СДСМ со задоволство го одбележува завршувањето на експресниот пат низ Фаришката клисура – капитален инфраструктурен проект кој беше над 90% реализиран во времето на владата предводена од СДСМ, соопштија од опозициската партија, откако денеска премиерот Христијан Мицкоски со министри и директори го објави пуштањето во употреба на овој пат.

„Овој патен правец, долг 10,2 километри и вреден над 33 милиони евра, е еден од најсложените проекти на оваа траса, со изградба на два тунели, 21 мост, вијадукт, галерија и други клучни конструкции – сите завршени со над 90% во мандатот на СДСМ. ВМРО-ДПМНЕ, по цела година власт, се слика на отворање на пат за кој само санираа едно свлечиште, поставија сигнализација и неколку огради. Толку. Но, најважно од сè – граѓаните од Прилеп, Битола, Ресен и целиот Пелагониски регион конечно добиваат современ и безбеден патен правец, важен за транспортот, економијата и секојдневниот живот. СДСМ, како одговорна партија, инвестираше сериозно во патната инфраструктура: експресниот пат Градско – Дреново, реконструкцијата на Плетвар, патот Прилеп – езерото, автопатот Прилеп – Битола како дел од Коридорот 10д. Тоа се реални резултати од нашата посветена политика за подобра инфраструктура и подобар животен стандард за сите“, велат од СДСМ.

Од таму додаваат дека Владата на ВМРО-ДПМНЕ нема ниту еден свој проект и промовира само проекти на СДСМ.

„Прашањето е што ќе прави кога ќе ги промовира сите проекти на СДСМ?“, велат од партијата.

Од ВМРО-ДПМНЕ прашуваат како е можно сите проекти на СДС во нивното владеење да се завршени 90%, а ни еден 100%?

„Со каква леснотија СДС говори дека сите проекти кои Владата предводена од ВМРО-ДПМНЕ ги пушти во употреба изминатава година, дека они се најзаслужни. Проектот за да биде готов и пуштен во употреба треба да е 100% готов. Но, над не зачудува како за 7 години на СДС, барем еден проект не им дојде до 100%, туку сите до 90%? И да е така, а не е, само се докажува констатацијата дека СДС се неспособни и мора да дојде ВМРО-ДПМНЕ на власт за да ја среди државата и да ја врати на прав колосек. Затоа, една година ги градиме темелите на промените. Доаѓа времето на Македонија“, реагираат од ВМРО-ДПМНЕ.