Македонија
Солуција: Длабоки системски проблеми не се решаваат со избори, туку со силен граѓански притисок
Балканскиот центар за конструктивни политики – “Солуција”, со поддршка на Европската фондација за демократија, синоќа презентираше нова граѓанска, мултиетничка и прогресивна сила што ќе се бори за една поинаква Македонија – “Замисли”.
“Замисли” е составена од граѓани, сите истакнати и докажани во својата област, млади луѓе со врвно образование, борци и активисти, дел познати, дел сосема нови за македонската јавност, а сите со заеднички став – дека политиката е преважна за да им биде оставена само на партиите.
“Замисли” ќе биде исклучиво граѓанска, непартиска иницијатива, без никакви амбиции да учествува на избори или да дојде до дел од “колачот”, но и тоа како со амбиции, волја, знаење и смелост да замисли, да создаде решенија за најгорливите проблеми во сите клучни области и да се залага за нивно спроведување.
На синоќешната промоција беа презентирани дел од граѓаните вклучени во “Замисли”:
Мијалче Мики Минов; раководител на оддел за Магнетна Резонанца во Империал Колеџ, Лондон; д-р Артан Лимани, истражувач за високо образование; Антонио Јовановски, активист за животна средина; Александар Тасевски, претседател на Синдикатот на контролори за летање; Сашо Серафимовски, театарски режисер; Леа Огњановска, докторантка по право на ЕУ и европски интеграции; Кристијан Фидановски, докторанд на социјални политики на “Оксфорд”, Рита Бехадини, новинар и д-р Борјан Ѓузелов, политиколог.
Сите тие низ своите излагања зборуваа за состојбите во нивните професионални области и порачаа дека системски решенија се можни единствено преку силен граѓански активизам.
Специјален гостин беше познатиот српски водител Зоран Кесиќ, кој самиот низ своето телевизиско шоу и одлична сатира е пример за општествено ангажиран граѓанин.
Тој порача дека ваква граѓанска иницијатива и платформа е исклучително потребна, не само за Северна Македонија, туку и за целиот регион, каде политиката е главно сконцентрирана во партиски кругови.
Логото на “Замисли” е инспирирано од цвеќето пркос, а на него се претставени граѓани, обединети околу една идеја. Мотивот е традиционален вез и филигран, – пораката дека патриотизмот не им припаѓа на оние кои земјата ја сакаат само како плен, туку на лојалните и чесни граѓани.
Од денеска, граѓанската сила “Замисли” ќе биде отворена за сите добронамерници кои сакаат да се ангажираат за општото добро без притоа да очекуваат директна лична корист, се вели во соопштението од Солуција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска дел од Илинден и Центар
Од ЕВН Македонија АД известуваат дека денеска без електрична енергија ќе останат:
· во периодот од 08:00 до 13:00 часот, корисниците од улицата 8, улицата 18, општина Илинден;
· во периодот од 08:30 до 12:30 часот, корисниците од Хотел Буши, дел од улицата Самоилова, дел од улицата Јоаким Крчовски, дел од улицата Прохор Пчински, дел од улицата Алберт Станиќ, општина Центар.
Македонија
Дел од Центар денеска без вода
Од ЈП Водовод и Канализација известуваат дека денеска поради уличен дефект на улицата 8 -ма Ударна Бригада 39, прекинато водоснабдување ќе имаат корисниците на дел од истата улица, вклучително и објектот на Амбасадата на Р.Италија, општина Центар.
Водоснабдувањето ќе биде прекинато од 08:30 часот до завршување со санација на дефектот.
Македонија
Наутро ведро и студено, во текот на денот сончево
Наутро ведро и студено, а во текот на денот сончево со мала до умерена локална облачност. Ќе дува слаб ветер од северозападен правец. Минималната температура ќе биде во интервал од -3 до 5, а максималната ќе достигне од 14 до 20 степени.
Во Скопје, сончево со мала до умерена облачност и со слаб северен ветер. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време со постудени утра и со услови за утринска магла по одделни котлини. Во текот на денот ќе преовладува сончево време со мала до умерена облачност. Дневните температури ќе бидат без значителна промена.

