Македонија
Словенија ќе биде втората земја што ќе го ратификува протоколот за НАТО

Во продолжение на официјалната посета на Република Словенија, претседателот на Собранието,Талат Џафери, и делегацијата се сретнаа со словенечкиот премиер, Марјан Шарец.
На средбата заедничка констатација беше дека развојот на билатералните односи без отворени прашања е основан врз духот на пријателството, силното стратешко партнерство и долгогодишната конструктивна соработка и поддршка на билатерален, регионален и мултилатерален план.
Претседателот Џафери изрази благодарност за постојаната поддршка што земјава ја добива од Словенија на нејзиниот пат кон реализирање на стратешките цели, членството во НАТО и Европската Унија, притоа укажувајќи дека Република Словенија е наш прв промотор во Обединетите нации во времињата исполнети со предизвици, како и дека одиграла клучна улога во промовирањето на независноста на земјава во Европа и во светот.
На почетокот на средбата премиерот Шарец ја поздрави храброста на Македонија за преземените чекори кон евро-атланската интеграција. Тој истакна дека земјава е позитивен пример за постигнување заеднички решенија преку дијалог од кои ќе имаат придобивка сите земји во регионот. Укажувајќи на долгиот пат што ни претстои како држава кон полноправното членство во европското семејство, тој ја понуди пријателската помош на Република Словенија за што се подготвени да го споделат своето искуство и знаење во текот на интеграцискиот процес.
Претседателот Џафери истакна дека парламентарното мнозинство и Владата, свесни за безбедносните предизвици во регионот и поставените долгогодишни стратешки цели на нејзините граѓани, се определи за надминување на отворените прашања со соседите. Тој истакна дека процесите не се воопшто лесни, но на наше задоволство финалниот резултат е широко поздравен од меѓународната заедница и нашите пријатели. Тој ја поздрави визијата на Република Словенија за интегриран и стабилен Балкан во НАТО и ЕУ, како и заложбата за просперитетен регион без конфликти и отворени прашања. Претседателот Џафери ја потенцираше успешноста на состаноците од Процесот Брдо – Бриони, како и за тоа дека земјите учесници пред сè мора да соработуваат, да се сплотат регионално и да изградат меѓусебна доверба како чекор пред нивната целосна европска интеграција.
Премиерот Шарец изрази задоволство што Република Словенија ќе биде втората земја по Грција која ќе го ратификува протоколот за пристапување во НАТО и искажа убедување дека со овој чекор нашата земја ќе почне ново поглавје на градење на европски вредности кои гарантираат подобар живот за сите граѓани на Република Македонија, како и безбедност за странски инвестиции, а со тоа и зајакнување на економијата во нашата земја.
Претседателот Џафери потенцираше дека по ратификацијата на протоколот за пристапување во НАТО од страна на националните парламенти на земјите членки, се очекува Република Македонија да стане 30-та членка на НАТО до крајот на 2019 година или почетокот на 2020 година, а со тоа да се оствари и долгогодишната цел на сите граѓани на нашата земја.На крајот на средбата соговорниците се согласија дека односите меѓу двете земји се на високо ниво и дека има простор да се интензивира и продлабочи економската соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Меѓусебната заштита на Коцевски со СДС и ДУИ е причина за 2% доверба во судството

СДС ги штитат корумпираните обвинители и судии бидејќи им овозможуваат закрила на нивните функционери, велат од ВМРО-ДПМНЕ.
„Клиентелизмот на Коцевски е гаранција за заштита и неказнивост на функционерите од СДС и ДУИ.
Поддршката што Коцевски ја доби од Филипче е меѓусебна заштита која ја гуши правдата во државата. Бидејќи доколку падне Коцевски, ќе се отворат врати за истраги како против Филипче така и за останатите функционери од СДС и ДУИ.
СДС со негласањето на интерпелацијата целосно се разголи, и на виделина пред јавноста излезе спрегата помеѓу СДС, ДУИ и Коцевски.
Очигледно е дека СДС и ДУИ стојат зад заштитата на Коцевски, кој за возврат не презема ништо за наводните злоупотреби и сомнежи за висоока корупција како и сомнителни тендери поврзани со Филипче, Заев и Ахмети.
Со одбивањето да ја поддржат интерпелацијата, СДС и ДУИ јасно покажаа кој го поставал Коцевски и кој го одржува на функцијата, јавниот обвинител Коцевски.
Се додека Коцевски е на позицијата, довербата во правосудството ќе биде помала од 2%, а одговорност за криминалите поврзани со СДС и ДУИ нема да има.
Доколку постои грам морална одговорност кај Коцевски, треба да ја препознае пораката од јавноста и да си поднесе оставка.
На Македонија и се неопходни темелни реформи во судството, правосудство растеретено од политички влијанија каде судиите и обвинителите ќе носат одлука врз основа на законите и Уставот а не под влијание на партиските интереси на СДС и ДУИ.
Во Македонија неопходно е правдата да завладее, неопходни се коренити реформи и трансформација на судскиот систем“, пишува во соопштението на ВМРО-ДПМНЕ.
Македонија
Времето денеска сончево со мала до умерена облачност, попладне локален пороен дожд и грмежи

Времето денеска ќе биде сончево со мала до умерена локална облачност.
Ќе дува слаб до умерен ветер претежно од југоисточен правец.
Попладне ќе има изолиран развој на нестабилна облачност со локален пороен дожд и грмежи.
Минималните температури ќе се движат од 12 до 20, а максималните од 26 до 36 степени целзиусови.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе биде 17, а максималната дневна ќе достигне 36 степени.
Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.