Македонија
Синдикатот побара разрешување на директорот на „Водовод“, тој ги негира обвинувањата

Жалам што синдикалната борба и борбата за работнички права поради лични интереси на некои поединци се сведе на лична пресметка со мене, но морам да одговорам на обвинувањата што претставниците на ССМ ги упатија кон мене, изјави на прес-конференција в.д. директорот на ЈП „Водовод и канализација“, Марјанчо Митовски, одговарајќи на синдикалните обвинувања упатени до него.
Тој рече дека до овој момент против него како директор на ЈП „Водовод“ нема пристигнато ниту една пријава за мобинг, а што се однесува до наводните пресметки, распоредувања и откази, тој потенцира дека до овој момент ниту еден редовно вработен во ЈП „Водовод и канализација“ не е избркан од работа.
„Точно е дека има хоризонтални поместувања, кои не се со решенија, односно не се трајни, туку се привремени задолженија поради реални потреби на претпријатието. Ниту им се скратени платите на овие 10-ина привремено прераспределени, ниту им се намалени бодовите за плата ниту, пак, се деградирани на каков било начин. Она што е точно е дека од нив се бара единствено да работат и да си ги извршуваат своите работни задачи за кои се платени. Она што исто така сакам да го коментирам, а за кое проструи информација во јавноста, е дека информацијата оти на госпоѓата Лила Димовска ѝ се скратени привилегиите како платено отсуство додека не е на работа 6 месеци е точна, а за што не постои ниту еден друг таков пример во ова претпријатие“, рече Митовски.
Во врска со обвинувањата за бркање десетици лица од „Водовод“, тој рече дека неговиот претходник ги ангажирал преку агенција за привремени вработувања на кои по завршувањето на потребата за нивен ангажман, не бил продолжен бидејќи претпријатието нема потреба од нивните услуги.
Негира дека се водат дисциплински постапки против 40 лица.
„Постојат неколку дисциплински поради тешки повреди на работното место, кои биле констатирани од внатрешната ревизија за кои следува постапка по службена должност. Ниту јас ниту кој било од ова претпријатие не презел мерки против вработените на нивна штета. Јас во ова претпријатие работам 12 години и јас сум дел од овој колектив и исто како и моите колеги носиме исти одговорности и исти права“, додаде Митовски.
Ги охрабри синдикалците максимално да го искористат своето право на штрајк да се борат за работничките права сега кога за тоа имаат можност.
„Кога бев јас жртва на мобинг, кога моите права беа прекршени, ниту овој ниту кој било друг синдикат немаше можност да застане во одбрана на моите работнички права ниту, пак, на моите колеги, бидејќи беа заплашувани, уценувани и замолчувани. Сакам да обрнам внимание на уште една информација, која претставниците на ССМ сметаа дека е важна да ја објават. Лекарскиот записник што денес Дарко Димовски сметаше дека е неопходно да го објави е доказ во судска постапка во која јас тужев за мобинг врз мене. Сакам да го информирам господинот Дарко Димовски дека со објава на докази дадени во судска постапка, кои не се анонимизирани, односно што содржат лични податоци на инволвираните страни, Димовски изврши кривично дело по член 149 – злоупотреба на личните податоци од Кривичниот законик на Република Македонија“, рече Митовски.
Претходно, синдикалната организација на „Водовод и канализација“ и Синдикатот на угостителството, туризмот и комуналните дејности (СУТКОЗ) денеска побараа од градоначалничката на град Скопје, Данела Арсовска, да го разреши в.д. директорот на претпријатието, Марјан Митовски, поради, како што велат, незаконско работење.
Од Синдикатот беше презентиран и документ од специјалист дека в.д. директорот има „мешано анксиозно и депресивно растројство“.
„Градоначалникот именува директори на јавните претпријатија и градоначалникот разрешува директори на јавни претпријатија и во согласност со тоа ја сноси целокупната одговорност за нивните постапки и активности, како и ја сноси одговорноста за нивниот избор и назначување“, истакнаа од Синдикатот.
Синдикатот донесе одлука за користење на правото на штрајк, која се очекува утре да биде потврдена на највисокиот орган на Синдикатот – СУТКОЗ по што ќе биде известено Министерството за труд и социјална политика веднаш да определи помирувач.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Македонија годинава ќе биде со најнизок економски раст во регионот

