Премиерот Димитар Ковачевски тврди дека потпретседателот на ВМРО-ДПМНЕ, Александар Николоски, шири хистерија и лаги кога зборува за договорот со „Бектел и Енка“ и штетите што тој ќе ги предизвика. Според Ковачевски, нема ништо спорно во одредбите иако Николоски тврдеше дека ќе се плаќаат пенали доколку не се донесат измените на Законот за работните односи со кои сите што ќе работат на автопатските делници на Коридорот 8 ќе работат по 60 часа.

„Единствено што знаат е да прават хистерија. Тоа го прават со сите големи инфраструктурни проекти. Тоа што го кажува потпретседателот Николовски е лага. Исто како што неговиот претседател само се заканува и ништо не работи. Единствено што гледаме секое утро се лаги и хистерија, што ги шири македонската опозиција“, вели Ковачевски.

Тој за опозицијата додава: „Сè што кажаа – излажаа“.

„Постои специјален закон за Коридорот 8. Постои договор над 400 страници, кои ќе бидат објаснети во детали. Сите лаги ќе се демантираат. Сè што кажаа – излажаа“, додава Ковачевски.

Премиерот ги спомена и судските случаи против ВМРО-ДПМНЕ, што, според него, укажува како тие работеле, што укажува на тоа зошто размислуваат само на злоупотреби.

„Таа партија размислува само дали некој зел или не зел нешто. Тие кажуваат дека некој сакал некаков интерес да оствари. Јас ги повикав и ги повикувам, владата на САД, владата на Турција, дали во текот на изминатите две години, колку што се подготвува проектот, од нив има побарано нешто“, вели Ковачевски.

Николоски тврди дека Македонија ќе плаќа пенали доколку не донесе измена на закон преку Собранието за што рече дека е дел од договорот.

„Откако Владата ги потврди моите наводи дека доколку не се воведе 60-часовна работна недела, Македонија ќе плаќа огромни пенали или дополнителни трошоци за изведба, како што ги нарекува Владата, би сакал со јавноста да го споделам документот во кој се наведени пеналите/трошоците што ќе ги платат сите граѓани: минимум 53 милиони евра еднократно и 2.165.000 евра секој месец! Тоа што сакам денес да го обелоденам е дека во согласност со истиот договор Македонија ќе ги плати овие пари доколку законот за 60-часовна работна недела не се донесе во рок од 45 дена по потпишувањето на договорот со ‘Бехтел и Енка’! Исто така, пишува дека дури и да се донесе законот по овие 45 дена, сумата од 53 милиони евра ќе се плати! Тоа значи дека на 23 април сите граѓани на Македонија за ништо ќе треба да платат 53 милиони евра. Ова не е само основ за оставка на Ковачевски и Груби, туку и за сериозни кривични пријави, кои, ако не ги добијат сега по промената на власта и формирањето влада предводена од ВМРО-ДПМНЕ, не им бегаат“, наведува Николоски во објавата.