На есенската сесија на Парламентарното собрание на Советот на Европа, која од 30 септември до 4 октомври ќе се одржи во Стразбур, Франција, учествува делегацијата на Собранието во состав Бетијан Китев, Шпреса Хадри и Никола Попоски.

На оваа сесија на пленарна седница пратениците ќе гласаат за резолуција по извештајот за постмониторинг-дијалогот на Советот на Европа со Република Северна Македонија, кој опфаќа прашања поврзани со развојот на демократијата, владеењето на правото и заштитата на човековите права во земјата.

Од собраниската прес-служба соопштија дека според агендата на сесијата, претседателот на Франција, Емануел Макрон, ќе има свое обраќање, а потоа и ќе одговора на прашања од пратениците на Парламентарното собрание на Советот на Европа.

Францускиот државен секретар за европски прашања, Амели де Моншалин, ќе се обрати во својство на претседавач со Комитетот на министрите, а пред Собранието ќе се обрати и Марија Пејчиновиќ-Буриќ, новоизбраниот генерален секретар на Советот на Европа.

Теми за кои ќе дебатираат пратениците се заштитата на свиркачите, заедничките стандарди за институциите на народниот правобранител и заштитата на жртвите од тероризам, како и зачувувањето на еврејското културно наследство. Собранието ќе ги разгледува и извештаите за климатските бегалци и миграцијата на трудот во Источна Европа, како и извештајот за придонесот на Банката за развој на Советот на Европа за поинклузивно општество. Точка за која се бара итна расправа е повредата на демократските права и задушувањето на мирните протести во Руската Федерација како заднина на изборите за градскиот совет во Москва.

Како и вообичаено, на почетокот на есенската сесија, на специјална церемонија ќе биде прогласен победникот на наградата за човекови права „Вацлав Хавел“ за 2019 година – од тројцата кандидати кои влегоа во потесен избор. Наградата се доделува секоја година за особени залагања во одбрана на човековите права во Европа и пошироко и се состои од сума од 60.000 евра, трофеј и диплома.