Македонија
Случајот со родилката во рацете на Меџити, мерки за гинекологија

По извршениот вонреден инспекциски надзор на Државниот санитарен и здравствен инспекторат, денес на барање на министерот за здравство, Фатмир Меџити, формирана е комисија за стручен надзор во врска со случајот со родилката што скокна од прозорец на скопска Гинекологија.
„Комисијата за стручен надзор, составена од двајца гинеколози, психијатар, клинички психолог и претставник од Министерството за здравство има задача да изврши надзор над стручната работа во ЈЗУ Универзитетска клиника за гинекологија и акушерство во врска со лекарскиот третман на родилката“, велат од Министерството за здравство.
По добивање на извештајот од стручниот надзор, јавноста ќе биде информирана за констатираната состојба.
Исто така, како што се нагласува, ќе бидат преземени соодветни мерки во согласност со извештајот на инспекторатот.
ДСЗИ претходно констатира дека ГАК направила пропуст оти докрај не ѝ обезбедиле психијатар на родилката што скокна од прозорец.
„Од извршениот надзор во ЈЗУ УК ГАК констатиран е пропуст во делот на реализирање на конзилијарните прегледи побарани во два наврата за родилката, со оглед на тоа што тие не се реализирани. Во врска со наведеното, ДСЗИ со решение ќе им наложи на одговорните лица на ЈЗУ УК ГАК спроведување постапка за утврдување одговорност од страна на здравствените работници, кои до крај не ја спровеле постапката за обезбедување доктор, специјалист по психијатрија“, велат од Државниот санитарен и здравствен инспекторат.
ГАК реагира по извештајот на инспекторатот тврдејќи дека процената од стручното лице во случајот со родилката била дека се работи само за знаци на лесна вознемиреност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.