Македонија
(Видео) Сведочење за „Насилство во Центар“: Полицијата имаше наредба да не реагира

На денешното рочиште за предметот „Насилство во Центар“, сведокот Јован Тагасовски, поранешен советник во Општината од СДСМ, рече дека слушнал разговор помеѓу претставник на ОБСЕ и полицијата додека се случувале немирите. Според неговото сведочење, претставникот на ОБСЕ го запрашал припадникот на МВР зошто не преземаат ништо, а на тоа полицаецот му одговорил дека имаат наредба да стојат тука и да не прават ништо.
Тагасовски исто така истакна дека при неговото доаѓање во Општината забележал толпа граѓани во дворот, кои ги прашал што бараат тука. На тоа граѓаните одговориле дека се од ВМРО-ДПМНЕ и дека се наоѓаат пред Општината за да ги спречат комуњарите да ја урнат црквата „Свети Константин и Елена“. Поранешниот советник на СДСМ сведочеше дека за време на двете седници на 7 и 10 јуни, додека траеле немирите, граѓаните се обиделе да влезат во Општината потмогнати од советниците на ВМРО-ДПМНЕ, кои, како што вели Тагасовски, не се ни обиделе да им објаснат на насобраните граѓани дека на дневен ред нема никаква точка за рушење на црквата.
„Граѓаните се однесуваа насилно, фрлаа кон нас со тврди предмети, камења, јајца, шишиња. Нè пцуеја и ни се закануваа“, рече Тагасовски.
На прашање на обвинителката Фатиме Фетаи дали препознава некој од обвинетите кои се во судницата, а биле дел од протестите, тој не сакаше да одговори.
На денешното рочиште сведочеше уште еден советник од СДСМ, Дарко Атанасовски, кој исто така рече дека за време на немирите имало полиција во Општината, но не презела ништо и покрај нападите и пцостите и обидот толпата да влезе во Општината. Атанасовски истакна дека за време на седницата советниците од ВМРО-ДПМНЕ телефонски комуницирале со граѓаните што биле надвор. Меѓу другото, Атанасовски исто така потврди дека на дневен ред немало никакво рушење на црквата.
Запрашан дали препознава некој од обвинетите присутни во судницата, тој одговори дека препознава тројца, од кои едниот го кажа со име – Александар Трајкоски, а другите само ги поосочи.
Следното рочиште на кое како сведоци се повикани Никола Георгиевски и поранешниот претседавач со Советот на Општина Центар, Мирослав Шиповиќ, е закажано за 30 август.
Во овој предмет на СЈО се обвинети експремиерот Никола Груевски, поранешниот министер за транспорт и врски, Миле Јанакиески, пратеничката на ВМРО-ДПМНЕ, Даниела Рангелова, и уште девет лица. На претходните судења вина признаа четвртообвинетиот Томислав Лазаров и петтообвинетиот Јордан Ристевски и добија условни казни.
Обвинетите се товарат за поттикнување насилство, кое се случи при протестите пред Општина Центар во јуни 2013 година.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
ДПМНЕ и Арсовска го држат Скопје во хаос, вели Шукова и ветува крај на блокадите
Кандидатката за градоначалник на Град Скопје од СДСМ, Каја Шукова, денеска упати жестоки критики кон ВМРО-ДПМНЕ и актуелната градоначалничка Данела Арсовска, обвинувајќи ги дека со години ги блокираат проектите од витално значење за градот.
„Секојдневно гледаме како капитални проекти кои се клучни за скопјани стојат заглавени поради политички игри, опструкции и незаинтересираност за реалните потреби на граѓаните“, изјави Шукова во посета на Карпош.
Таа како пример го посочи булеварот од мостот кај Љубљанска до улицата Скупи, кој според неа е од огромно значење за растоварување на метежот и подобро поврзување на Карпош со остатокот од градот.
„Сè е готово – проектна документација, експропријација, дури и обезбедени 190 милиони денари. Единствено се чека дозвола од Министерството за култура за теренски истражувања. Но веќе две години, блокада и застој!“, потенцираше Шукова.
Таа најави дека како идна градоначалничка ќе се заложи целосно да ја деблокира изградбата на овој булевар и мост, како и сите други стопирани проекти што им се потребни на граѓаните.
„Како ваша градоначалничка, ќе направам сè во моја надлежност оваа блокада да заврши. Ќе инсистирам истражувањата веднаш да завршат и да ја почнеме изградбата. Граѓаните одамна заслужуваат современа, функционална и европска инфраструктура и ќе ја добијат!“, порача Шукова.
Македонија
Уценетиот Таравари како млада невеста, не знае кој пат да го фати, велат од ВМРО-ДПМНЕ

