Македонија
Се одржа втората конференција „Родова еднаквост на работното место“

По повод Меѓународниот ден на еднаквите плати, се одржа конференција на тема „Родова еднаквост на работното место“, организирана од Алијансата за родова еднаквост на работното место – ГЕА, иницијатива на Асоцијацијата за е-трговија на Македонија – АЕТМ. Конференцијата се организира со поддршка на проектот „Активност за јакнење на деловниот екосистем“, финансиран од УСАИД, а спроведуван од Консалтинг за стратешки развој (КСР).
Годинешната конференција со наслов „Родова еднаквост на работното место“ ја следеше мисијата на Алијансата за родова еднаквост и се зборуваше за еднакви можности, еднаква застапеност без дискриминација и еднакво вреднување на трудот на жените и мажите. Беа споделени податоци, кои говорат дека сè уште сме далеку од постигнување родова еднаквост на работното место, но се дискутира и за мерки и политики, кои се преземаат, како и за предлози за постигнување прогрес на ова значајно прашање. Дополнително, преку споделување добри практики и претставување компаниски рол-модели, конференцијата го поддржа активното вклучување на компаниите во промовирањето на еднаквиот статус на жените и мажите на работното место и во општеството.
Конференцијата официјално ја отвори Нина Ангеловска, претседателка на ГЕА: „Предизвикот на родовата нееднаквост постои, родовиот јаз постои на многу основи и неопходно е да се адресира бидејќи еднаквите можности, еднаквоста на пазарот на трудот на мажите и жените и можноста да дадат еднаков придонес ја прави економијата подинамична, посилна и поотпорна, а придонесува и за поголем економски раст. Оваа конференција е посветена на Меѓународниот ден на еднаквите плати (18 Септември), а меѓународните денови постоеле и пред основањето на Обединетите нации, но се прифатени од ОН како моќна алатка за адресирање одредени предизвици и се повод за едукација на јавноста за прашања од интерес, за мобилизирање ресурси и застапување пред политичките претставници со цел нивно решавање. Иако се работи за глобални предизвици, со одбележување на овие меѓународни денови во рамките на Алијансата за родова еднаквост на работното место – ГЕА се обидуваме локално да придонесеме и дејствуваме“.
Свое поздравно обраќање имаше и г-ѓа Елизабета Ѓоргиевска, сопруга на претседателот на Република Северна Македонија: „Сите човечки суштества се раѓаат слободни и еднакви по достоинство и права. Ова е првата реченица во првиот член на Универзалната декларација за човековите права, што беше усвоена пред 75 години. Фактите зборуваат дека и 75 години по усвојувањето на Декларацијата, родовиот јаз во платите сè уште постои, вклучително и кај нас исто така. И покрај тоа што жените стекнуваат квалитетно образование, сè уште жените се соочуваат со родово базирана дискриминација не само при вработувањето туку и при кариерното унапредување и уште повеќе кон праведното вреднување на нивниот труд. Иронијата е што ефектите не ги чувствуваат само жените, туку и целата македонска економија. Нееднаквоста ги маргинализира и ги демотивира жените, а со тоа ја лишува економијата од нивниот креативен потенцијал“.
Во рамките на настанот беа организирани три панел-дискусии со претставници од бизнис-секторот, засегнатите институции, како и претставници од домашни и меѓународни организации. На панел-дискусиите се разговараше за најдобрите практики, кои овозможуваат еднакви услови за професионален развој на жените и мажите во работната средина, намалување на родовиот јаз во платите, како и препораки насочени кон економското јакнење на жените. На конференцијата како панелист говореше и министерка за труд и социјална политика, Јована Тренчевска.
Кристина Хаџи-Василева, која е извршна директорка на Консалтинг за стратешки развој и воедно панелистка на конференцијата, ги претстави можностите за поддршка на иницијативите и активностите за економско јакнење на жените преку проектот „Активност за јакнење на деловниот екосистем“ и изјави: „Деловните здруженија имаат значајна улога во јакнење на микро, малите и средните претпријатија вклучувајќи го и аспектот на родова еднаквост на работно место. Преку грантовите што ќе се доделат во рамките на проектот, ќе биде поддржано воведување политики, процедури и стандарди, кои ќе овозможат поголемо вклучување на жените на пазарот на труд во секторите во кои доминираат мажите. Ова ќе придонесе за поголемо економско јакнење на жените и родово балансирана работна сила“.
На конференцијата, покрај говорниците, учествуваа и 100-ина гости, меѓу кои и членови на Ссветот на Алијансата за родова еднаквост на работното место – ГЕА, членови на Асоцијацијата за е-трговија на Македонија – АЕТМ, соработници, партнери, поддржувачи на ГЕА и АЕТМ и претставници од бизнис-секторот, кои имаа можност да споделат позитивни примери поврзани со најдобрите практики за постигнување родова еднаквост на работното место.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Влен: Бујар Османи и во МНР спроведувал сомнителни и криминални тендери!?

