Скандалот на Кардиохирургија каде што пациент почина со пукната аората, е реалната и стравотна слика за состојбата во здравството – колабиран систем, кој наместо да лекува, уништува животи. Ова го изјави Белкиса Зекири – членка на Извршниот одбор од СДСМ.

Таа рече дека пациентот почина затоа што државната клиника не можела да му ја изведе потребната итна интервенција – поради нефункционалност на здравствениот систем.

„И Државниот здравствен и санитарен инспекторат потврди: ангиографската сала на Кардиохирургија не работела еден месец, а немало ниту стент-графтови. Како може државна болница, од стратешки интерес, да нема основни услови за спас на човечки живот? Многу отворени прашања за кои нема конкретен од одговор од најповикуваниот-министерот за здравство Таравари. Толку му е важна состојбата во здравството, што допрва ќе го гледал извештајот на инспекторатот. Граѓаните плаќаат здравствено осигурување за да добијат лекување, а не за да гледаат како нивниот живот виси на конец поради нечија неспособност и негрижа. Ова не е здравствен систем – ова е здравствена и хумана катастрофа!“, изјави Зекири.

Оцени дека во последните 10 месеци, Владата и министерот Таравари го донесоа здравството до колапс. СДСМ бара оставка од министерот за здравство Арбен Таравари и од директорот на државната Клиника за Кардиохиргија, Дејан Димитровски.

„Нема лекови нема терапии за онколошките пациенти. Деца умираат на Клиниката за детски болести. Нема клиника без хаос. Нема пациент без страдање. Министре Таравари, знаете ли што ви се случува? Или сте премногу зафатен со политички пазари и изборни математики? Задоцнетите извештаи нема да вратат животи. За оваа хуманитарна катастрофа мора да има одговорност“, изјави таа.

Семејството на починатиот пациент, 59-годишниот Тони Ангеловски претходно обвини дека тој не бил опериран бидејќи од клиниката им кажале дека нема слободни сали. Ги препратиле до приватни болници, каде им било кажано дека квотата била исполнета до јуни. И покрај тоа ги повикале да го донесат пациентот, да го стабилизираат, но бидејќи немале дел кој им е потребен, не можело веднаш да се изврши процедурата.

Од Клиниката за кардиохирургија велат дека пациентот веднаш бил згрижен, ја примил потребната терапија, по што состојбата му се стабилизирала. Кога биле разгледани сите наоди, лекарскиот конзилиум утврдил дека ако се изврши отворен хируршки третман, шансите за преживување на пациентот би биле екстремно мали, што му било и објаснето на семејството. Од тука потврдија дека втората сала е надвор од функција повеќе од еден месец поради поставување нов апарат, кој бара и реадаптација на просторот.

Препорачани биле две приватни болници, како и лекување во странство.

Министерот за здравство Арбен Таравари вчера изјави дека ќе има одговорност ако бидат утврдени пропусти.

Во 14 часот денес ќе се состане коалицијата „Влен“, по што ќе се знае како ќе продолжат понатаму со Алијансата за Албанците на Арбан Таравари.

Првиот вицепремиер кој е дел од коалицијата, Изет Меџити, одговарајќи на новинарско прашање рече дека по завршувањето на средбата јавноста ќе биде известена за ставот на „Влен“.

Ова се случува откако претходно, претседателот на Алијансата за Албанците, Арбен Таравари, соопшти дека неговата партија останува во коалицијата „Влен“, но на локалните избори ќе настапи со сопствена листа на кандидати за советници.

„Остануваме во коалиција освен ако тие не нѐ исклучат, тогаш и ние ќе постапиме соодветно”, рече Таравари.

Во врска со кандидатите за градоначалници, тој изјави дека за тоа сè уште не е донесена одлука.

Десет полицајци од Штип и Кочани се под истрага за катастрофалниот пожар во дискотеката „Пулс“ во Кочани. Според Обвинителството, тие се осомничени дека од 2012 до 2022 година издавале согласности и му овозможиле на правното лице да се стекне со лиценца за вршење угостителска дејност, иако истото не ги исполнувало предвидените услови. МВР соопшти дека шестмина од полицајците се приведени, по еден се трага, а тројца од претходно издржуваат мерка притвор.

„Постапувајќи по кривичната пријава поднесена од МВР, јавен обвинител од Специјализираното одделение за гонење на кривични дела сторени од лица со полициски властувања и припадници на затворската полиција, донесе Наредба за спроведување на истражна постапка против десет полициски службеници. Во конкретниот случај постои основано сомнение дека осомничените во временскиот период од 07.12.2012 година до 21.01.2022 година, како соизвршители, сториле кривично дело Тешки дела против општата сигурност“, соопшти Обвинителството.

Според описот содржан во наредбата за спроведување истражна постапка, осомничените како службени лица вработени во СВР Штип и ПС ОН Кочани, во погоренаведениот временски период, како соизвршители, не постапиле според прописите за мерките за заштита – не извршиле целосна и детална проверка во врска со издавање на позитивна согласност за издавање лиценца за Кабаре „ПУЛС“, во делот на безбедноста во сообраќајот и јавниот ред и мир. Со издавањето на согласностите сите заедно му овозможиле на правното лице да се стекне со лиценца за вршење угостителска дејност, иако истото не ги исполнувало предвидените услови.

„Јавниот обвинител ценејќи ги околностите и доказите прибавени во предистражната постапка, а заради непречено водење на кривичната постапка и заради обезбедување присуство на осомничените, на судијата на претходна постапка при Основен кривичен суд Скопје ќе предложи на седуммина осомничени да им определи мерки на претпазливост. Останатите тројца осомничени се обезбедени со претходната постапка“, соопшти Обвинителството.

Од Министерството за внатрешни работи објавија повеќе детали за полициските службеници против кои е поднесена кривична пријава.

Станува збор за П.С. (во времето на извршување на кривичното дело на работно место помошник началник во СВР Штип), Ј.Т. (во време на извршување на кривичното дело на работно место главен инспектор за сообраќајни работи во Одделение за полиција во СВР Штип), С.Д. (во времето на извршување на кривичното дело на работно место главен инспектор за сообраќај во Одделение за полиција во СВР Штип), М.С. (во време на извршување на кривичното дело на работно место началник на одделение во Одделение за полиција во СВР Штип), Љ.Т. (во време на извршување на кривичното дело на работно место началник во СВР Штип), В.П. (во времето на извршување на кривичното дело на работно место главен инспектор по сообраќајни работи во Одделение за полиција во СВР Штип), Д.А. (во време на извршување на кривичното дело самостоен инспектор за јавен ред и мир во СВР Штип), А.А. (во време на извршување на кривичното дело на работно место помошник началник на СВР Штип), В.И. (во време на извршување на кривичното дело на работно место документарист во ПС ОН Кочани во СВР Штип) и А.Т. (во времето на извршување на кривичното дело на работно место командир на ПС ОН Кочани).