Македонија
„СДС призна дека економијата расте – само што не можат да поднесат што расте без нив“, велат од ВМРО-ДПМНЕ

„Ја поздравуваме изненадената искреност на СДС: барем еднаш јавно признаа дека македонската економија расте. Проблемот е што не можат да поднесат што тоа се случува затоа што повеќе го нема нивниот хаос, корупција и неспособност. Кога економијата тоне, виновна тогаш беше опозицијата и ВМРО-ДПМНЕ. Сега, кога економијата расте и Македонија е во топ 5 најбрзорастечки економии во Европа, одеднаш им текна дека тоа е нивна заслуга?!“, велат од ВМРО-ДПМНЕ.
„Е па, или е ваш успех, или е катастрофа – одлучете се.
Фактите се едноставни:
Ако економскиот раст бил „нивно дело“, зошто додека беа на власт, Македонија не беше во првите 5 економии, туку меѓу последните 5 по раст? Во периодот 2019 – 2023 година, СДС не само што не обезбеди континуиран раст, туку остави економија во место, капитални инвестиции под 60%, и над 600.000 сиромашни граѓани.
СДС стави празна каса, нереализирани проекти, зголемен јавен долг и нефункционална администрација. И сега тие ќе зборуваат за „економски темели“?
Само за еден квартал под раководство на Владата предводена од ВМРО-ДПМНЕ и коалицијата:
· растот на БДП е 3.4%,
· зголемена е довербата на инвеститорите,
· стабилизирани се буџетските приходи,
· и за првпат се чувствува дека државата се движи напред, а не во место.
СДС има проблем со реалноста: навикнати се да живеат во свет каде само со партиска пропаганда се „гради економија“. Но граѓаните веќе го гледаат резултатот на терен. И знаат:
Кој гради, а кој распродава. Кој работи, а кој краде. Кој инвестира, а кој поставува урнисан асфалт за прес. Кој ја вади Македонија од кал, а кој ја турна таму.
Затоа, наместо да зборуваат за „нивните политики“, нека одговорат:
Дали нивна политика беа 14 луѓе изгорени во модуларна болница? Дали нивна политика беше криминалниот „Глобал“, пропаднатите ТЕЦ инвестиции и уценетите тендери? Дали нивна политика беше да се постават партиски кадри без ден работен стаж на врвот на институциите? Ако се тоа „економски темели“, тогаш среќа што тие темели веќе се разградуваат со темелна обнова.
И уште нешто:
Граѓаните не се наивни. Знаат дека растот не доаѓа од флаери и флоскули, туку од работа, план и чесно управување. Македонија конечно се движи напред – и тоа не е заслуга на СДС. Тоа е заслуга на граѓаните, на стопанството, и на новото раководство што не се занимава со алиби, туку со резултати. СДС нека продолжи со соопштенија – ние ќе продолжиме со раст“, се наведува во соопштението на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.