Државниот завод за ревизија јавно потврди тоа што граѓаните одамна го знаат, дека Министерството за надворешни работи, во време кога министер беше Бујар Османи, спроведувало незаконски тендери поврзани со организацијата на самитот на ОБСЕ во 2023 година, велат од Влен преку соопштение.
„Според ревизорскиот извештај: Потрошени се над 120 милиони денари без јасна евиденција; Не постои документација што точно е испорачано, инсталирано или оставено како трајна опрема во СРЦ „Борис Трајковски“; Договорите и јавните набавки биле спроведувани без транспарентност и со сериозни законски пропусти.
Ова е уште една потврда дека Бујар Османи, каде и да оди, зад себе остава сомнителни и криминални тендери!
Ова не е изолиран случај, истиот Бујар Османи беше осомничен од СЈО за сомнителни набавки уште кога беше министер за здравство во владата на Никола Груевски.
Граѓаните на Чаир добро знаат две работи за Бујар Османи: Прво, никогаш ништо не направил за Чаир, ниту еден проект, ниту една инвестиција, ниту една иницијатива. Второ, секогаш кога бил на функција, се поврзувал со скандали, сомнителни тендери и злоупотреби на јавни пари!“, велат од „Влен“.
„Влен“ додава дека Чаир не заслужува човек чие име се повторува во секој извештај за криминал и злоупотреба.
Македонија
Надлежните со препораки до граѓаните поради најавата за температури до 39 степени во периодот до 13 август

Министерството за здравство информира дека според најновата прогноза од Управата за хидрометеоролошки работи (УХМР), од 8 до 13 август 2025 година се очекува значително зголемување на дневните температури, кои на некои места ќе достигнат и до 39 степени Целзиусови.
Поради тоа, Министерството апелира до граѓаните да ги почитуваат препораките за заштита од топлотен удар: престој во разладени простории, внесување на доволно течности, избегнување на алкохол и засладени пијалаци, носење лесна и светла облека, како и ограничување на физичката активност во најтоплите часови.
Особено внимание треба да се посвети на ризичните групи — деца, стари лица, лица со хронични заболувања и бремени жени.
Во случај на појава на симптоми како вртоглавица, главоболка, гадење или забрзан пулс, веднаш треба да се побара медицинска помош.
Министерството ја следи состојбата и ќе постапува според потребите.
Според најавата на УХМР, времето денес ќе биде сончево со мала до умерена локална облачност. Ќе дува слаб до умерен ветер од северероисточен правец. Максималната температура ќе биде во интервал од 30 до 37 степени.
Македонија
Четири различни цени за паркинг во Клинички, просторот ќе се прошири двојно

Министерот за здравство, Азир Алиу, информира дека во Клиничкиот центар ќе има четири различни влезови со различни ценовници за паркирање – бесплатен за онколошки пациенти, поевтин за пациенти со упат, поскап за вработените и најскап за граѓаните кои доаѓаат по други причини. Договорот за управување со паркингот ќе го потпише Министерството со ЈП Градски паркинг.
Се најавува и оптимизација на паркинг просторот, со дупло повеќе места и дополнителни влезови, вклучувајќи и еден кај Кардиологија. Ќе се воведе 24-часовен мониторинг со камери и нов систем за следење на плаќањето и активностите. Доколку оптимизацијата не биде доволна, ќе се размислува за изградба на катна гаража.