Македонија
СДСМ: Братот на Миленко добивал субвенции од претходната власт за чување кози

Социјалдемократскиот сојуз на Македонија преку соопштение упати обвинувања за претходната влада предводена од Никола Груевски дека делела државни земјишта на свои приврзаници, кои, како што велат, ги поддржувале деструктивните политики. Владејачката партија го спореди актуелниот лидер на опозицијата, Христијан Мицкоски со новинарот Миленко Неделковски и додаде дека кај Мицкоски е присутна идентична матрица од претходното раководство.
„Мицкоски, исто како Груевски, спроведува деструктивни политики, се обидува да ги запре процесите за ЕУ и НАТО, работи против интеграција на Македонија во најмоќните демократски сојузи на светот. Како потврда дека ништо суштински не е сменето се луѓето од неговото опкружување, но и истите гласноговорници на тие деструктивни политики против НАТО и ЕУ. Еден од овие гласноговорници е Миленко Неделековски. Она што е заедничко за Мицкоски и Неделковски e што и двајцата добиле државно земјиште од владата предводена од Никола Груевски. Мицкоски за да го почне бизнисот со хидроцентрали, додека фирмата на братот на Неделковски за чување кози за кои добивал десетици илјади евра годишно како субвенции од државата“, се вели во соопштението на СДСМ.
Владејачката партија додава дека заедничко за Мицкоски и Неделковски е тоа што и двајцата отворено работат против ЕУ и НАТО и учествуваат на протести за одбрана на криминалот на Груевски и соработниците.
„Неделковски освен што ги поддржа протестите на Мицкоски, јавно порача дека посакува Македонија да се распадне и да пропадне. Дали и Мицкоски се надева на пропаст на Македонија, нека ценат граѓаните. Тоа што Мицкоски исто како и неговиот ментор Груевски ги користи деструктивните услуги од Неделковски, човек којшто со години шири лажни вести и говор омраза кон граѓани и новинари, човек кој поттикнува меѓуетничка и меѓучовечка омраза кажува многу“, наведе СДСМ во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.