Македонија
СДСМ: Во ниедна земја пожарите не се гаснат со „хермелини“ од Армијата, граѓаните се бореа со лопати против огнот

Пратеникот на СДСМ, Митко Трајчулевски, на денешната прес-конференција ја обвини Владата предводена од Мицкоски за неспособност и импровизација во справувањето со пожарите. Тој посочи дека институциите повторно потфрлиле, оставајќи ги граѓаните со лопати, сами да се борат со огнените стихии, без соодветна поддршка, опрема и логистика.
„Само 24 часа по ПР спектаклот со импровизираното противпожарно тело и хермелините од АРМ, видовме дека нема систем, нема подготовка, нема реакција“, изјави Трајчулевски, додавајќи дека владата цела година не набавила нова опрема, не вработила обучени пожарникари, ниту ја сервисирала флотата на авиони за гаснење.
„Дали во која било земја во светот се гасат пожари со БТР-и и хермелини од армијата? Ова не е ниту НАТО, ниту Европа. Ова е циркус. Наместо МИП – Македонска Интервентна Пожарна, ние гледаме „импровизирана“ противпожарна единица и евтин ПР. Проблемот е што последиците од вашата неспособност ги чувствуваат граѓаните на терен“, изјави Трајчулевски.
Како што рече, Владата имала буџет за луксуз и советници со високи плати, но не и за заштита на граѓаните. Тој додаде дека СДСМ веќе во март 2024 предложила закон за интегриран систем за кризен менаџмент, но владата не презела ништо.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Шукова: Независноста е обврска за иднината, потребни ни се функционални институции и храбри реформи

По повод Денот на независноста, потпретседателката на СДСМ и кандидатка за градоначалничка на Град Скопје, Каја Шукова, денеска положи свежо цвеќе на гробовите на претседателите Киро Глигоров и Борис Трајковски, како и на првиот премиер Никола Кљусев.
Во својата изјава, Шукова потсети на храброста на граѓаните кои пред 34 години избраа самостојна и слободна Македонија:
„На Денот на независноста се потсетуваме на храброста со која граѓаните избраа држава што ќе значи правда, достоинство и еднакви можности за сите. Но реалноста не секогаш ја следеше таа визија. Затоа денес, повеќе од кога било, ни треба енергија на граѓанска одговорност, солидарност и отпор кон рамнодушност. Потребни ни се функционални институции и храбри реформи што ќе донесат еднаквост за сите граѓани“,
Шукова истакна дека европската перспектива не е далечна идеја, туку секојдневна борба за подобро образование, чист воздух, сигурни институции и општество по мерка на граѓаните.
„Верувам дека Скопје може да стане симбол на таа нова надеж – град каде што секој ќе се чувствува вреден, заштитен и слушнат“, додаде таа.
Шукова упати честитки до сите граѓани:
„Нека ни е среќен 8 Септември – Денот на независноста на Република Северна Македонија!“
Македонија
ДОМ: Независноста ја обврзува Македонија да избере зелена и европска иднина

„Денес на 8 септември ја одбележуваме независноста, денот кога пред 34 години граѓанките и граѓаните на Македонија ја потврдија својата волја за самостојна и слободна држава. Оваа историска одлука создаде политичка обврска кон идните генерации да градат општество на правда, одговорност и грижа за луѓето и природата“, велат од ДОМ.
„Зелената партија Демократска обнова на Македонија (ДОМ) потсетува дека независноста е вредност која се брани секојдневно со чесна политика, со почитување на јавниот интерес и со визија за европска Македонија. Нашата определба е независноста да ја надградуваме со зелени политики што гарантираат здрава животна средина, правична економија и демократски институции.
Истовремено, независноста е и постојан потсетник дека државата им припаѓа на сите граѓани и граѓанки. Нејзината иднина не смее да биде заложник на корупцијата, клиентелизмот и краткорочните интереси на поединци и големите политички партии. Само преку отвореност, инклузивност и партнерство со граѓаните и граѓанките може да се изгради силна и отпорна демократија.
За зелената партија ДОМ, независноста има и еколошка димензија, бидејќи вистинската слобода е можна само во здрава и чиста животна средина. Борбата против загадувањето, правичната енергетска транзиција и заштитата на природните богатства се услов за идните генерации да живеат достоинствено во сопствената земја.
Во пресрет на претстојните избори, ја испраќаме пораката дека независноста не е завршена приказна, туку процес кој бара нова енергија и нова политичка чесност. Токму затоа, ДОМ заедно со „Коалицијата за зелена иднина“ ја гради алтернативата што ќе ја врати довербата во политиката, ќе обезбеди европска иднина и ќе им даде достоинствен живот на граѓанките и граѓаните. Честит нека е Денот на независноста на Македонија!“, се наведува во соопштението од ДОМ по повод 8 Септември.
Македонија
„Влен“: Ќе продолжиме да ја зајакнуваме демократијата, еднаквоста и европската перспектива на нашата земја

„Денес го одбележуваме еден од најважните датуми во историјата на државата – 8 Септември, Денот на независноста, кој денес е празник на сите граѓани на нашата земја“, велат од „Влен“.
Ова е моментот кога граѓаните на оваа земја го избраа патот на суверенитет и ги поставија темелите на слободна и независна држава. Но, нашата современа историја не може да се разбере без да се спомене и Охридскиот договор, кој ѝ даде на државата димензија на еднаквост и ја направи заеднички дом за сите граѓани. Независноста и еднаквоста се двата столба врз кои се гради нашата заедничка иднина.
По тој повод, ВЛЕН им го честита Денот на независноста на сите граѓани, со целосна увереност дека заедно ќе продолжиме да ја зајакнуваме демократијата, еднаквоста и европската перспектива на нашата земја“, се додава во честитката на „Влен“.