Викторија Андоновска oд ВМРО-ДПМНЕ обвини дека поранешниот министер и заменик министер за земјоделие Трајан Димковски, во периодот 2019–2021 година, заедно со уште четири службени лица, извршил отпис на 2.000 тони пченица и јачмен од државните стокови резерви, во вредност близу 800.000 евра.

Според Андоновска, пченицата била отпишана иако постоела и била употреблива. Таа наведе дека Димковски доставил записник до Владата за наводен кусок на житото за период 2007–2021 година, а дека владин заклучок бил донесен без дополнителни проверки.

Андоновска посочи дека до 2019 година немало извештај за кусок и дека, како што тврди, недостигот настанал од 2019 до 2021 година. Таа постави прашања до јавноста за тоа каде завршиле 2.000 тони жито и дали, како што наведе, има сомнежи дека завршиле на црниот пазар во соседна држава.

На прес-конференцијата таа постави и прашања околу можната вмешаност на ексминистерот Љупчо Николовски и повика на „правда и одговорност“, обвинувајќи дека, како што рече, СДС ги штити свои кадри.

Да не се заборави, да не се повтори, пишува во објава на социјалните мрежи Жаклина Пешевска, пратеничка на ВМРО-ДПМНЕ потсетувајќи на денешниот датум 2017 година, кога како што вели, со полициска опсада пред очите на нејзините деца и биле ставени лисици на рацете.

„На денешен ден во 2017 година, нешто пред 05:00 часот наутро, со полициска опсада и кршење на вратата, пред очите на моите три малолетни дечиња ми беа ставени лисици на рацете под лажно обвинение за тероризам.
Поминав низ судови, претреси, одземен имунитет и домашен притвор“.

На крај, како што пишува, во отсуство на докази, истрагата била запрена.

„Но траумите за мене и за моето семејство останаа засекогаш.
Денес стојам гордо исправена пред мојот македонски народ, како жена која не потклекнува кога станува збор за националните интереси!
Но, сѐ додека моите браќа патриоти се во зандани, далеку од своите најблиски, болката е голема.
Со најголема тага се сеќаваме и на Кире Ѓорѓиевски и Игор Југ, кои не ја дочекаа слободата.
Неправдите не се забораваат.
Вистината секогаш излегува на виделина“, додава таа во објавата.

Министерот за надворешни работи и надворешна трговија Тимчо Муцунски денес и утре престојува во работна посета на Вилнус, Литванија. Во рамки на првиот ден од посетата, тој оствари средба со својот домаќин, министерот за надворешни работи Кештутис Будрис.

Двајцата министри изразија задоволство што посетата се реализира во годината кога двете држави одбележуваат 30 години дипломатски односи. Притоа, тие ја нагласија подготвеноста за унапредување на партнерството и соработката во повеќе области од заемен интерес.

Разговорите опфатија низа теми, меѓу кои билатералната соработка, координацијата во рамките на мултилатералните организации и партнерството во НАТО. Посебен акцент беше ставен на европските интеграции, при што беше нагласена потребата од заеднички и засилен ангажман за забрзување на процесот, особено во светло на претстојното литванско претседавање со Советот на ЕУ.

Муцунски ја изрази благодарноста за континуираната поддршка од Литванија, како и за солидарноста и помошта што државата ја доби по пожарот во Кочани.

Министрите разговараа и за актуелните безбедносни прашања, вклучително состојбата во Украина и предизвиците поврзани со европската безбедност и стабилност во регионот.