Македонија
Се одржа втората конференција „Родова еднаквост на работното место“
По повод Меѓународниот ден на еднаквите плати, се одржа конференција на тема „Родова еднаквост на работното место“, организирана од Алијансата за родова еднаквост на работното место – ГЕА, иницијатива на Асоцијацијата за е-трговија на Македонија – АЕТМ. Конференцијата се организира со поддршка на проектот „Активност за јакнење на деловниот екосистем“, финансиран од УСАИД, а спроведуван од Консалтинг за стратешки развој (КСР).
Годинешната конференција со наслов „Родова еднаквост на работното место“ ја следеше мисијата на Алијансата за родова еднаквост и се зборуваше за еднакви можности, еднаква застапеност без дискриминација и еднакво вреднување на трудот на жените и мажите. Беа споделени податоци, кои говорат дека сè уште сме далеку од постигнување родова еднаквост на работното место, но се дискутира и за мерки и политики, кои се преземаат, како и за предлози за постигнување прогрес на ова значајно прашање. Дополнително, преку споделување добри практики и претставување компаниски рол-модели, конференцијата го поддржа активното вклучување на компаниите во промовирањето на еднаквиот статус на жените и мажите на работното место и во општеството.

Конференцијата официјално ја отвори Нина Ангеловска, претседателка на ГЕА: „Предизвикот на родовата нееднаквост постои, родовиот јаз постои на многу основи и неопходно е да се адресира бидејќи еднаквите можности, еднаквоста на пазарот на трудот на мажите и жените и можноста да дадат еднаков придонес ја прави економијата подинамична, посилна и поотпорна, а придонесува и за поголем економски раст. Оваа конференција е посветена на Меѓународниот ден на еднаквите плати (18 Септември), а меѓународните денови постоеле и пред основањето на Обединетите нации, но се прифатени од ОН како моќна алатка за адресирање одредени предизвици и се повод за едукација на јавноста за прашања од интерес, за мобилизирање ресурси и застапување пред политичките претставници со цел нивно решавање. Иако се работи за глобални предизвици, со одбележување на овие меѓународни денови во рамките на Алијансата за родова еднаквост на работното место – ГЕА се обидуваме локално да придонесеме и дејствуваме“.
Свое поздравно обраќање имаше и г-ѓа Елизабета Ѓоргиевска, сопруга на претседателот на Република Северна Македонија: „Сите човечки суштества се раѓаат слободни и еднакви по достоинство и права. Ова е првата реченица во првиот член на Универзалната декларација за човековите права, што беше усвоена пред 75 години. Фактите зборуваат дека и 75 години по усвојувањето на Декларацијата, родовиот јаз во платите сè уште постои, вклучително и кај нас исто така. И покрај тоа што жените стекнуваат квалитетно образование, сè уште жените се соочуваат со родово базирана дискриминација не само при вработувањето туку и при кариерното унапредување и уште повеќе кон праведното вреднување на нивниот труд. Иронијата е што ефектите не ги чувствуваат само жените, туку и целата македонска економија. Нееднаквоста ги маргинализира и ги демотивира жените, а со тоа ја лишува економијата од нивниот креативен потенцијал“.

Во рамките на настанот беа организирани три панел-дискусии со претставници од бизнис-секторот, засегнатите институции, како и претставници од домашни и меѓународни организации. На панел-дискусиите се разговараше за најдобрите практики, кои овозможуваат еднакви услови за професионален развој на жените и мажите во работната средина, намалување на родовиот јаз во платите, како и препораки насочени кон економското јакнење на жените. На конференцијата како панелист говореше и министерка за труд и социјална политика, Јована Тренчевска.
Кристина Хаџи-Василева, која е извршна директорка на Консалтинг за стратешки развој и воедно панелистка на конференцијата, ги претстави можностите за поддршка на иницијативите и активностите за економско јакнење на жените преку проектот „Активност за јакнење на деловниот екосистем“ и изјави: „Деловните здруженија имаат значајна улога во јакнење на микро, малите и средните претпријатија вклучувајќи го и аспектот на родова еднаквост на работно место. Преку грантовите што ќе се доделат во рамките на проектот, ќе биде поддржано воведување политики, процедури и стандарди, кои ќе овозможат поголемо вклучување на жените на пазарот на труд во секторите во кои доминираат мажите. Ова ќе придонесе за поголемо економско јакнење на жените и родово балансирана работна сила“.
На конференцијата, покрај говорниците, учествуваа и 100-ина гости, меѓу кои и членови на Ссветот на Алијансата за родова еднаквост на работното место – ГЕА, членови на Асоцијацијата за е-трговија на Македонија – АЕТМ, соработници, партнери, поддржувачи на ГЕА и АЕТМ и претставници од бизнис-секторот, кои имаа можност да споделат позитивни примери поврзани со најдобрите практики за постигнување родова еднаквост на работното место.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