„Уценетиот Таравари на крајот ќе се откаже од самиот себе, како млада невеста што не знае кој пат да го фати“, се наведува во најновото соопштение на ВМРО-ДПМНЕ, со кое партијата остро реагира на последните изјави на лидерот на Алијансата за Албанците.
Според ВМРО-ДПМНЕ, Таравари два пати влегол и излегол од владината коалиција, како невеста која постојано ја прекинува свадбата – еднаш со аплаузи, другпат со навреди.
„Денеска ВМРО-ДПМНЕ му е ‘злото’, а пред само два месеца со истото тоа ВМРО-ДПМНЕ гордо седеше во Владата. Ако тогаш не бевме зло, зошто сега одеднаш сме?“ прашуваат од партијата.
ВМРО-ДПМНЕ потсетува на неколку клучни датуми:
Февруари 2024: Таравари самиот изјави дека и ВМРО-ДПМНЕ и СДСМ го гледале како посакуван партнер, а од Али Ахмети добивал понуди за „прв албански премиер и претседателски кандидат“.
23 јуни 2024: Владата беше изгласана со коалиција меѓу ВМРО-ДПМНЕ и блокот „Вреди“, што беше голема победа над, како што велат, „матрицата на криминализираната ДУИ“.
Мај 2025: Алијансата на Таравари ја напушти коалицијата поради „неисполнети ветувања“, иако дел од неговата партија остана во Владата. „Значи проблемот не е идеологија, туку нешто друго. Можеби уцена?“ се вели во реакцијата.
Од ВМРО-ДПМНЕ наведуваат и бројки кои, според нив, покажуваат стабилизација:
– индустриско производство +4.1% (јули 2025 во однос на јули 2024),
– просечна бруто плата +8.5% (јуни 2025 на годишно ниво),
– реална плата +3.8% поради стабилизирана инфлација,
– инфлација 3.7% (јули 2025), далеку од двоцифрените пикови во време на СДСМ и ДУИ.
„Овие факти покажуваат дека државата оди напред, а не назад. Нема катастрофа, туку стабилизација.“
На крај, партијата порачува:
„Вистинското зло не е ВМРО-ДПМНЕ, туку лицемерието и двојниот стандард на Арбен Таравари. Секогаш кога не му даваат функција, одеднаш открива дека партнерот е зло. Прашањето е: со што е уценет Таравари и колку пати уште ќе ја продава истата приказна“?
Скопје
Османи од Чаир: Поддршка за самохрани мајки, жени во ранливи категории и претприемачки

Под мотото „Жените ја движат промената“, денес во Чаир беше претставен пакет мерки кој, според кандидатот за градоначалник Бујар Османи, отвора ново поглавје на реална грижа и поддршка за жените – вистинските хероини на секојдневието.
Османи истакна дека Фондацијата „Раката на Чаир“ ќе биде основата на овој пакет и ќе обезбедува финансиска и социјална помош за самохрани мајки, жени од ранливи категории и сите оние кои, како што рече, „општината предолго ги заборавала“.
„Ова е симбол на реална грижа, а не декларативна солидарност“, порача Османи, најавувајќи голем број мерки кои треба да ја зајакнат женската моќ во Чаир.
Клучните мерки од пакетот „Жените ја движат промената“ вклучуваат:
– Фондација „Раката на Чаир“ за директна помош на жените во потреба.
– Центар за занаетчиска обука со сертификати и професионални квалификации.
– Финансиска поддршка за микро-бизниси и почетна помош за жени претприемачки.
– Соработка со чаршијата и училиштата за пренос на традиции и вредности.
– Организација на четири годишни саеми на ракотворби и традиционални производи.
– Центар и Клуб за жените на Чаир со простор за менторство и обуки.
– Курсеви и микро-грантови за јазици, правна и репродуктивна едукација, финансиска писменост и вработување.
„Сакам жената од Чаир да биде економски независна, општествено влијателна и политички гласна. Сакам општина што нема да се плаши од женската моќ. Промената започнува токму овде – и таа промена ќе ја водат жените“, истакна Османи.