангелите главната порака им беше „Слушнето го гласот на оние што повеќе не можат да зборуваат“. Родителите и семејствата на загинатите деца што учествуваа на протестниот марш се револтирани што нивниот настан денеска имаше убедливо најслаб одѕив. Револтирано им се „заблагодарија“ на поддршката на граѓаните и семејствата кои имаат настрадано деца, а денеска не учествуваа на маршот кој почна во 18.05 часот од Паркот на револуцијата, а заврши пред зградата на Судот и Обвинителството во Кочани.
Една од мајките пред зградата на Општина Кочани истакна дека на денешен ден се случи катастрофалниот земјотрес во Скопје, кој однесе голем број на човечки животи и направи материјални штета. Посочи дека на денешниот Марш на ангелите им одаваат почит на загинатите во земјотресот во Скопје во 1963 година, но истовреме се сеќаваат и на оние кои помогнале да се обнови градот Скопје.
Македонија
МВР во Охрид покажа вежба на спасување на вода и евакуација на патници од опожарен пловен објект

Со показна вежба на спасување на вода и евакуација на патници од опожарен пловен објект, како и со презентација на дел од опремата, возилата и другите материјално технички средства што ги користат полициските службеници при извршувањето на секојдневните задачи, попладнево во Охрид беше реализирана активноста на МВР насловена „До Вас, за Вас“.
Активноста е осмислена со цел приближување на полицијата до граѓаните, во рамки на концептот „Комјунити полисинг- Работа во заедницата“, подигнување на јавната свест за зголемена јавната безбедност во заедницата, спроведување едукативни и интерактивни активности со граѓаните поврзани со превенција и сузбивање на разните форми на криминал…
Министерот за внатрешни работи, Панче Тошковски, кој ги следеше активностите истакна дека со полициските службеници од повеќе оддели во рамки на МВР се презентираат активностите што ги преземаат, средствата што ги користи службата, начинот на спроведување на полициските активности и сите дејствија што се преземаат во рамки на редовното полициско работење.
– Еден од поводите за посетата на Охрид денеска е и заедничката соработка што ја имаме со српските полициски службеници во Охрид. Имаме четворица колеги од Србија кои во летниот период се заедно со нашите полицајци патролираат, си помагаат во рамки на сите дејствија што треба да бидат преземени, а се во делот на српските туристи. Ова е една убава прилика да поразговараме со нив за тоа како ги обавуваат нивните службени задачи тука, рече Тошковски.
Тој уште додаде дека македонската полиција е тука за граѓаните, да им обезбеди мирен престој во туристичките центри.
– Безбедносната сеостојба во Охрид е стабилна, а туристите можат да уживаат во преубавите туристички центри…Во рамки на летната сезона СВР – Охрид е потпомогната со полициски службеници од други центри. Така што и оваа година ќе бидеме подготвени да ги преземени сите дејствија и да одговориме на сите предизвици, рече тој.