Македонија
Разбиена група која крадела и во странство продавала македонско културно наследство

Основното јавно обвинителство за гонење организиран криминал и корупција, по неколкумесечна предистражна постапка, донесе наредба за истрага против осум лица, кои се занимавале со нелегална трговија со македонско културно наследство.
Како што информираат од Обвинителството, двајца од нив, кои во случајот ќе се водат како првообвинети, во периодот од мај минатата година до денес, со цел да стекнат противправна имотна корист, создале група, на која ѝ се придружиле и другите шестмина.
Осомничените одделно и заедно присвојувале и продавале предмети заштитени како културно наследство и природни реткости.
Употребувајќи сонди и детектори за метал, без дозвола од надлежен орган, испитувале локалитети на целата територија на државата.
Како ориентација користеле сателитски снимки, карти и рачно напишани текстови и преданија, а потоа со употреба на хилти, копачи и други градежни алати и градежна механизација правеле археолошки ископувања и минеролошко петрографски истражувања.
Откриените артефакти, иако знаеле дека потекнуваат од извршено кривично дело, ги присвојувале и ги прикривале на непознати безбедни локации или во своите домови.
Потоа стапувале во контакт со непознати лица припадници на групата, кои биле по потекло од Грција, Турција, Албанија, Хрватска, Србија и од САД и како на заинтересирани купувачи им ги продавале добрата по однапред договорена сума.
Купувачите артефактите ги изнесувале надвор од границите на Македонија, со што трајно го оштетиле археолошкото, историското, музејското и уметничкото истражување на државните научни институции и ѝ нанеле непроценлива штета на државата.
Осумтемина се осомничени дека со преземените дејства, освен злосторничко здружување, сториле и уште три други кривични дела: присвојување добра под привремена заштита или културно наследство или природни реткости, изнесување во странство добра под привремена заштита и прикривање.
Карактеристично за овие групи, освен што недозволено користат детектори за метал, сонди и други алати за скенирање на длабочина, со себе недозволено држат и оружје, па, така, некои од обвинетите сториле и кривично дело неовластено изработување, држење, посредување и тргување со оружје.
Групата оперирала на регистрирани и нерегистрирани археолошки локалитети, и тоа: Вртекица, Сливица, Герман, Белица, Горна Јаболчица – Кичевско, Долно Јаболчиште – Велешко, Мочурлива Вода, Чатал Камен, Туњ, Чиндиро Кале, Медов Дол, Градиште – Црно Езеро, Ломница, Ченгово Кале, Бајрамова Круша, Ивањевци, Болдовенци, Журче – Крушевско, Ловор, Лопатица и на други локации.
Во денешната акција спроведена од страна на МВР, под раководство на предметниот обвинител, при претрес на домовите на осомничените пронајдени се артефакти и предмети од културно наследство со непроценлива вредност, сопственост на државата, како и природни реткости и други скапоцени предмети прибавени со кривично дело и тие ќе бидат предадени на идентификација.
Воедно, приведени се сите осомничени и во текот на денешниот ден ќе бидат изведени пред судија на претходна постапка при Основниот кривичен суд Скопје.
Надлежниот обвинител, ценејќи дека се исполнети законските услови, до судија на претходна постапка ќе достави предлог за определување притвор за шестемина осомничени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Променливо облачно и студено со повремени врнежи од дожд, на некои од повисоките места дожд и снег

Променливо облачно и студено со повремени врнежи од дожд, на некои од повисоките места од дожд и снег, а на планините повремен снег. Ќе дува умерен до засилен северен ветер. Минималната температура ќе се движи во интервал од 2 до 7 степени, а максималната ќе биде во интервал од 4 до 11 степен.
Во Скопје, облачно и студено со врнежи од дожд, а на повисоките места од котлината со повремени врнежи од дожд и снег. Ќе дува засилен ветер од северен правец. Минималната температура ќе се спушти со 3, а максималната ќе достигне 7 степени.
Времето во наредните денови
Под влијание на циклонска активност нашата држава е зафатена од студен бран кој доаѓа од северните делови на континентот. Вкупно од овој бран се очекува на повеќе места да наврнат над 50 l/m² дожд. Денес на планините врнежите ќе преминуваат во снег, при што ќе се формира значителна снежна покривка. Поради натамошно спуштање на студен воздух, утре ќе има услови врнежите од дожд да преминуваат во снег и на некои од повисоките населени места. За време на викендот времето ќе биде стабилно со ниска утринска температура, а дневната ќе биде во благ пораст.
Македонија
Врнежи од снег и паднати дрвја на патот Никфорово-Леуново-Бунец, сообраќајот во прекин

На регионалниот пат Никфорово-Леуново-Бунец од 23:20 часот, сообраќајот е во прекин поради врнежи од снег и паднати дрва на коловоз, извести АМСМ.
Се интервенира за негово расчистување.
Во текот на денот и вечерва вработените од Ј.У.Н.П. „Маврово# со сопствена механизација, се вклучија во активностите за расчистување на паднатите дрва кои го отежнуваат движењето на автомобили по регионалниот пат Маврово – Дебар и околу Мавровското езеро.
Македонија
Петрушевски: Венко Филипче ти имаш фирми во Бугарија, на адреса со Заев каде се свртеа 9 милиони од јагленот од РЕК

„Вечерва Венко Филипче, пред 30-тина луѓе во мала сала во Кисела Вода, потрошил голем дел од својот говор за да ме навредува. Редно е да одговорам“, напиша на социјалните мрежи Бране Петрушевски од ВМРО-ДПМНЕ.
„Венко, најмалку ти имаш право кој било да го обвинуваш за „лажење“ и „бугаризација“. Јас немам бугарски пасош, немам фирми во Бугарија и немам тајни зделки зад грбот на народот. Ајде еднаш биди искрен и признај дека токму ти си синоним за милионски шеми со фирми во Петрич, заедно со браќата!
Не мора на мене, туку на јавноста дај и одговори: Каде завршија 9 милиони евра од јагленот за РЕК Битола? Зошто на иста адреса во Петрич се појавуваат фирми на твоето семејство и на Вице Заев? Дали тие пари завршуваа во ваши фотоволтаични централи, додека народот го оставивте да плаќа скапа струја? Дали преку бугарски фирми финансирате бизниси по светот, додека Македонија ја потонавте во сиромаштија?
Ова се вистинските прашања, Венко.
Не лажи дека јас или Христијан Мицкоски имаме такви врски. Ние немаме ниту бугарски пасоши, ниту скриени фирми. Ние имаме чесна и чиста биографија.
ВМРО-ДПМНЕ и Мицкоски се јасно определени за Македонија во ЕУ, но како достоинствена држава, без понижувања и без тргување со националните интереси.
Доста е од лицемерието Венко! На народот му е јасно дека додека си трупавте милиони преку Бугарија, граѓаните останаа со празни џебови“, вели Петрушевски.