Македонија
(Видео) Рот на средбата со Димитров: Германија e на ваша страна

Вицепремиерот задолжен за европски прашања, Никола Димитров, денеска беше домаќин на германскиот министер за Европа, Михаел Рот, кој се наоѓа во дводневна посета на Северна Македонија.
Како што информираат од Секретаријатот за европски прашања, на средбата Димитров се осврнал на главните реформи во контекст на европската интеграција, како и иницијативите за отстранување на пречките за усвојување на преговарачката рамка и одржување на првата меѓувладина конференција.
„Предлогот од португалското претседателство со Советот на Европската Унија од наша страна беше оценет како добра основа за конечно решение. Јас сум убеден дека со добра волја од двете страни можеме да најдеме едно европско решение коешто ќе се темели на европските принципи. Имаме многу заеднички интереси, често зборуваме за заедничка историја, меѓутоа треба да работиме и за заедничка европска иднина. Така што ако мислиме на сѐ ова што нѐ поврзува, и на македонско-бугарското пријателство, мислам дека со добра волја и пристап од двете страни ова е возможно. Имаме одговорност спрема сегашната генерација, имаме одговорност спрема идните генерации. Мора двата соседа да бидат победници затоа што статус квото, одолговлекувањето на проблемот, прави од нас губитници“, порачал македонскиот вицепремиер.
Министерот Рот истакнал дека од германска страна постои решителен став за неодложно отворање на пристапните преговори, кои, како што рекол, одамна се заслужени.
„Ние за време на германското претседателство со Советот на ЕУ се обидовме да постигнеме голем напредок бидејќи вие драги Македонци тоа го заслуживте. Вашата земја постигна голем напредок, се охрабривте да решите еден голем историски спор и легитимно е да очекувате ние од страна на ЕУ да ги исполниме нашите ветувања. И сакам да Ви ветам дека не е само Германија на вашата страна, туку дека и партнерите во ЕУ исто како и претходно се за конкретна перспектива за сите, се чувствуваат обврзани за конкретна перспектива за сите земји од Западен Балкан. Сега работиме на тоа, сега за време на португалското претседателство со Советот на ЕУ тоа да може да успее и јас сум оптимист. Цврсто сум убеден во тоа дека ако сега не испорачаме како ЕУ, дека тогаш оваа динамика, оваа доверба ќе биде изгубена“, нагласил германскиот министер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Претседателката на Советот на Општина Битола ќе се кандидира за градоначалничка

Актуелната претседателка на Советот на Општина Битола од независната граѓанска иницијатива „Поинаку“, Габриела Илиевска, утрово објави дека како независна ќе се кандидира за градоначалничка на Битола.
Таа ги повика граѓаните да се приклучат против, како што вели, 30-годишното запоставување на градот.
„Добро утро Битола! После сите шпекулации, написи, приказни, плукања, честитки … еве да расчистиме!
Ве повикувам сите битолчани, без разлика дали сте симпатизери или членови на било која политичка партија, гласачи досегашни на било која политичка опција, досегашни “негласачи” … сите… кои сакате да живееме во …поуба, почиста, непартиска, независна Битола. Да ме поддржите за независен , кандидат за градоначалник и да се приклучите кон фронт против 30 и кусур годишното запоставување на градот. Или сите заедно против партиското уништување на Битола или ќе му остајме да не уништуваат. Без уцени за работни места! Без уцени за тендери! Без уцени за директори! Без заплашувања, прв пат Битола ќе има шанса да одлучи кој ќе ја води во следните 4 години“, напиша Илиевска.
Македонија
„Еразмус+ под раководство на Димова во служба на СДС, Фрчкоски, кој јавно го навредува македонскиот народ, награден со 200 илјади евра“, велат од ВМРО-ДПМНЕ

„Криминалот и корупцијата се врежани во матрицата на СДС. Со секој изминат ден на виделина излегува криминалот и корупцијата кои СДС го правеле низ институциите. Власта и управувањето на институциите им служеле единствено да ги задоволат нивните партиски потреби“, велат од ВМРО-ДПМНЕ.
„Таков класичен школски пример на злоупотреба на институцијата и проневера на финансиските средства за задоволување на поединци, блиски до СДС е Агенцијата Еразмус+. Љубомир Фрчкоски, кој важи за протеже и гласноговорник на СДС за навредување и омаловажување на македонскиот народ, бил награден од Агенцијата со 200 илјади евра.
Во време на Зоран Заев и Лидија Димова од Еразмус+, Фрчкоски добил грант вреден 200 илјади евра преку програмата ,,стратешко партнерство”.
Имено, два месеци по неговото назначување за ректор на еден факултет, благодарејќи на добро познатите блиски врски на Фрчкоски со СДС, институцијата го добива првиот грант во неговата историја.
Скандалозно во овој грант е тоа што половина периодот додека траел проектот Фрчкоски бил амбасадор во ОН во Њујорк односно, проектот траел од 01.12.2020 година до 30.11.2023 година, а амбасадорскиот мандат му започнал од 20.04.2024.
Се поставуваат прашањата, како Фрчкоски го работел овој проект како амбасадор и кој го евалуирал? Дали некој од Агенцијата вршел контрола за тоа како се води токму овој проект и зошто проектот не бил прекинат кога Фрчкоски бил испратен за амбасадор во ОН?
Ова само потврдува дека со парите од Еразмус+ СДС го плаќале Фрчкоски за тој да одработува за нив, да ги брани и поддржува по телевизии и по потреба да вреѓа и омаловажува неистомисленици, како и македонскиот народ.
Овој пример само покажува дека на СДС партискиот интерес им бил над државниот и тоа е нивниот начин на работа“, соопшти ВМРО-ДПМНЕ.
Македонија
(Фото) Герасимовски изврши увид во училиштето Димитар Миладинов: Целосно ги реконструираме фискултурната и свечената сала

Градоначалникот на Општина Центар, Горан Герасимовски, направи увид во реконструкцијата што се одвива во ООУ „Димитар Миладинов“, каде во тек е целосно обновување на фискултурната сала, свечената сала и меѓупросторот меѓу нив.
Во фискултурната сала се заменува целиот под со нов паркет, се обновуваат ѕидовите и плафонот, се поставуваат енергетски ефикасни светла и се оспособуваат прозорците, додека свечената сала добива целосно нова бина, нови скалила, обновен паркет и подобрени услови за користење, извести Општината.
„Подобрувањето на училиштата останува еден од нашите клучни приоритети. Со реконструкцијата во училиштето „Димитар Миладинов” создаваме современи, безбедни и инспиративни простори во кои децата ќе можат да учат, да спортуваат и да се развиваат. Инвестицијата во нивното образование и здрав развој е инвестиција во иднината на Центар“, изјави градоначалникот Герасимовски.
Реконструкцијата на Свечената сала, предвидува целосно нова бина и нови скалила, а постоечкиот паркет се струга и лакира. Во тек се молерисувањето на ѕидовите, замената на плафонските светла со штедливи, оспособувањето на прозорците за отворање и отстранување на стара остава со непотребен материјал.
Паралелно, се работи и на меѓупросторот, каде се заменува оштетениот под и се изведуваат молерисувачки зафати, се додава во соопштението од Општината.