Претседателот на СДСМ, Венко Филипче, денеска беше во посета на Радовиш, каде што се сретна со граѓаните и разговараше за предизвиците со кои се соочуваат во секојдневниот живот.
„По десет месеци од новата власт, разочарувањето е големо. Цените продолжуваат да растат, платите стагнираат, а граѓаните сè потешко врзуваат крај со крај“, истакна претседателот на СДСМ, Венко Филипче.
Филипче нагласи дека СДСМ со месеци дава конкретни предлози и закони за раздвижување на економијата и зголемување на платите, но дека власта останува глува.
„СДСМ со месеци дава конкретни предлози и закони со кои ќе се раздвижи економијата и ќе се зголемат платите, но власта е глува. Со месеци предупредувавме дека економијата тоне, а денес таа потврда стигна и од проекциите на Светската банка. Македонија, за жал, оваа година ќе биде со најмал економски раст во регионот. Владата ветуваше дека ќе бидеме лидери во регионот, но очигледно ќе бидеме последни. Ова е резултат на погрешни економски политики, но и целосна негрижа за граѓаните“, изјави Филипче.
Во своето обраќање, тој подвлече дека СДСМ останува на страната на граѓаните и ќе продолжи да работи за подобар живот за сите
„СДСМ ќе продолжи да работи и нуди решенија, силно верувам дека граѓаните ќе ја препознаат искрената намера и чесните политики кои се наменети за подобар живот“, додаде претседателот на СДСМ.
Македонија
СДСМ: Тошковски мораше да го признае скандалот со братот на Стефковски – треба да си даде оставка

Откако СДСМ денеска го објави скандалот со братот на градоначалникот Стефковски со видео докази, Тошковски беше принуден јавно да го признае. Ниту ќе го признаел, ниту ќе бил било кој санкциониран за ова, иако јавна тајна е дека функционерите на ДПМНЕ се однесуваат како шерифи, а Тошковски тоа добро го знае, велат од СДСМ.
„Денешното признание на Тошковски потврдува две работи: прво, дека СДСМ изнесува вистини и, второ, дека функционерите на ДПМНЕ, нивните браќа, сестри и роднини не ги почитуваат законите, а Тошковски тоа го овозможува. Граѓаните не се наивни — да не објавеше СДСМ, Тошковски ќе го криеше и натаму скандалот“, велат од СДСМ.
Според нив, веќе не се ни бројат скандалите кои го тресат МВР.
„Владее хаос, своеволие кои допрва ќе излегуваат на виделина. Уште што треба да се случи за Тошковски да поднесе оставка? СДСМ ќе продолжи гласно да ја брани правдата, законитоста и интересите на граѓаните“, велат од СДСМ.
Македонија
Гаши засега ќе се воздржи од коментари за претседателката на Антикорупциска

Во врска со актуелните настани поврзани со претседателката на Државната комисија за спречување на корупцијата, Татјана Димитровска, од кабинетот на Претседателот на Собранието, Африм Гаши, велат дека тој засега ќе се воздржи од коментари, а ако наводите се потврдат во судска постапка, тој ќе иницира постапка за разрешување.
„Почитувајќи го начелото на презумпција на невиност и независноста на судските органи, Претседателот на Собранието се воздржува од какви било прерани коментари. Основен приоритет е да им се овозможи на надлежните институции да ја завршат својата работа без било какви притисоци или влијанија. Сепак, доколку наводите бидат потврдени низ судска постапка, Претседателот на Собранието ќе постапи без двоумење и ќе иницира соодветна собраниска процедура за разрешување“, се наведува во соопштението од Кабинетот на Африм Гаши.
Одговорноста за зачувување на кредибилитетот и интегритетот на институциите, велат од таму, е врвен приоритет и обврска која не трпи компромис.
Претседателката на антикорупциската комисија, Татјана Димитровска, е осомничена во дополнетата истрага за предметот „Адитив“. Таа се сомничи дека преку апликациите за пораки „Вибер“ и „Воцап“ му одавала службени тајни на друг обвинет за поведени постапки за отворање предмети и одлуки против сега обвинетите фирми и лица во предметот „Адитив“, како и податоци за проверка на имотот и на неговото семејство.
Покрај тоа што ѝ e одземен пасошот, Кривичниот суд определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, а воедно не може да гласа и да распределува предмети.