Македонија
СДСМ: Итно да се врати бесплатниот пристап на новинарите до Централниот регистар

„Одлуката на актуелната власт да го укине бесплатниот пристап на новинарите до информациите од Централниот регистар претставува директен напад врз слободата на медиумите и уште еден очигледен чекор кон намалување на транспарентноста во државата. Оваа одлука е обид да се забави работата на новинарите и да се спречи нивната брза и ефикасна истрага за теми од јавен интерес. Со ова, Владата не само што ги гуши медиумите, туку и го загрозува правото на граѓаните да бидат информирани за случувањата во земјата“, велат од СДСМ.
„Да потсетиме, уште од 2017 година, благодарение на одлуката на Владата предводена од СДСМ, новинарите имаа бесплатен пристап до базата на Централниот регистар, со што можеше брзо и ефикасно да се обезбедат потребните податоци за истражувачките новинарски стории. Со сегашната одлука, ова право се укинува, што дополнително го ограничува пристапот до информации од јавен карактер, кои се клучни за транспарентноста и отчетноста на власта.
Актуелното раководство на Централниот регистар одлучи дека оваа одлука на претходната влада „не е во согласност со законот“, според кој бесплатен пристап имаат само корисниците на средства од Буџетот на Република Северна Македонија, но не и новинарите. Ова е неприфатливо и претставува брутален обид за замолчување на медиумите и ограничување на нивната улога во контролата врз власта.
СДСМ најостро ја осудува оваа одлука и бара итно да се врати бесплатниот пристап на новинарите до Централниот регистар! Власта нема право да ги спречува новинарите во нивната работа и да ја урива транспарентноста која е темел на демократијата. Новинарите мора да имаат слободен пристап до сите информации кои се во интерес на јавноста, за доброто на граѓаните и на нашето општество.
Транспарентноста е должност, а не право кое треба да се ускратува!“, велат од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Движење ЗНАМ: Магистерскиот труд на министерот Филков не претставува судир на интереси, туку е доказ за посветеност

СДСМ, партијата која ја претвори државата во партиска играчка и го урниса правосудството на најниско ниво, последна има право да зборува за етика, интегритет и судир на интереси. Наместо да одговараат за своите афери и за годините на корупција, тие денес држат лажни морални лекции за министерот за правда Игор Филков. Ова е очаен обид на политички банкротирана партија која измислува „скандали“ таму каде што ги нема, реагираат од Движењето ЗНАМ на обвинувањата од СДСМ.
„Да го наречеш академскиот развој и вложувањето во знаење – „злоупотреба“, е исто толку апсурдно колку што беше нивното владеење кое ја остави Македонија без правда и без доверба во институциите. Да бидеме јасни: магистерскиот труд на министерот Филков не претставува судир на интереси, туку е доказ за посветеност, за професионализам и за волја да се надградува знаењето во сферата во која што дава најголем придонес и во која делува. СДСМ зборува за „кражба на труд“, а токму тие со години ги крадеа институциите и иднината на повеќе генерации. Тие зборуваат за „етика“, а токму нивните министри беа симбол на корупција, непотизам и непрофесионалност. Токму за нивните професорски кадри се множеа кривични пријави,а за некои немаме ни разрешница. Тие зборуваат за „интегритет“, а целиот народ гледаше како со години ја злоупотребуваа државата за лични и партиски интереси“, се наведува во реакцијата.
Движењето ЗНАМ за Наша Македонија наведува дека стои цврсто зад министерот Игор Филков.
„Филков е симбол на тоа каков треба да биде еден јавен функционер – образован, професионален и подготвен да ја користи науката за доброто на државата. Она што СДСМ го нарекува „скандал“ е всушност пример кој треба да се следи. Граѓаните одамна ја препознаа ароганцијата и лицемерието на СДСМ. Ние, како Движење ЗНАМ за Наша Македонија, се залагаме за знаење како темел на секоја реформа, за интегритет како услов за вистинска правда и за работа во интерес на сите граѓани на Македонија“, велат од Движењето ЗНАМ.
Македонија
Реформите во администрацијата се клуч за европските интеграции, рече министерот Минчев

Министерот за јавна администрација, Горан Минчев, учествуваше на состанок предводен од страна на премиерот Христијан Мицкоски, на тема реформската агенда за придвижување на Европските интеграции, на кој присуствуваа и останатите министри од Владата.
На состанокот беа разгледани приоритетните мерки кои државата треба да ги спроведе во насока на исполнување на Копенхашките критериуми и унапредување на стандардот на граѓаните.
Минчев истакна дека реформите во јавната администрација се суштински дел од европската агенда и од целокупниот напредок на државата.
„Модерна, транспарентна и ефикасна администрација е темел за успешно исполнување на европските стандарди и за подобрување на услугите за граѓаните“ – соопшти тој.
Од Министерството заклучија дека Владата останува посветена на стабилна економија, владеење на правото и квалитетни јавни услуги, со јасна цел – обезбедување иднина и подобар живот за сите граѓани на Македонија.
Македонија
Седницата за сомнежите за незаконско прислушување е одложена

Седницата на Комисијата за надзор над работата на Агенцијата за национална безбедност (АНБ) и Агенцијата за разузнавање (АР), која беше закажана за денеска во 11 часот, е одложена. Од собраниските служби засега нема образложение за одложувањето.
Претседателот на законодавниот дом, Африм Гаши, претдхоно ја закажа седницата, а со неа требаше да претседава пратеничката на СДСМ, Славјанка Петровска.
Седницата следуваше по јавниот повик на пратеникот Љупчо Пренџов, член на Комисијата за надзор, до претседателот на Комисијата Скендер Реџепи од Европскиот фронт да се свика итна седница за разгледување на сомнежите за незаконско прислушување од АНБ во периодот 2019–2024 година.
Пренџов истакна дека целта е да се изврши темелно испитување на сите околности поврзани со настаните. Тој посочи дека овие случувања предизвикуваат вознемиреност во јавноста и ја поткопуваат довербата во институциите.
Скендер Реџепи пак, образложи дека не може да присуствува на седницата поради класифицираните информации и поради тоа што нема одговор на барањето за безбедносен сертификат кое го поднел минатата година. Тој оцени дека станува збор за дискриминација и посочи дека претседателот на Собранието има можност да свика седница на Комисијата.