Македонија
Ристески: Оваа Влада продуцира само криминал, затоа бргу ќе си оди, а потоа и ќе одговара

Пратеникот Петар Ристески на денешната собраниска седница зборуваше за тоа колку сите граѓани во државата не се исти и сето тоа благодарение на власта.
„Интересна ми беше тезата и која подолго време е наметнувана од апологетите на власта во медиумите и на социјалните мрежи дека сите се исти. Ајде преку пластични примери да видиме колку и дали сите се исти и кој за што се залагал и за што гласал и ќе гласа во овој период. Со какви личности функционерите влегувате со коалиција, почитувани колеги од Алијансата за Албанците, еве влегувате со генерални секретари на Владата, двајца на број, кои беа фатени во криминал и сега се влечат по судови. Но, на прашањето од каде ги стекнал средствата еден од нив за да изгради толку луксузна хациенда и да вози скап џип од 100 илјади евра, безобразно не сакаше ни да се скрие ни да се правда пред народот, пред јавноста рече дека парите ги добиле неговите деца за роденден. Јас би прашал, овие дечиња на возраст од 1до 2 години, кои славеле роденден, гледам дека не сме сите исти, бидејќи нашите деца на таа возраст проодуваат, прозборуваат, а овие домаќини на родителот инвестирале во хациенди, си купиле нов џип од 100.000 евра, е па воопшто не сме сите исти“, рече пратеникот.
Ристески во текот на своето обраќање посочи дека за тоа дека сите граѓани не се исти покажува и фактот што сите министри во Владата имаат регистрирано некакви фирми.
„Сите со ред што треба да седат на оваа страна, министри во Владата, сите имаат некакви фирми регистрирани, кој за производство на марихуана, кој со трговија со струја, кој за фотоволтаици и слично. Синот на бившиот премиер на 18 години си отвора фирма за трговија со струја кога сите други негови врсници размислуваат како да се запишат на факултет, како да положат матура. Синот на претседателот на Собранието уште пред да ги заврши студиите си положил правосуден испит, воопшто не сме исти. Никој друг, освен оние привилигираните, селектираните членови на ДУИ и на власта – 449, кои положиле правосуден испит пред да завршат дипломски студии“, изјави тој.
Ристески порача дека повеќе од очигледно е дека оваа власт продуцира само криминал и дека многу бргу ќе си оди и на крајот, ќе одговара.
„Ова е срамота, а не да ни зборувате преку вакви примери дека ќе бидете коалиција за Европа, коалиција што ќе се справела со криминалот и корупцијата. Оваа власт продуцира криминал и затоа бргу ќе си оди, ќе ги изгуби изборите, а потоа и ќе одговара“, порача тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
АМСМ: Зголемена фреквенција на возила, но на граничните премини без гужви

Сообраќајот на државните патишта утрово се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е умерен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Сончево време, попладне локален дожд

Времето денеска ќе биде сончево со мала до умерена локална облачност. Попладне и во вечерните часови ќе има услови за изолирана појава на нестабилност со пороен дожд и грмежи. Ќе дува слаб до умерен, попладне во западните делови повремено засилен ветер од западен, а долж Повардарието од северен правец, информира УХРМ.
Минималната температура ќе биде во интервал од 13 до 22, а максималната ќе достигне од 30 до 37 степени.
Во Скопје, сончево со мала до умерена облачност. Попладне во делови од котлината ќе има услови за умерен развој на нестабилна облачност со краткотраен пороен дожд и грмежи. Ќе дува слаб до умерен, попладне повремено засилен северен ветер. Минималната температура ќе се спушти до 19, а максималната ќе достигне до 36 степени.
До четврток ќе преовладува променливо облачно и посвежо време со услови за локална појава на нестабилност со пороен дожд и грмежи. Ќе дува умерен до повремено засилен северен ветер, а дневната температура ќе биде во опаѓање.
Од петок се очекува постепен пораст на температурата.
Македонија
Без струја делови од Аеродром, Петровец, Илинден и Карпош

Без струја денеска ќе останат делови од општините Аеродром, Петровец, Илинден и Карпош.
Од ЕВН Македонија АД известија дека на ден 28.07.2025 година ( понеделник ) без електрична енергија ќе останат:
– во периодот од 08.30 до 12.30 часот, корисниците од ул. Тодор Чангов – крак 49 ( општина Аеродром ) како и корисниците од селата Кожле, Летевци, Бадар, Горно Блаце, Катланово и Градманци. ( општина Петровец )
– во периодот од 09.00 до 12.00 часот, дел од корисниците во село Мршевци, објектите на фирмите Фреш Фарм, Солар Ентра, Мијак, Си Мао и Солант, како и корисниците од селата Бунарџик и Ајватовци. ( општина Илинден )
– во периодот од 10.00 до 14.00 часот, дел од корисниците од ул. Нерешка. ( општина Карпош )