Претседателот на Владата на Република Северна Македонија, Христијан Мицкоски, одговарајќи на новинарско прашање како тече вториот јавен повик од проектот за капитални инвестиции од 250 милиони евра за општините, изјави дека засега состојбата е одлична, пристигнати се 340 проекти од 51 општина.

„Таму е одлична состојбата, повеќе од 338, 340 проекти веќе се пристигнати од 51 општина. Очекуваме таа бројка да натфрли и 400, зошто не и 450. Во првиот повик имавме проекти во вкупна вредност од 72 милиони евра, без оние средства коишто отидоа преку Министерството за транспорт“, истакна премиерот.

Целта на Владата, напомена Мицкоски е да се инвестира на цела територија на државата.

„Сега имаме 15 милијарди денари, 250 милиони евра. Секој ден сме присутни на некој нов проект, ве поканувам, во сабота во Студеничани. Таму почнуваме еден голем проект, тоа е за два дена од денеска. Така што на цела територија како што ветивме, без разлика на градоначалникот, дали е од опозицијата или од власта или е независен, ние имаме цел и намера да инвестираме на цела територија на државата“, рече тој.

Претседателот на Владата Христијан Мицкоски, денеска одговарајќи на новинарското прашање поврзано со интерпелација на Судскиот совет и барањето на оставка на Љупчо Коцевски посочи дека партиски луѓе не треба да има во судството.

„Последниот браник и цврст штит во моментот на поранешната влада на СДСМ и ДУИ се дел од судиите и дел од обвинителите меѓу кои е именуваното лице за коешто вие сега зборувате. Најголемиот дел би рекол 95% од обвинителите и судиите се луѓе коишто чесно си ја работат својата работа, коишто обвинуваат и судат според закон и Устав. Но, за жал има и такви коишто останаа да бидат партиски измеќари и коишто ценат дека кога ќе ја облечат тогата наместо да заборават на партиските привилегии и оние коишто ги предложиле таму, тие се уште се верни слуги на истите коишто на времето ете бидејќи такви се законите и процедурите ги предложиле да бидат таму каде што се“, одговори Мицкоски.

Мицкоски го потенцираше однесувањето на еден обвинител којшто наместо да биде заштитник на владеењето на правото, одбрал да биде верен слуга и измеќар на една партија којашто беше долги години на власт и дел од коалицијата во поранешната влада.

„Посебно би го потенцирал однесувањето на еден обвинител од пред неколку дена којшто одлучи наместо да биде обвинител и заштитник на владеењето на правото и правдата да биде верен слуга и измеќар на една партија којашто беше долги години на власт и дел од коалицијата во поранешната влада“, објасни Мицкоски.

„Никогаш од ниту еден советник, не е изречено или не е кажана констатација дека соодветната институција Европската банка за обнова и развој била сомнителна институција. Никогаш, никој не кажал такво нешто од говорницата на Советот на Град Скопје“, истакна претседателот на Совет на Град Скопје, Трајко Славески во реплика кон советникот Александар Трајановски на денешната седница на Советот на Град Скопје говорејќи за воведување на брз автобуски превоз.

Славески посочи дека многу добро знае како се движи соработката на Република Македонија со Европската банка за обнова и развој.

„Јас сум засегнат од ваквата неточна констатација на советникот Трајановски затоа што како министер за финансии по функција сум бил и гувернер, односно претставник на Република Македонија во Европската банка за обнова и развој и многу добро знам како се движела соработката со банката“, рече Славески.

Славески потенцираше дека советниците не ги изнесуваат своите аргументи по 20-ти пат затоа што веќе го имаат кажано своето мислење.

„Второ советниците најверојатно не ги изнесуваат своите аргументи по 20-ти пат затоа што го кажале своето, дека најголем проблем е трасата по Булеварот „Партизански одреди“ каде се доведува во опасност водоснабдувањето со вода за пиење со жителите на Град Скопје. Имаше и други предлози за промена на траса, тоа не е направено и оттука мислам дека отпорот на советниците е да дадат поддршка на таков проект кој го сметаат за неиздржан без соодветните корекции што беа предложени“, заклучи Славески.