Македонија
„Скандал во Тетовската болница: До каде може да оди моралната деградација и кражбата на грбот на животите на пациентите“, прашува ДУИ

„Скандалите кои ја опкружуваат Клиничката болница во Тетово секојдневно ја шокираат јавноста. Последните вести, кои откриваат дека директорот склучил договор од 300 илјади евра со таткото на снаата, е јасен доказ за невидена морална деградација. Како е можно вакви луѓе, со криминален ум и без ни малку милост, да ги збогатуваат своите семејства додека пациентите, меѓу кои и деца, ги губат животите поради лошото управување и недостигот на лекови и основни услуги?“, прашува ДУИ.
„Може ли некој да замисли поголема неодговорност и потполно игнорирање на животот на луѓето? Дали ова е стандардот што министерот за „бизнис“ во здравството го постави за јавните здравствени услуги? Наместо да обезбедат основни лекови и услови за лекување, овие лица одбрале да ја злоупотребуваат болката и страдањето на пациентите за да ги наполнат своите и џебовите на своите блиски.
ДУИ најостро го осудува ова неприфатливо и криминално однесување. Здравството е сектор кој треба да служи за спасување животи, а не за создавање богатство за фамилијарни кланови поврзани со неспособни и корумпирани раководители. Оваа ситуација е последица на една неспособна влада и едно раководство кое ги става личните интереси над животите и здравјето на граѓаните.
Апелираме до правосудните органи и сите релевантни фактори да интервенираат веднаш за да се стави крај на оваа морална и институционална катастрофа. Одговорните за оваа деградација мора да сносат законска и морална одговорност за ненадоместливата штета што им ја нанесуваат на пациентите и граѓаните на оваа земја.
Граѓаните на Тетово и целата земја заслужуваат здравствен систем кој ќе им служи со достоинство и професионалност, а не систем кој е извор на збогатување за неколку неодговорни поединци. ДУИ останува посветена на заштита на интересите на граѓаните и обезбедување иднина во која здравјето нема да биде привилегија, туку загарантирано право за сите“, се наведува во соопштението на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МВР најави засилени мерки против непрописното паркирање

Вчера во периодот од 17:00 до 20:00 часот од страна на Одделението за безбедност на патниот сообраќај при СВР Скопје преземени се зајакнати мерки за санкционирање на непрописно паркираните возила низ централното градско подрачје за зголемување на безбедноста во сообраќајот.
МВР информира дека се преземени вкупно 20 мерки од кои изречени се шест прекршочни платни налози за непрописно паркирани возила, 12 возила се подигнати со специјалното возило “пајак” и 2 мерки по останати прекршоци.
Сообраќајните контроли продолжуваат и во наредните денови, најави МВР.
Од таму апелираат до сите учесници во сообраќајот да се почитуваат сообраќајните правила и прописи и сите заедно да придонесеме за посигурни патишта.
Македонија
Облачно време со пороен дожд и грмежи

Времето денеска ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и изолирана појава на град, информира УХМР.
Минималната температура ќе биде во интервал од 6 до 11, а максималната ќе достигне од 18 до 26 степени.
Во Скопје, променливо облачно, попладне во делови од котлината ќе биде нестабилно со пороен дожд, грмежи, засилен ветер и услови за изолирана појава на град. Минималната температура ќе се спушти до 11, а максималната ќе достигне до 25 степени.
Во деновите од викендот ќе се задржи променливо облачно и нестабилно време со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Во понеделник ќе има повремен локален дожд, а од вторник стабилизирање на времето.
Македонија
Ѓорче Петров и Сопиште денеска без струја

ЕВН Македонија АД известува дека денеска без електрична енергија ќе останат:
-во периодот од 09.00 до 14.00 часот, дел од корисниците на ул 100 и ул 21 во Волково (Општина Ѓорче Петров)
-во периодот од 12.00 до 14.00 часот дел од ул.3 во Ракотинци (општина Сопиште)