Македонија
Сиљановска-Давкова на средба со Карол Межеван, директорка на Светска банка за Македонија и Косово

Претседателката Гордана Сиљановска-Давкова ја прими Карол Межеван, директорка на Светска банка за државава и за Косово, која престојува во прва посета откако стапи на функцијата на почетокот на овој месец.
Изразувајќи благодарност за досегашната три децениска поддршка, Сиљановска-Давкова изрази очекување дека соработката со Светска банка, со новата директорка ќе резултира со поголеми придобивки за македонското општество. Таа посочи дека од 1993-та година досега, се одобрени над 100 проекти во вредност од 2,2 милијарди долари преку коишто се зајакнаа системите за вработување и за социјална заштита, се унапреди одржливиот, зелен раст, со краен бенефит – посилна македонска економија и подобар квалитет на живот на граѓаните.
За трасирање на патот кон одржлив развој, како што нагласи Сиљановска-Давкова, одлична основа претставува Рамката за партнерство на Светска банка 2024–2028, особено ако се има предвид дека таа е усогласена со националните приоритети и се фокусира на три основни цели: подобрување на испораката на јавни услуги преку подобрен административен капацитет и ефикасно јавно трошење, зголемување на бројот на нови работни места во приватниот сектор преку дигитализација, усогласување со стандардите на ЕУ и зајакнување на основните вештини и механизми за транзиција на работните места, како и зголемување на отпорноста на климатските промени преку поддршка на енергетската ефикасност, почист воздух и подобра инфраструктура.
Примарна цел на Светска банка, којашто и самата се трансформира одвнатре, како што истакна Карол Межеван, е да го поддржи развојот на земјава, преку имплементирање на најдобрите практики и искуства. Потенцираше дека во нејзиниот мандат ќе се залага за инклузивен економски раст на државата, каде секој ќе добие подеднакви можности за домување, образование и вработување, за подобрување на инфраструктурата, како и за дигитализација.
Истакнувајќи дека средбата со претседателката Сиљановска-Давкова е нејзина прва средба со претставници на државниот врв во земјава, Межеван изрази очекување приоритетите на Светска банка за земјава да бидат идентични со македонските национални приоритети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Левица е на услуга на ДУИ, сега си направиле пазар од кој ќе профитира или ќе се обиде да профитира ДУИ

Претседателот на ВМРО-ДПМНЕ, Христијан Мицкоски, имаше свое обраќање на денешниот митинг, со кој се започна кампањата за претстојните локални избори, и кој се одржа во Скопје во Спортскиот центар ,,Јане Сандански“ на кој се осврна и на коалицијата ДУИ и Левица, односно на Али Ахмети и Димитар Апасиев.
Мицкоски објасни дека сега јасно се гледа дека Левица игра во корист на ДУИ, како што претходно играла во корист на СЈО и Зоран Заев.
„Постојат две коалиции, две коалиции надвор од видливото. Првата е онаа меѓу Али и Димче, помеѓу ДУИ и Левица. Левица само го покажа своето вистинско лице кое што сите ние го знаеме. Тие се на отворен пазар, на услуга на Али и ДУИ. Сетете се, да не заборавиме, прво го помагаа СЈО за добри хонорари, потоа самиот Заев отворено кажа дека правеле тајни коалиции за наводно да ја спаселе Македонија од ВМРО-ДПМНЕ и од Христијан. А сега си направиле пазар од кој ќе профитира или ќе се обиде да профитира ДУИ. А тие пак од ДУИ, со истите трикови се децении наназад. Како стара закачица, провоцираат и едвај чекаат да им одговорам“, кажа Мицкоски.
Мицкоски укажа „сигурно пресметале дека ќе им вратам, па така ќе им го подобрам уништениот рејтинг“.
„Таа нивна игра мора и Албанците и Македонците и сите останати да ја знаат и разберат. Така ДУИ си го крева рејтингот. А тезите им се стари и излитени – те. „крвови“, те „јастреби, те орлите, те зајаци“, истото тоа, истиот фолклор го споменуваат 20 години, тоа со години е истиот филм. Албанците му се иселија. Парам-парчe направија од крадење Албанците – дури и од неговото Зајас – се иселија; исто како во Дебар, Струга, Тетово, Гостивар, Кичево и насекаде што живеат.. Дваесет години беа на власт. Видовме се што можат, но и што не можат. И тие метафори на митинзите повеќе не им поминуваат – добри се, ако одлучиле да се занимаваат и да глумат хумористични филмови за да може да насмеат некого. Но, не и да влеат надеж каква им е потребна на сите граѓани во Македонија“, посочи Мицкоски.
Македонија
Филипче: Со Златко Кузмановски Демир Хисар отвора нова страница на развој и напредок

На граѓанската трибина во Демир Хисар, претседателот на СДСМ, Венко Филипче, истакна дека за реализација на програмата и визијата која ја која ја нуди СДСМ за општина Демир Хисар, го имаат најдобриот кандидат за градоначалник, Златко Кузмановски.
„Верувам, и стојам одговорно зад тоа, дека Златко ќе ја води општина Демир Хисар чесно, со интегритет и со почит кон секој граѓанин. Тој ќе отвори нова страница за Демир Хисар, страница на развој, можности и напредок“, рече Филипче.
Тој додаде дека Кузмановски е народен човек, кој е постојано меѓу своите сограѓани и дека ги разбира нивните потреби и секојдневни предизвици.
Македонија
Максим Димитриевски: Мудроста на постарите и енергијата на младите се темел за иднината на Куманово

Денес кандидатот за градоначалник на Куманово, Максим Димитриевски, оствари повеќе значајни средби и активности со цел уште еднаш да ја потврди посветеноста кон сите категории граѓани.
На средбата со членовите на Здружението на армиски и полициски ветерани од активен и резервен состав во Куманово – ЗАПВАРС, Димитриевски ја истакна нивната мудрост и искуство како темел врз кој се гради посилно и побезбедно Куманово. „Горд сум на нивниот активизам и придонес во заедницата и подготвен сум заедно да продолжиме да создаваме подобра иднина за сите нас“, нагласи тој.
Посебно место во денешните активности имаше средбата со младите од Клубот на млади на Движењето ЗНАМ – За Наша Македонија, ОО Куманово. „Енергијата и ентузијазмот што ги носат младите се вистински ветар во грб и мотив за мене. Ветувам – ќе обезбедиме можности и услови за младите, затоа што тие се енергијата што го движи овој град напред“, рече Димитриевски.
Во текот на денот, тој се сретна и со жителите на Умни Дол, Железничка и Ново Село, каде што одблиску ги слушна нивните предлози и потреби. Денот заврши со мини митинг пред Пожарна, каде Димитриевски уште еднаш ја потенцираше важноста на директната комуникација со граѓаните.
„Секој разговор е инспирација и потврда дека сме на вистинскиот пат. Заедно со мудроста на постарите генерации и свежите идеи на младите, градиме иднина дома – во наше Куманово“, порача Димитриевски.