Во периодот од 25 до 31 мај се одбележува 12. меѓународна Недела за подигнување на свесноста за здравјето на тироидната жлезда. Здравјето на тироидната жлезда е важно за целокупното функционирање на организмот бидејќи тироидната жлезда произведува тироидни хормони, кои го регулираат телесниот метаболизам – производството на енергија од нутритиентите и кислородот и се неопходни за круцијалните телесни функции, како што е правилното функционирање на срцето, мускулите и дигестивниот тракт, мозокот и скелетниот систем.

По тој повод, од Универзитетската клиника за ендокринологија потсетуваат дека навремената дијагностика е најважна за успешен третман на заболувањата на тироидната жлезда и доколку навреме се открие болеста и се почне со адекватна терапија, лицата со нарушена функција на тироидната жлезда може да водат нормален живот. Токму поради тоа е потребна редовна контрола на функцијата на тироидната жлезда, која може да се изведе со проверка на нивото на тироидни хормони во крвта. Третманот се состои од земање терапија со тироидни хормони, а доколку станува збор за тироидна жлезда која лачи повеќе тироидни хормони, терапијата е со антитироидни лекови, кои го спречуваат зголеменото лачење на тироидните хормони.

По повод одбележувањето на меѓународната Недела за подигнување на свесноста за заболувања на тироидната жлезда, која годинава е посветена на здравјето н амајките и новороденчињата, Универзитетската клиника за ендокринологија упатува препораки за заштита на нивното здравје.

„Жените се многу поподложни на заболувања на тироидната жлезда – една од осум жени може да има проблем со функционирањето на тироидната жлезда во текот на животот. Ова е особено важно да се земе предвид во текот на бременоста бидејќи за адекватен раст и развој на бебето, како во текот така и по бременоста, неопходно е оптимално ниво на тироидни хормони, кои се одговорни за правилен раст и развој“, потенцираат од Клиниката.

„За таа цел, во нашата земја, кај сите новороденчиња, задолжително се прави проверка за функционирањето на тироидната жлезда – TSH-скрининг. Многу е важно жените што имаат заболување на тироидната жлезда, штом ќе дознаат дека се бремени, веднаш да се јават кај својот ендокринолог со цел да се провери дали нивото на тироидни хормони во крвта е адекватно. Инаку, нарушувањата на тироидната жлезда, како хипотироидизмот (недоволно лачење тироидни хормони) и хипертироидизмот (прекумерно лачење тироидни хормони) може да предизвикаат проблеми со забременување и неплодност. Се препорачува да се направи проверка на нивото на тироидни хормони во крвта доколку жената неуспешно се обидува да забремени повеќе од дванаесет месеци, доколку има нередовни менструални циклуси или претходни неуспешни бремености или доколку во своето семејство има лице со дијагностициран проблем со тироидната жлезда“, посочуваат од Универзитетската клиника за ендокринологија.

Оптималното ниво на тироидни хормони во текот на бременоста е есенцијално за здравјето како на мајката така и на бебето. Недостигот од тироидни хормони (хипотироидизам) во текот на бременоста може да доведе до несакани исходи од бременоста. Мајките со хипотироидизам многу почесто имаат покачен крвен притисок во текот на бременоста, кој може да води до прееклампсија, почесто е и предвремено породување, породување со царски рез и можност за крвавење по породувањето. Бебињата на мајките што имаат недоволно ниво на тироидни хормони во текот на бременоста може да се родат со пониска родилна тежина, често се раѓаат пред терминот, може да имаат неадекватен раст и невропсихолошки нарушувања.

Научните сознанија покажуваат дека некаква форма на нарушена тироидна функција се јавува кај 5 отсто од светската популација или дека речиси 1,6 милијарда луѓе се во ризик да развијат нарушување на функцијата на тироидната жлезда. Дури 50 отсто од луѓето што имаат заболување на тироидната жлезда може да бидат несвесни за симптомите во раните фази на заболувањето.

Постојат два главни типа на нарушена тироидна функција, односно нарушено создавање хормони на тироидната жлезда: хипотироидизам – состојба кога тироидната жлезда не произведува доволно тироидни хормони, што резултира со забавување на телесните функции и метаболните процеси. Симптоми на хипотироидизам може да бидат слабост, малаксаност, добивање телесна тежина, забавена работа на срцето, нетолеранција на студ, нарушен мисловен процес, депресија, констипација, болки во мускулите и зглобовите, суви и кршливи коса и нокти, нередовен менструален циклус или проблеми со забременувањето кај жените. Често кај оваа состојба може да се види зголемување на тироидната жлезда – гушавост; и хипертироидизам – состојба кога тироидната жлезда произведува повеќе тироидни хормони од неопходното, што резултира со забрзување на телесните функции и метаболните процеси. Симптомите на хипертироидизам се резултат на еден забрзан метаболизам и вклучуваат: слабеење, забрзана работа на срцето, вознемиреност, нервоза, проблеми со сонот, забрзана работа на цревата, мускулна слабост следена со тремор, потење, нарушување на менструалниот циклус, при што тироидната жлезда често е зголемена.